Kgaolo 15

Na go Nyaka go ba Noši go Fošagetše?

 Tsenya leswao le ✔ kgauswi le tsela yeo gantši o ka arabelago ka yona go e nngwe le e nngwe ya ditiragalo tše di latelago:

1. O itswaleletše ka phapošing ya gago gomme ngwaneno o itahlela ka gare a se a kokota.

□ ‘Ga go na bothata. Le nna ka dinako tše dingwe ke fela ke dira bana bešo sona seo.’

□ ‘Ga o na mekgwa! Go thwe’ng ge e ba o tsene ke be ke sa dutše ke apara?’

2. O sa tšwa go tsena ka gae, gomme batswadi ba gago ba thoma go go hlaba ka dipotšišo. Ba re: “O be o ile kae? O be o dira’ng moo? O be o ile le mang?”

□ ‘Ga go na bothata. A ke re ka mehla ke ba botša dilo ka moka.’

□ ‘Ke a tenega! Batswadi ba ka ba fo ba ba sa mpote!’

GE O be o sa le yo monyenyane, mohlomongwe go nyaka go ba noši e be e se selo sa bohlokwa go wena. Ge ngwaneno a be a itahlela ka phapošing ya gago, o be o sa be le bothata. Ge batswadi ba gago ba be ba go botšiša potšišo, o be o ba araba ka ntle le go dikadika. Ka nako yeo, bophelo bja gago bo be bo swana le puku e bulegilego. Eupša ga bjale o duma eka o ka e tswalela. Corey wa nywaga e 14 o re: “Ke rata ge dilo tše dingwe di tsebja ke nna feela.” Anke re ahlaahle dikarolo tše pedi tšeo go tšona go leka go nyaka go ba noši e ka bago bothata.

Ge o Nyaka go ba Noši

Go na le mabaka a mantši a kwagalago a gore o nyake go ba noši. Mohlomongwe o fo ba o nyaka go ‘khutša go se nene.’ (Mareka 6:31) Goba ge o nyaka go rapela, o ka “tsena phapošing ya gago gomme ge o tswaletše mojako wa gago, [wa] rapela Tatago,” go etša ge Jesu a eleditše barutiwa ba gagwe go dira bjalo. (Mateo 6:6; Mareka 1:35) Bothata ke gore, ge o tswalela mojako wa phapoši ya gago (ge e ba o na le yona), batswadi ba gago ba ka fo se nagane gore o a rapela! Le gona go ka direga gore bana beno ba se ke ba kwešiša taba ya gore o fo ba o nyaka go ba noši.

 Seo o ka se dirago. Go e na le gore o lwe le ba bangwe ka taba ya go nyaka go ba noši, dira se se latelago:

● Leka go beela bana beno melao e sego kae e kwagalago e le gore o ka ba le nako e itšego ya go ba noši. Ge e ba go nyakega, bona ge e ba batswadi ba lena ba ka le thuša tabeng ye. *

● Katanela go kwešiša pono ya batswadi ba gago. Rebekah wa nywaga e 16 o re: “Ka dinako tše dingwe, batswadi ba ka ba nyaka go tseba seo ke se dirago. Eupša go bolela therešo, le nna ge nkabe ke be ke le motswadi ke be ke tla nyaka go tseba seo ngwanaka yo a lego mahlalagading a se dirago—kudukudu ka go tseba diteko ka moka tšeo bafsa ba lebeletšanago le tšona lehono!” Go swana le Rebekah, na o ka kgona go lemoga dilo tšeo batswadi ba gago ba tshwenyegilego kudu ka tšona?—Diema 19:11.

● Ipotšiše go tšwa pelong gore: ‘Na ke neile batswadi ba ka lebaka la go nagana gore ge mojako wa phapoši ya ka o tswaletšwe go ra gore go na le selo se se fošagetšego seo ke se dirago? Na ke be ke duletše go ba utela seo ke se dirago bophelong bja ka moo ba naganago gore ba swanetše go ba dihlodi e le gore ba ntsebe?’ Ge e ba karabo ya gago dipotšišong tšeo e le aowa gomme go bonagala batswadi ba gago ba sa dutše ba sa go bote, gona ba botše kamoo o ikwago ka gona o išitše maswafo fase le ka tlhompho. Theetša e le ka kgonthe dilo tšeo ba  tshwenyegilego ka tšona gomme o kgonthišetše gore ga go na selo seo o se dirago seo se tsenyago letsogo bothateng bjo.—Jakobo 1:19.

Ge o Kgetha Bagwera

Nakong ya mahlalagadi, ke ga tlhago gore o dire segwera le batho bao e sego ba lapa leno. Le gona ke ga tlhago gore batswadi ba gago ba ipotšiše gore bagwera ba gago ke bomang le gore o dira eng ge o na le bona. Eupša ka dinako tše dingwe o ka nagana gore ba fo ba ba tshwenyega kudu. Amy wa nywaga e 16 o re: “Ke fo ba ke nyaka go diriša mogalathekeng wa ka le go bala di e-mail tša ka ka ntle le gore batswadi ba ka ba nkukamele gomme ka morago ga metsotso e mengwe le e mengwe e lesome ba mpotšiše gore ke bolela le mang.”

