Kgaolo 13

Nka Kgaotša Bjang go Nyama Kudu?

“Nako le nako ge bagwera ba ka ba sa kgone go lebeletšana le mathata a bona, ke ba thuša go a rarolla le go dira gore ba ikwe ba le kaone. Eupša ka morago ga moo ke ya gae ka tsena ka phapošing ya ka ka lla, gomme se se tsebja ke batho ba sego kae feela.”—Kellie.

“Ge ke nyamile, ke ipea lekatana. Ge e ba ke laletšwa felo tsoko, ke nyaka lebaka la go se ye moo. Ke na le bokgoni bja go fihlela ba lapa la gešo go nyama ga ka. Ba nagana gore ga ke na bothata.”—Rick.

NA O kile wa ba le dikgopolo tšeo di swanago le tša Kellie goba tša Rick? Ge e ba go le bjalo, o se ke wa kitimela go phetha ka gore o na le bothata. Therešo ke gore motho yo mongwe le yo mongwe o a nyama ka dinako tše dingwe. Gaešita le banna le basadi bao ba botegago ba ka Beibeleng ba ile ba nyama.—1 Samuele 1:6-8; Psalme 35:14.

 Ka dinako tše dingwe, o ka tseba lebaka leo ka lona o nyamilego; mola ka dinako tše dingwe o ka se le tsebe. Anna wa nywaga e 19 o re: “Ga go nyakege gore o be boemong bjo bošoro gore o nyame. Go nyama go ka fihla ka nako le ge e le efe, gaešita le ge bophelo bja gago bo se na mathata. Go a makatša, eupša go a direga!”

Go sa šetšwe gore go bakwa ke eng—goba gaešita le ge go sa bonagale go na le sebaki—o ka dira’ng ge o ikwa o nyamile kudu? Leka go dira se se latelago:

1. Bolela ka maikwelo a gago. Ge Jobo a be a le gare ga mathata, o itše: “Ke tla bolela ke šulafaletšwe moyeng!”—Jobo 10:1.

Kellie o re: “Kimologo yeo ke ekwago ka morago ga go bolela le motho yo mongwe e a makatša. Mafelelong motho yo mongwe o tseba seo ke lebeletšanego le sona. Go ba bjalo ka ge eka batho ba theoša thapo gomme ba nntšha ka moleteng—ke phološitšwe mafelelong!”

Tšhišinyo: Ka mo tlase, ngwala leina la mogwera yo o ka boledišanago le yena ge o ikwa o nyamile kudu.

․․․․․

2. Ngwala ka taba yeo. Ge go nyama go kgoma tsela yeo o lebelelago bophelo ka yona, gona o ka nyaka go leka go ngwala maikwelo a gago fase. Ka dinako tše dingwe, Dafida o be a ngwala ka maikwelo a go nyama kudu ga gagwe dipsalmeng tša gagwe tšeo di buduletšwego. (Psalme 6:6) Go ngwala ka maikwelo a bjalo go ka go thuša go “lota bohlale le tlhaologanyo.”—Diema 3:21.

Heather o re: “Go ngwala go nthuša go beakanya tsela e hlakahlakanego ya go nagana yeo e bakwago ke go nyama. Ge e ba o ka kgona go ngwala maikwelo a gago le go a kwešiša, gona maikwelo a go nyama a a fokotšega.”

Tšhišinyo: Diriša tšhate yeo e lego go letlakala 93 go go thuša go hwetša ditsela tše kaone tša go  lebeletšana ka katlego le maemo ao a gateletšago. Se se tla go thuša go fokotša maikwelo a go nyama.

3. Rapela ka taba yeo. Beibele e re ge e ba o rapela ka dilo tšeo di go tshwenyago, ‘khutšo ya Modimo yeo e fetago kwešišo yohle ya batho e tla diša pelo ya gago le matla a gago a monagano.’—Bafilipi 4:6, 7.

Esther o re: “Ke be ke leka go hwetša lebaka leo ka lona ke bego ke ikwa ke nyamile kudu, eupša ga se ka le hwetša. Ke ile ka kgopela Jehofa gore a nthuše gore ke thabe. Ke be ke lapišitšwe ke go nyama ntle le lebaka. Mafelelong ke ile ka kgaotša go nyama. O se ke wa tšeela fase matla a thapelo!”

Tšhišinyo: Diriša Psalme 139:23, 24 e le mohlala wa thapelo ya gago go Jehofa. Tšhollela pelo ya gago go yena, gomme o mo kgopele gore a go thuše go tseba lebaka la go nyama ga gago.

Go tlaleletša ditšhišinyong tšeo di boletšwego ka mo godimo, o na le thušo ya bohlokwa e lego Lentšu la Modimo, Beibele. Go tlatša monagano wa gago ka dikgopolo tše di agago tšeo di ka hwetšwago dipegong tša Beibele go ka ba le mafelelo a mabotse maikwelong a gago. (Psalme 1:1-3) Ditšhišinyo tša go bala Beibele ka tsela e agago di ka hwetšwa ka go ahlaahla karolo yeo e rego, “Mohlala” yeo e hwetšwago dibolumong tša puku ye. Go letlakala 227 la Bolumo 2, o tla bona le kamoo moapostola Paulo a ilego a lebeletšana ka katlego le maikwelo a fošagetšego ao a bego a eba le wona ka dinako tše dingwe ka baka la go se phethagale ga gagwe.

