Kgaolo 9

Nka Ganetša Diteko Bjang?

Karen ga a na metsotso e fetago e lesome a fihlile moletlong gomme o bona bašemane ba babedi ba tsena ba swere mekotla e mmalwa e megolo. Ga go yo a sa tsebego gore mekotla yeo e rwele eng. Pejana o be a kwele bona bašemane bao ba re go tlo ba le bjala bjo bontši moletlong woo.

Go sa letelwa, Karen o kwa lentšu leo a le tsebago ka morago ga gagwe le re: “Selo se sa go tšwafiša se, o emetše’ng mo?” Ge Karen a retologa, o bona mogwera wa gagwe Jessica a swere mapotlelo a mabedi a bjala ao a sa tšwago go bulwa. Jessica o iša le lengwe sefahlegong sa Karen ke moka o re: “O se ke wa mpotša gore o sa le yo monyenyane gore o ka ithabiša go se nene!”

Karen o nyaka go gana. Eupša kgateletšo ya gore a dumele ke e kgolo go feta kamoo a bego a nagana ka gona. Jessica ke mogwera wa gagwe, le gona ga a nyake gore a nagane gore . . . o a tšwafiša, ka ge Jessica a ile a bolela bjalo. Ka ntle le moo, Jessica ke yo mongwe wa banenyana bao ba itshwerego gabotse. Le gona, ge e ba a enwa bjala, ke ka baka la’ng Karen a se a swanela go bo nwa? Karen o ipotša gore: ‘E fo ba bjala. Ga go swane le go diriša dihlaretagi goba go ba le dikopano tša botona le botshadi.’

 GE O sa le yo mofsa, diteko di tla ka ditsela tše dintši. Gantši di akaretša batho ba bong bjo bo sa swanego le bja gago. Ramon yo a nago le nywaga e 17 o re: “Sekolong banenyana ba gapeletša batho go dira dilo. Ba rata go go phophola le go bona gore ba ka dira bjalo go fihla bokgoleng bofe. Le ge o gana ga ba kgaotše!” Deanna yoo le yena a nago le nywaga e 17, o hweditše seo e le therešo. O re: “Mošemane yo mongwe o ile a tla go nna gomme a nkgokarela. Ke ile ka mmetha letsogo ke moka ka re: ‘O dira’ng? Ga ke go tsebe le go go tseba!’”

Le wena o ka lebeletšana le diteko, e bile go ka bonagala eka ga di kgaotše. Diteko tše di tšwelago pele di ka swana le motho yo a kokotago mojakong wa gago ka go se kgaotše gaešita le ge go na le leswao leo le rego “O se ke wa Ntšhitiša.” Na o kwa motho a kokota ka tsela yeo gantši go feta kamoo o ka ratago ka gona? Ka mohlala, na o lekwa ke se sengwe sa dilo tše di latelago?

□ Go kgoga

□ Go bogela diswantšho tšeo di

□ Go nwa bjala kgothaletšago bootswa

□ Go ba le thobalano

□ Go diriša dihlaretagi

□ Se sengwe ․․․․․

Ge e ba o tsentše leswao le ✔ kgauswi le se sengwe sa dilo tše di lego ka mo godimo, o se ke wa phetha ka gore ga o swanelwe ke go ba Mokriste. O ka ithuta go laola dikganyogo tše di fošagetšego le go ganetša diteko. Bjang? Go a thuša go lemoga seo se bakago teko. Ela hloko mabaka a mararo.

1. Go se phethagale. Tshekamelo ya go dira se se fošagetšego e tlwaelegile bathong ka moka ba sa phethagalago. Gaešita le moapostola Paulo, e lego Mokriste yo a godilego tsebong, o ile a amogela ka potego gore: “Ge ke kganyoga go dira se se lokilego, se sebe se gona go nna.” (Baroma 7:21) Ka gona, gaešita le motho yo a lokilego ka dinako tše dingwe o tla lemoga gore go na le “kganyogo ya nama le kganyogo ya mahlo.” (1 Johane 2:16) Eupša go dula o nagana ka teko ya go dira se se fošagetšego go fo gakatša dilo, ka gobane Beibele e re: “Kganyogo ge e gotše e tswala sebe.”—Jakobo 1:15.

