Kgaolo 12

Nka Kaonefatša Bjang go Ikholofela ga ka?

Ee Aowa

Ge o itebelela seiponeng, □ □

na o rata seo o se bonago?

Na o nagana gore o na le □ □

bokgoni bjo bo ka retwago?

Na o kgona go lebeletšana le kgateletšo ya dithaka? □ □

Na o kgona go amogela go swawa □ □

diphošo ka tsela e kwagalago?

Na o kgona go lebeletšana le dipolelo □ □

tša go hloka toka tšeo ba bangwe ba di bolelago ka wena?

Na o ikwa o ratwa? □ □

Na o hlokomela boemo bja gago bja tša maphelo? □ □

Na o thabela ba bangwe ge ba atlega? □ □

Na ka kakaretšo o itebelela o atlegile? □ □

Ge e ba o arabile ka aowa dipotšišong tše mmalwa tša ka mo godimo, go ka direga gore ga o kgone go bona bokgoni bja gago ka baka la go se ikholofele. Kgaolo ye e reretšwe go go thuša go utolla bokgoni bjoo!

 BAFSA ba bantši ba tshwenya ke go se kgonthišege ka ponagalo ya bona, bokgoni bja bona gaešita le kamoo ba lego ka gona ge ba ipapetša le dithaka tša bona. Na le wena o wela legorong leo? Ge e ba go le bjalo, go na le ba bantši bao ba ikwago ka mo go swanago!

“Go se phethagale ga ka go dira gore ke ikwe ke gateletšegile. Gantši ke itshwaya diphošo kudu.”—Leticia.

“Go sa šetšwe gore o yo mobotsana gakaakaang, o dula o kopana le batho ba bangwe bao ba go phalago ka botse.”—Haley.

“Ke ikwa ke sa lokologa ge ke le gare ga batho ba bangwe. Ke tšhaba gore ba tla ntebelela ke se selo.”—Rachel.

Ge e ba o na le maikwelo le ge e le afe ao a boletšwego ka mo godimo, o se ke wa nyama. O ka hwetša thušo. Ela hloko dilo tše tharo tšeo di ka kaonefatšago go ikholofela ga gago gomme tša go thuša go itebelela ka tsela e nepagetšego kudu.

Ikgafele go thuša ba bangwe

Lengwalo la bohlokwa. “Go na le lethabo le legolo go neeng go feta go amogeleng.”—Ditiro 20:35.

Seo lengwalo le le se bolelago. Ge o thuša ba bangwe, o a ithuša. Bjang? Seema sa Beibele se re: “Moya o fago kudu o tla nontšhwa gomme yo a nwešago ba bangwe meetse ba kgolwa le yena o tla nwešwa meetse a kgolwa.” (Diema 11:25) Ke therešo gore ge o thuša ba bangwe, o tla ikwa o le kaone! *

“Ke nagana ka seo nka se direlago ba bangwe gomme ke leke go thuša ba bangwe ka phuthegong ya gešo. Go rata ba bangwe le go fetša nako ke na le bona go dira gore ke ikwe ke le kaone.”—Breanna.

“Bodiredi bja Bokriste bo a putsa ka gobane bo go gapeletša gore o kgaotše go nagana ka wena ka noši gomme o thome go nagana ka ba bangwe.”—Javon.

 Temošo: O se ke wa thuša ba bangwe feela ka maikemišetšo a go hwetša se sengwe ka morago. (Mateo 6:2-4) Go nea ka maikemišetšo a fošagetšego go ka se go thuše ka selo. Gantši batho ba tla bona gore maikemišetšo a gago ke a boikaketši!—1 Bathesalonika 2:5, 6.

Seo o ka se dirago. Nagana ka motho yo o ilego wa mo thuša nakong e fetilego. E be e le mang, gona o ile wa mo direla’ng?

․․․․․

O ile wa ikwa bjang ka morago ga moo?

․․․․․

Nagana ka motho yo mongwe gape yo o ka mo thušago, gomme o ngwale tsela yeo o ka mo thušago ka yona.

․․․․․

Dira Bagwera

Lengwalo la bohlokwa. “Mogwera wa kgonthe o dula a na le lerato ka dinako tšohle, e bile ke ngwanabo motho yo o ka ithekgago ka yena mohlang wa tlalelo.”—Diema 17:17.

Seo lengwalo le le se bolelago. Mogwera wa kgonthe e ka ba thušo e kgolo kudu nakong ya mathata. (1 Samuele 18:1; 19:2)  Gaešita le kgopolo ya gore go na le motho yo a nago le taba le wena e ka go kgothatša. (1 Bakorinthe 16:17, 18) Ka gona batamelana le bao ba nago le tutuetšo e botse go wena.

“Bagwera ba kgonthe ba ka se go tlogele o nyamile.”—Donnell.

“Ka dinako tše dingwe selo sa bohlokwa kudu ke go tseba gore go na le motho yo a tlogago a na le taba le wena. Seo se ka dira gore o ikwe o le bohlokwa.”—Heather.

Temošo: Kgonthišetša gore bagwera ba gago ba go dira gore o be seo o lego sona e le ka kgonthe—e sego gore o leke go ba motho yo mongwe e le feela gore ba go amogele. (Diema 13:20; 18:24; 1 Bakorinthe 15:33) Go dira ditiro tša bošilo e le feela gore o kgahliše ba bangwe go tla go dira gore o ikwe o nyatšega e bile o se bohlokwa.—Baroma 6:21.

