Kgaolo 14

Ke ka Baka La’ng ke sa fo Ipolaya?

 “GO KAONE gore ke hwe go e na le gore ke phele.” Ke mang yo a boletšego mantšu ao? Na a boletšwe ke motho yo a bego a sa dumele go Modimo? Na ke motho yo a bego a furaletše Modimo? Na ke motho yo a bego a lahlilwe ke Modimo? Ga se a bolelwa le ke o tee wa bao go boletšwego ka bona ka mo godimo. Motho yo a a boletšego e be e le monna yo a ineetšego go Modimo eupša e le yo a bego a nyamile kudu, e lego Jona.—Jona 4:3.

Beibele ga e bolele gore Jona o be a le kgauswi le go ipolaya. Lega go le bjalo, go lla ga gagwe ka go hloka kholofelo go utolla taba ya bohlokwa, gore ka dinako tše dingwe gaešita le mohlanka wa Modimo a ka gateletšwa ke go nyama.—Psalme 34:19.

Bafsa ba bangwe ba ikwa ba nyamile kudu ka tsela e swanago moo ba se sa hlwago ba bona lebaka la go tšwela pele ba phela. Ba ka ikwa go swana le Laura wa nywaga e 16 yo a bolelago gore: “Ke bile le dinako tša go ikwa ke gateletšegile leboelela ka nywaga e mentši. Nako le nako ke nagana ka go ipolaya.” Ge e ba o tseba motho yo a kilego a bolela gore o nyaka go ipolaya—goba ge e ba wena o kile wa nagana go dira seo—o ka dira’ng? Anke re hlahlobišiše lebaka leo ka lona motho a ka bago le kgopolo e bjalo.

Mabaka a go Nyama

Ke ka baka la’ng motho a ka nagana ka go ipolaya? Go ka ba go na le mabaka a mantši. Lebaka le lengwe ke gore re phela “[dinakong] tše di hlobaetšago tšeo go lego thata go lebeletšana le tšona,” gomme bafsa ba bantši bao ba lego mahlalagading ba kgongwa kudu ke dikgateletšego tša bophelo. (2 Timotheo 3:1) Se sengwe gape ke gore go se phethagale ga batho go ka dira gore ba bangwe ba dule ba nagana ka dilo tše di fošagetšego ka bona le ka dilo tšeo di diregago go ba dikologa. (Baroma 7:22-24) Ka dinako tše dingwe, se se bakwa ke go swarwa gampe. Mabakeng a mangwe, bolwetši le bjona bo ka dira gore motho a nagane ka tsela e fošagetšego. Ge e le gabotse, nageng e nngwe go akanywa gore batho ba ka godimo ga 90 lekgolong bao ba ilego ba ipolaya ba be ba fokola ka tsela e itšego monaganong. *

Ke therešo gore ga go na motho yo a sa welwego ke mathata.  Beibele e bolela e le ka kgonthe gore “tlholo yohle e tšwela pele e tsetsela gotee gomme e ekwa bohloko gotee.” (Baroma 8:22) Seo se akaretša le bafsa. Ge e le gabotse, bafsa ba ka kgongwa kudu ke ditiragalo tše di sa kgahlišego, tše bjalo ka tše di latelago:

● Lehu la wa leloko, mogwera goba seruiwa seo ba se ratago kudu

● Dingangišano tša ka lapeng

● Go se atlege sekolong

● Go arogana le motho yo ba ratanago le yena

● Go swarwa gampe (go akaretša go swarwa gampe mmeleng goba go gobošwa ka tša botona le botshadi)

Therešo ke gore go se go ye kae mo e ka bago bafsa ka moka ba  tla lebeletšana le boemo botee goba go feta moo bja maemo ao a lokeleditšwego ka mo godimo. Ke ka baka la’ng ba bangwe ba kgona go kgotlelela maemo a go feta ba bangwe? Ditsebi di bolela gore bafsa bao ba nyakago go lahlela toulo ba nagana gore ga go na motho yo a ka ba thušago e bile ba ikwa ba hloka kholofelo. Ka mantšu a mangwe, bafsa ba bjalo ba bona go se na nko e tšwago lemina. Ga se gore ba tloga ba nyaka go hwa; ba fo ba ba nyaka go fediša bohloko bjo ba bo kwago.

Na ga go na Kholofelo?