Ge go Nyama go sa Fele

Ryan o re: “Mesong e mengwe ke nagana gore go be go tla ba kaone  go se tsoge e le gore ke pheme go lebeletšana le letšatši le lengwe gape leo le se nago morero.” Ryan o na le kgateletšego e tseneletšego ya monagano gomme ga se yena a nnoši. Dinyakišišo di šišinya gore mo e ka bago mofsa o tee go ba bane o ba le mohuta o itšego wa kgateletšego ya monagano pele e ka ba motho yo mogolo.

O ka tseba bjang gore o na le kgateletšego ya monagano? Maswao a mangwe a akaretša go fetoga kudu ga maikwelo le boitshwaro, go ipea lekatana, go felelwa ke kgahlego moo e ka bago medirong ka moka, go fetoga mo go lemogegago ga mekgwa ya go ja le ya go robala le maikwelo a tseneletšego a go se be le mohola goba go ikwa o le molato go sa nyakege.

 Ke therešo gore ka dinako tše dingwe mo e ka bago motho yo mongwe le yo mongwe o na le leswao letee goba a mantši go ao go boletšwego ka wona. Eupša ge e ba maswao ao a tšwela pele a le gona ka dibeke tše mmalwa, ke ka baka la’ng o sa boledišane le batswadi ba gago gore o ye ngakeng? Ngaka e ka go thuša go bona ge e ba go nyama ga gago go nyaka kalafo. *

Ge e ba o na le kgateletšego e tseneletšego ya monagano, seo ga se sa swanela go go leša dihlong. Ka go hwetša kalafo, balwetši ba bantši ba ile ba thoma go ikwa ba le kaone—mohlomongwe ka tsela e kaone go feta kamoo ba ilego ba ikwa ka gona ka morago ga nako e telele! Go sa šetšwe gore go nyama ga gago go bakwa ke kgateletšego ya monagano goba go se bjalo, gopola mantšu a kgothatšago a Psalme 34:18 ao a rego: “Jehofa o kgauswi le ba dipelo tše di robegilego; o phološa ba meoya e nyamilego o šoro.”

KGAOLONG YA RENA YEO E LATELAGO

Go thwe’ng ge e ba go nyama ga gago go go gateletša kudu moo o ilego wa nagana ka go ipolaya?

[Mongwalo wa tlase]

LENGWALO LA BOHLOKWA

“Jehofa o kgauswi le ba dipelo tše di robegilego; o phološa ba meoya e nyamilego o šoro.”—Psalme 34:18.

KELETŠO

Hlalosa kamoo o ikwago ka gona ge o nyamile le seo o naganago gore e ka ba e le modu wa go nyama ga gago. Ka morago ga kgwedi, bala seo o se ngwadilego. Na maikwelo a gago ka taba yeo a fetogile? Ge e ba go le bjalo, ngwala selo seo se ilego sa go thuša.

NA O BE O TSEBA . . . ?

Go lokile go lla, gaešita le ge o le mošemane. Lebakeng le lengwe bophelong bja gagwe, Kgoši Dafida o ile a dumela ka gore: “Bošego bolao bja ka le mosamelo di tlala megokgo.”—Psalme 6:6, Contemporary English Version.

KGATO YEO KE TLAGO GO E TŠEA!

E le gore ke ikwe ke le kaone, nka dira dilo tše di latelago: ․․․․․

Go tlwaelana le bagwera bao ba latelago go tla nthuša go fokotša go nyama: ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Na go lla go na le mehola?

● Go ba gare ga batho ba bangwe go tla go thuša bjang go lebeletšana le go nyama?

[Ntlhakgolo go letlakala 96]

“Ge ke nyamile, ke swanetše go phema go ipea lekatana. Ee, nka nyaka go ba nnoši gore ke naganišiše ka maikwelo a ka mohlomongwe le go lla. Eupša ka morago ga moo, ke a tseba gore ke swanetše go ba gare ga batho e le gore nka kgaotša go nagana ka selo le ge e le sefe seo se bego se nnyamiša.”—Christine

 [Chart/​Pictures on page 93]

Letlakala la Dipotšišo

Go Okobatša go Nyama ga Gago Tlatša tšhate ye

Tiragalo Go se Arabele Gabotse Go Arabela Kaone

Morutiši o ntira gore → Ke kgaotša go leka → Go go thuša: Bona Kgaolo 20

ke ikwe ke se na mohola go atlega ka ka pukung ye

klaseng yeo

Mogwera wa ka o a ntlhokomologa → Ke phatlalatša mabarebare → Go go thuša: Bona Kgaolo 10

a fošagetšego go Bolumo 2

ka motho yoo

Batswadi ba ka → Ke bolokela motswadi → Go go thuša: Bona Kgaolo 4

ba a hlalana goba batswadi ka pukung ye

ba ka sekgopi

․․․․․ → ․․․․․ → ․․․․․

․․․․․ → ․․․․․ → ․․․․․

[Seswantšho go letlakala 95]

Ka thušo le maiteko, o ka tšwa ka gare ga molete o išago wa go nyama