Seo o ka se dirago. Ka mo tlase, ngwala leina la mogwera yoo a ka kaonefatšago go ikholofela ga gago ka tsela e nepagetšego.

․․․․․

Ke ka baka la’ng o sa rulaganye go fetša nako e itšego le motho yo o mo ngwadilego ka mo godimo?—Ela hloko: Ga se gore motho yoo e swanetše go ba thaka ya gago.

O se ke wa Nyama ge o Dira Diphošo

Lengwalo la bohlokwa. “Bohle ba dirile sebe gomme ba hlaelelwa ke letago la Modimo.”—Baroma 3:23.

Seo lengwalo le le se bolelago. Therešo ke gore ga se wa phethagala. Seo se bolela gore go tla ba le dinako tšeo o tlago go bolela goba go dira se se fošagetšego. (Baroma 7:21-23; Jakobo 3:2) Gaešita le ge o ka se pheme go dira diphošo, o ka kgona go laola  tsela yeo o itshwarago ka yona ge o dirile diphošo. Beibele e re: “Moloki le ge a ka wa gašupa, o tla tsoga gape.”—Diema 24:16.

“Ka dinako tše dingwe, go hloka boikholofelo go bakwa ke ge re bapiša mafokodi a rena le bokgoni bja motho yo mongwe.”—Kevin.

“Motho yo mongwe le yo mongwe o na le dika tše dibotse le tše mpe. Re swanetše go ikgantšha ka dika tšeo tše dibotse gomme re leke go lokiša tše mpe.”—Lauren.

Temošo: O se ke wa diriša go se phethagale ga gago e le sehlare sa ntšhirela e le gore o dire sebe. (Bagalatia 5:13) Go dira selo se se fošagetšego ka boomo go tla dira gore o lahlegelwe ke kamogelo ya bohlokwa kudu yeo o ka bago le yona, e lego go amogelwa ke Jehofa Modimo!—Baheberu 10:26, 27.

Seo o ka se dirago. Ka mo tlase, ngwala seka seo o ka ratago go se kaonefatša.

․․․․․

Ngwala letšatšikgwedi la lehono kgauswi le seka seo o se ngwadilego. Dira nyakišišo ya kamoo o ka kaonefatšago ka gona gomme o hlahlobe tšwelopele ya gago ka morago ga kgwedi.

 Bohlokwa bja Gago bja Kgonthe

Beibele e re “Modimo ke yo mogolo go feta dipelo tša rena.” (1 Johane 3:20) Ge e le gabotse, se se bolela gore o kgona go bona bohlokwa bja gago go feta kamoo o ka iponago ka gona. Eupša na go se phethagale ga gago go fetoša seo? Akanya o na le R100 ya pampiri yeo e gagogilego ganyenyane. Na o be o ka e lahla goba wa e lebelela e se ya bohlokwa feela ka gobane e gagogile? Le gatee! E sa dutše e le R100—e gagogile goba e se ya gagoga.

Modimo o lebelela bohlokwa bja gago ka tsela e swanago. Mafokodi a gago ga a mo foufaletše go bona bohlokwa bja gago. O bona le go tšeela godimo maiteko ao o a dirago e le gore o mo kgahliše, go sa šetšwe kamoo a ka bonagalago e le a manyenyane ka gona go wena! Ruri Beibele e go kgonthišetša gore “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe.”—Baheberu 6:10.

KGAOLONG YA RENA YEO E LATELAGO

Na ka dinako tše dingwe go nyama kudu go a go gateletša? Ge e ba go le bjalo, o ka dira’ng ka seo?

[Mongwalo wa tlase]

LENGWALO LA BOHLOKWA

“Anke yo mongwe le yo mongwe a hlahlobe ditiro tša gagwe gomme o tla ba le lebaka la go hlalala ka yena ka noši, e sego ka go ipapiša le motho yo mongwe.”—Bagalatia 6:4.

KELETŠO

O se ke wa ipotša mantšu a swanago le gore, ‘ke dula ke palelwa’ gotee le gore, ‘le ka mohla ga go na selo seo ke se dirago gabotse.’ Mantšu a bjalo ao a feteletšago dilo a fo go nyamiša. Go e na le moo, amogela mafokodi a gago eupša gape o lemoge le bokgoni bja gago.

NA O BE O TSEBA . . . ?

Tsela yeo o itebelelago ka yona e ka kgoma tsela yeo batho ba bangwe ba go lebelelago ka yona . . . gaešita le tsela yeo ba go swarago ka yona.

KGATO YEO KE TLAGO GO E TŠEA!

Ge dithaka tša ka di ntshwaya diphošo, ke tla ․․․․․

Ge ke lemoga gore ke šetša mafokodi a ka feela, ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng bafsa ka mo go kgethegilego ba na le tshekamelo ya go se ikholofele?

● Ke ka baka la’ng e le gabohlokwa go itlhompha ka tsela ya maleba?

[Ntlhakgolo go letlakala 88]

“Motho e ka ba yo mobotse kudu eupša a ipona a befile. Goba a ka ba a se botse eupša a ipona e le yo mobotse go phala batho ka moka. Tše ka moka di ithekgile ka tsela yeo motho a naganago ka yona.”—Alyssa

[Seswantšho go letlakala 90]

Bohlokwa bja tšhelete ga bo fokotšwe feela ke gore e gagogile—go bjalo le ka bohlokwa bja gago mahlong a Modimo, ga bo fokotšwe ke go se phethagale