Seo o ka se dirago. Go e na le go dumelela gore bagwera ba gago ba bake lepheko magareng gago le batswadi ba gago, leka go dira se se latelago:

● O se ke wa uta bagwera ba gago, le gona kgonthišetša gore batswadi ba gago ba a ba tseba. Go ba gona, o ka fo se rate ge batswadi ba gago ba nyakišiša ka sephiring gore bagwera ba gago ke bomang, eupša o nyaka gore ba dire’ng ge e ba o sa nyake gore ba ba tsebe? Gopola gore ge batswadi ba gago ba tseba batho bao o fetšago nako o na le bona, ke moo ba tlago go se be le bothata ka bagwera bao o ba kgethago.

● Bolela therešo: Na bothata ke gore ga o nyake batswadi ba gago ba tseba ditaba ka moka tša bophelo bja gago, goba na ke gore o nyaka go dira dilo ka sephiring? Brittany wa nywaga e 22 o re: “Ge e ba o dula ka gae gomme go na le selo seo batswadi ba gago ba tshwenyegago ka sona, o swanetše go nagana gore: ‘Seo ke se dirago  ga se sa fošagala, bjale ke ka baka la’ng ke swanetše go ba utela sona?’ Ka lehlakoreng le lengwe, ge e ba o nyaka go ba utela selo seo, gona go na le bothata.”

Go ba Noši le Wena

Gona bjale o tla ba le sebaka sa go nagana ka ditharollo tše itšego sebopegong seo se go tshwenyago tabeng ya go ba noši. Methalading yeo e lego ka mo tlase, ngwala ditsela tšeo o tlago go arabela ka tšona dipotšišong tšeo di sepedišanago le megato yeo e latelago:

Mogato 1: Lemoga bothata. Ke neng moo o naganago gore o tla rata go ba noši kudu?

․․․․․

 Mogato 2: Naganela pono ya batswadi ba gago. O nagana gore ke’ng seo ba ka bago ba tshwenyega kudu ka sona?

․․․․․

Mogato 3: Nyaka ditharollo. O ka ba o gakatša bothata ka tsela efe o sa lemoge? Ke diphetogo dife tšeo o ka di dirago mabapi le karabo ya gago potšišong yeo e lego ka mo godimo? O be o ka rata gore batswadi ba gago ba dire’ng ka dilo tšeo di go tshwenyago?

․․․․․

Mogato 4: Ntšha sa mafahleng. Hlalosa kamoo o ka thomago poledišano le batswadi ba gago mabapi le go ba noši.

․․․․․

KGAOLONG YA RENA YEO E LATELAGO

Na yo mongwe wa batswadi ba gago o hwile? Ge e ba go le bjalo, o ka hwetša khomotšo kae?

[Mongwalo wa tlase]

LENGWALO LA BOHLOKWA

“Dira sohle se o ka se kgonago gore o itšweletše o amogelega go Modimo, o le yo a šomago go se seo se go hlabišago dihlong.”—2 Timotheo 2:15.

KELETŠO

Ge o boledišana le batswadi ba gago ka taba ya go nyaka go ba noši, o se ke wa ntšha dingongorego. Bolela ka dilo tšeo di go tshwenyago. Phapano ke efe gare ga dilo tše? Dingongorego di lebiša tlhokomelo go seo o naganago gore batswadi ba gago ga ba dire gabotse go sona. Dilo tšeo di go tshwenyago di dira gore ka moka ga lena le lebiše tlhokomelo go nyakeng ditharollo.

NA O BE O TSEBA . . . ?

Ge o bolela le batswadi ba gago ka bolokologi, ba ka se go belaele kudu.

KGATO YEO KE TLAGO GO E TŠEA!

E le gore batswadi ba ka ba mpote (goba gore ba boele ba mpote), ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng batswadi ba gago ba na le tshwanelo ya go tseba ka bophelo bja gago?

● Maiteko a gago a go nyaka go bolela gabotse le batswadi ba gago a tla go thuša bjang nakong e tlago go bolela le batho ba bangwe bao ba godilego?

[Ntlhakgolo go letlakala 108]

“Batswadi ba gago ga ba nyake gore o wele mathateng, gomme ka dinako tše dingwe go ka bonagala eka ba šitišana le go ba noši ga gago. Go bonagala se e le go hloka tekatekano. Eupša go bolela therešo, le nna ge nkabe ke le motswadi, mohlomongwe ke be ke tla dira se se swanago.”—Alana

[Seswantšho go letlakala 109]

Go botwa go swana le tšheke ya mogolo—go a šomelwa