2. Ditutuetšo tše di tšwago ka ntle. Re potapotilwe ke  diteko. Trudy o re: “Batho ba dula ba bolela ka thobalano sekolong le mošomong. Gantši e dirwa gore e bonale e kgahliša e bile e thabiša thelebišeneng le difiliming. Ga se gantši motho a bonago ditlamorago tše mpe tša yona!” Trudy o tseba go tšwa phihlelong kamoo diteko tše di tšwago go dithaka le mekerong ya ditaba di ka bago matla ka gona. O gopola gore: “Ke be ke nagana gore ke hweditše motho yo ke mo ratago ge ke be ke na le nywaga e 16. Mma o ile a dula le nna fase gomme a mpotša gore ge e ba dilo di ka tšwela pele ka mokgwa wo di bego di sepela ka wona, ke tla feleletša ke imile. Ke ile ka makatšwa ke gore mma a ka nagana bjang selo se se bjalo! Dikgwedi tše pedi ka morago, ke ile ka ima.”

3. “Dikganyogo tša bofsa.” (2 Timotheo 2:22) Polelwana yeo e ka akaretša kganyogo le ge e le efe yeo e tlwaelegilego go bafsa, e bjalo ka go kganyoga go amogelwa ke ba bangwe goba go kganyoga gore ba bangwe ba bone gore o godile. Dikganyogo tšeo ka botšona ga se tše di fošagetšego, eupša ge e ba di sa laolwe, di ka dira gore go be thata go ganetša diteko. Ka mohlala, go kganyoga gore ba bangwe ba bone gore o godile go ka dira gore o lahle mekgwa e mebotse yeo o e rutilwego ka gae. Se ke seo se ilego sa diragalela Steve ge a be a na le nywaga e 17. O re: “Ke ile ka rabela kgahlanong le batswadi ba ka gomme ka dira dilo ka moka tšeo ba bego ba nthutile gore ke se ke ka di dira—tše ka moka ke di dirile nakwana ka morago ga go kolobetšwa.”

Tsela ya go Fenya Diteko

Ke therešo gore ditutuetšo tšeo di boletšwego ka mo godimo di matla. Lega go le bjalo, o ka fenya diteko. Bjang?

 ● Sa pele, lemoga teko yeo go lego thata go e fenya. (Mohlomongwe o ka ba o šetše o dirile bjalo go letlakala 65.)

● Sa bobedi, ipotšiše gore: ‘Ke neng moo go nago le kgonagalo e kgolo ya gore teko yeo e tšwelele?’ Tsenya leswao le ✔ kgauswi le se sengwe sa dilo tše di latelago:

□ Ge ke le sekolong

□ Ge ke le noši

□ Ge ke le mošomong

□ Nako e nngwe ․․․․․

Go tseba nako yeo ka yona go ka diregago gore teko e tšwelele go ka ba gwa go thuša go e phema ka mo go feletšego. Ka mohlala, nagana ka tiragalo yeo go boletšwego ka yona mathomong a kgaolo ye. Ke temošo efe yeo Karen a ilego a e hwetša ya gore go tla ba le mathata moletlong wo a bego a ile go ona?

․․․․․

 Nkabe a ile a phema teko bjang ka mo go feletšego?

․․․․․

● Ka ge bjale o šetše o lemogile teko le nako yeo ka yona go ka diregago gore e tšwelele, o loketše go gata mogato. Selo sa pele ke gore o tsebe kamoo o ka fokotšago goba wa fediša tsela yeo o ka kopanago le teko ka yona. Ngwala seo o ka se dirago ka mo tlase.

․․․․․

(Mehlala: Ge e ba ka mehla ge sekolo se tšwile o kopana le bana bao o tsenago sekolo le bona bao ba go gapeletšago gore o kgoge le bona, mohlomongwe o ka fetoša tsela yeo o sepelago ka yona gore o pheme go kopana le bona. Ge e ba ka mehla o hwetša melaetša yeo o sa e nyakego ya Inthanete yeo e nago le diswantšho tšeo di kgothaletšago bootswa, o ka nagana ka go tsenya mananeo a khomphutha ao a thibelago melaetša e bjalo gotee le mekero ka moka ya Inthanete yeo e romelago melaetša e bjalo. Le gona, o ka leka gore o be šedi ge o kgetha mantšu a motheo ao o a tsenyago khomphutheng ge o dira nyakišišo.)

Ke therešo gore o ka se pheme diteko ka moka. Go ka direga gore go se go ye kae o lebeletšane le teko e matla kudu—mohlomongwe  ka nako yeo o bego o sa e letela. O ka dira’ng ge go le bjalo?

Itokiše

Ge Jesu a be “a lekwa ke Sathane,” o ile a gana gateetee. (Mareka 1:13) Ka baka la’ng? Ka gobane o be a šetše a tseba gore o eme kae ditabeng tšeo di ilego tša tšwelela. Jesu o be a šetše a dirile phetho ya go kwa Tatagwe ka dinako tšohle. (Johane 8:28, 29) O be a bolela therešo ge a be a re: “Ke theogile legodimong, e sego go tlo dira thato ya ka, eupša go dira thato ya yo a nthomilego.”—Johane 6:38.