O ka ba o tseba motho yo a nyakago go fediša bohloko bjo a bo kwago, moo a ilego a ba a bolela gore ga a sa nyaka go phela. Ge e ba go le bjalo, o ka dira’ng?

Ge e ba mogwera wa gago a gateletšegile go fihla bokgoleng bja go nyaka go hwa, mo kgothaletše gore a nyake thušo. Ke moka, go sa šetšwe gore ga a nyake gore o botše motho yo mongwe ka seo a nyakago go se dira, wena botša motho yo a gotšego tsebong ka taba yeo. O se ke wa tshwenyega ka taba ya gore segwera sa lena se tla fela. Ka go bega taba yeo, o ka phološa bophelo bja mogwera wa gago!

Eupša go thwe’ng ge e ba wena o kile wa nagana ka go ipolaya? O se ke wa dula ka taba yeo. Botša motho yo mongwe ka seo—e ka ba motswadi wa gago, mogwera goba motho le ge e le ofe yo a nago le kwelobohloko yo a tlago go theetša dilo tšeo di go tshwenyago le go go tšeela hlogong. Ga go na selo seo se tlago go go lahlegela ge o bolela ka mathata a gago, go e na le moo o tla holega kudu. *

Ke therešo gore mathata a gago a ka se ke a nyamelela feela ka gobane o bolela ka ona. Eupša thekgo ya motho yo o mmotago yo o ka mo ntšhetšago sa mafahleng e ka fo ba e le selo seo o se nyakago gore o be le pono e botse ka boemo bja gago. Le gona motho yoo a ka go thuša go hwetša ditharollo tše di šomago.

 Dilo di a Fetoga

Ge o gateletšegile, gopola se: Go sa šetšwe gore boemo bja gago bo ka bonagala bo sa holofetše gakaakaang, ge nako e dutše e eya dilo di tla fetoga. Ka nako e nngwe, mopsalme Dafida yo a ilego a welwa ke mathata a mantši o ile a kgona go botša Modimo ka thapelo gore: “Sello sa ka o se fetotše go bina ka lethabo.”—Psalme 30:11.

Ruri Dafida ga se a ka a letela gore go bina ga gagwe ka lethabo e be ga ka mo go sa felego. O be a tseba go tšwa phihlelong gore mathata a bophelo a a tsoga a be a nyamelele. Na o lemogile seo ka mathata a gago? A mangwe a ona a ka bonagala e le a gateletšago kudu—bonyenyane gona bjale. Eupša o se ke wa fela pelo. Dilo di a fetoga, gantši di fetogela bokaoneng. Ka dinako tše dingwe, mathata a ka fokotšwa ka ditsela tšeo o sa kago wa di nagana. Mabakeng a mangwe, o ka hwetša tsela ya go lebeletšana le ona yeo o sa kago wa e nagana. Ntlha ke gore, mathata ao a gateletšago a ka se dule a le bjalo ka mo go sa felego.—2 Bakorinthe 4:17.

Bohlokwa bja Thapelo

Sebopego sa bohlokwa kudu sa poledišano seo o ka bago le sona ke thapelo. O ka rapela go etša Dafida gore: “Mphetleke o tsebe pelo ya  ka, hle Modimo. Ntlhahlobe o tsebe dikgopolo tša ka tše di mpherekanyago, o bone ge e ba go nna go na le tsela e kwešago bohloko, o ntlhahle tseleng ya go iša mehleng ya neng le neng.”—Psalme 139:23, 24.

Thapelo ga e fo ba seokobatši sa mathata. Ke go boledišana ka tsela ya kgonthe le Tatago wa legodimong, yo a nyakago gore o mo ‘tšhollele pelo ya gago.’ (Psalme 62:8) Ela hloko ditherešo tše di latelago tša motheo mabapi le Modimo:

● O tloga a tseba maemo ao a go bakelago kgateletšego.—Psalme 103:14.

● O go tseba kaone go feta kamoo wena o itsebago ka gona.—1 Johane 3:20.

● ‘O a go hlokomela.’—1 Petro 5:7.

● Lefaseng la gagwe le lefsa, Modimo o tla “phumola megokgo ka moka” mahlong a gago.—Kutollo 21:4.

 Ge Bothata bo le Mabapi le tša Maphelo

Go etša ge go boletšwe pejana, maikwelo a go nyaka go ipolaya gantši a bakwa ke mohuta o itšego wa bolwetši. Ge e ba go le bjalo ka wena, o se ke wa hlabja ke dihlong tša go tsoma thušo. Jesu o ile a dumela gore bao ba babjago ba nyaka ngaka. (Mateo 9:12) Se se kgahlišago ke gore mafokodi a mantši a ka alafša. Le gona kalafo e ka go thuša gore o ikwe bokaone! *

Beibele e nea kholofetšo e kgothatšago e le ruri—gore lefaseng le lefsa la Modimo, “ga go na modudi yo a tla rego: ‘Ke a babja.’” (Jesaya 33:24) Modimo o re ka nako yeo “dilo tša pele di ka se sa gopolwa, e bile di ka se sa rotoga pelong.” (Jesaya 65:17) Ga bjale dira sohle seo o ka se kgonago go lebeletšana le ditlhohlo tša bophelo, o kgodišegile gore ka nako e swanetšego ya Modimo, kgateletšego e tla ba e le selo sa nakong e fetilego.—Kutollo 21:1-4.

BALA KA MO GO OKETŠEGILEGO MABAPI LE TABA YE GO BOLUMO 2, KGAOLO 9

KGAOLONG YA RENA YEO E LATELAGO

Batswadi ba gago ba nyaka go tseba selo se sengwe le se sengwe ka bophelo bja gago—gaešita le dilo tše dingwe tšeo o bego o ka rata gore ba se di tsebe. Na o ka atlega go direng gore ba go nee nako ya go ba noši?

[Mengwalo ya tlase]

LENGWALO LA BOHLOKWA

“Tsebišang Modimo dikgopelo tša lena . . . ; ke moka khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano.”—Bafilipi 4:6, 7.

KELETŠO

Ge o ikwa o nyamile, sepelasepela ka go akgofa. Go tšwela ka ntle gomme wa itšhidulla go ka dira gore o ikwe o le kaone e bile o phetše gabotse.

NA O BE O TSEBA . . . ?

Batho bao ba kgongwago ke bohloko bja batho bao ba ipolayago ga se feela batho bao eupša le baratiwa ba bona bao ba šalago ba phela.

KGATO YEO KE TLAGO GO E TŠEA!

Ge e ba ke ikwa ke se na mohola e bile ke sa ratwe, ke tla bolela le (ngwala leina la motho yo o tlago go mo ntšhetša sa mafahleng) ․․․․․

Tšhegofatšo e nngwe yeo ke e thabetšego bophelong yeo nka naganago ka yona le go e leboga ke ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Gaešita le mathata a mašoro ke a nakwana feela. Go naganišiša ka taba yeo go ka go thuša bjang?

● Ke ka tsela efe motho yo a ipolayago a fetišetšago mathata a gagwe mothong yo mongwe?

[Ntlhakgolo go letlakala 104]

“Ka dinako tše dingwe, ke ile ka gateletšega kudu moo ke bego ke nyaka go fo ikhwela, eupša gona bjale ke boetše ke phela gabotse gomme ke leboga gore ke ile ka phegelela thapelong le go hwetša kalafo.”—Heidi

[Lepokisi go letlakala 100]

Ge e ba o Ikwa o Gateletšegile Kudu

Gaešita le banna le basadi ba ba botegago ba ka Beibeleng ka dinako tše dingwe ba ile ba ikwa ba gateletšwe kudu ke dipelaelo tša bophelo. Ela hloko mehlala e mengwe.

Rebeka: “Ge e ba go le ka mokgwa wo, ke sa phelela’ng?”—Genesi 25:22.

Moshe: “Mpolaye hle. . . . Dira gore ke se bone masetlapelo a a ka.”—Numeri 11:15.

Eliya: “Wena Jehofa, tšea moya wa ka, ka gobane ga ke phale borakgolokhukhu ba ka ka selo.”—1 Dikgoši 19:4.

Jobo: “A mola o ka be o nkuta Bodulabahu, . . . wa mpeela nako gomme wa nkgopola!”—Jobo 14:13.

Mafelelong maemo a batho bao go boletšwego ka bona ditemaneng tše di lego ka mo godimo a ile a fetogela bokaoneng ka tsela yeo ba sa kago ba e nagana e sa le pele. Kgonthišega gore selo se se swanago e ka ba sa therešo le ka wena!

[Seswantšho go letlakala 102]

Maikwelo a go nyama a swana le maru a pula ya matlorotloro—ka morago ga nako, a tla feta