Letlakaleng le le latelago, ngwala mabaka a mabedi ao ka ona o swanetšego go ganetša teko yeo o kopanago le yona gantši le  ditsela tše pedi tšeo o ikemišeditšego go di diriša tšeo di tlago go go thuša go e ganetša.

Mabaka ao o swanetšego go ganetša teko:

1 ․․․․․

2 ․․․․․

Megato yeo e tlago go go thuša go e ganetša:

1 ․․․․․

2 ․․․․․

Gopola gore ge o ineela tekong, o fetoga lekgoba la dikganyogo tša gago. (Tito 3:3) Ke ka baka la’ng o swanetše go itumelela go laolwa ke dikganyogo tša gago? Eba yo a godilego ka mo go lekanego gore o kgone go laola dikganyogo tša gago go e na le go di dumelela gore di go laole. (Bakolose 3:5) Rapelela gore o tšwele pele o dira bjalo.—Mateo 6:13. *

BALA KA MO GO OKETŠEGILEGO MABAPI LE TABA YE GO BOLUMO 2, KGAOLO 15

KGAOLONG YA RENA YEO E LATELAGO

Na matšatši a o ikwa o tšwafa? Ithute kamoo o ka kaonefatšago boemo bja gago bja tša maphelo gomme wa buša wa ba le matla!

[Mongwalo wa tlase]

LENGWALO LA BOHLOKWA

“Modimo o a botega gomme a ka se le lese le lekwa go feta kamoo le ka kgonago go kgotlelela ka gona, eupša ge go etla moleko o tla bula tsela ya go tšwa e le gore le kgone go o kgotlelela.”—1 Bakorinthe 10:13.

KELETŠO

Diriša “Peer-Pressure Planner,” [Tsela ya go Itokišetša go Lebeletšana le Kgateletšo ya Dithaka] yeo e hwetšagalago go matlakala 132 le 133 ka pukung ya Dipotšišo tša Bafsa le Dikarabo tše Šomago, Bolumo 2, gore o lokišeletše dikarabo tšeo o ka di dirišago ge motho yo mongwe a go leka gore o dire se se fošagetšego.

NA O BE O TSEBA . . . ?

Modimo o ile a bolela e sa le pele gore Jesu o be a tla botega, eupša seo ga se bolele gore Jesu o be a swana le roboto, a hlametšwe go kwa. Go e na le moo, Jesu o be a na le tshwanelo ya go ikgethela. O ile a ikgethela go botega—ga se selo seo a bego a se reretšwe e sa le pele. Leo ke le lengwe la mabaka ao ka ona a ilego a rapela ka mo go tseneletšego ge a be a lekwa.—Baheberu 5:7.

KGATO YEO KE TLAGO GO E TŠEA!

E le gore ke matlafatše boikemišetšo bja ka bja go ganetša teko, ke tla ․․․․․

Batho, mafelo le maemo ao ke swanetšego go a phema a akaretša ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Na dibopiwa tše di phethagetšego di ka lekwa?—Genesi 6:1-3; Johane 8:44.

● Ge o ganetša teko, go botega ga gago go kgoma ba bangwe bjang?—Diema 27:11; 1 Timotheo 4:12.

[Ntlhakgolo go letlakala 68]

“Seo se nthušago ke go tseba gore ke thekgwa ke Motho yo matla kudu legohleng le gore nka mo kgopela thušo le ge e le neng!”—Christopher

[Box/​Picture on page 67]

Leka se!

Tšea khamphase o e bee gabotse e le gore lenaka la yona le šupe leboa. Ke moka, tšea makenete o o bee ka thoko ga khamphase. Ke’ng seo se diregago? Lenaka la khamphase ga le sa šupa mo go swanetšego. Go e na le moo, le šupa ka lehlakoreng la makenete.

Letswalo la gago le swana le khamphase yeo. Ge e ba le tlwaeditšwe gabotse, le tla go šupetša tsela ya maleba gomme la go thuša go dira diphetho tše bohlale. Eupša ditlwaelano tše mpe, go etša makenete, di na le matla ao a ka fetošago kahlolo ya gago ya se se nepagetšego le se se fošagetšego. Re ithuta’ng go se? Leka go phema batho le maemo ao a ka šitišago kahlolo ya gago ya se se nepagetšego le se se fošagetšego!—Diema 13:20

[Seswantšho go letlakala 69]

Ge o ineela tekong, o fetoga lekgoba la dikganyogo tša gago