Chapter 23

Nka Hlalosa Bjang Pono ya Beibele ka Bosodoma?

Batho ba goa ka lethabo moletlong woo go abjago difoka ge dinaletšana tše pedi tša basadi tšeo di tumilego tša difilimi di dumedišana ka go atlana ka tsela e bontšhago gore di a ratana! Babogedi ba a makala ke moka ba thekga seo ka lethabo. Basodoma ba lebelela se e le phenyo. Baswaya-diphošo ba re ke pontšho ya bompogeng. Bidio yeo ya go atlana e tla gašwa leboelela ditabeng tša thelebišene matša-tšing a tlago e bile go tla bolelwa ka yona kudu Inthaneteng.

KA GE go bontšhitšwe tiragalong yeo e lego ka mo godimo, ke ditiragalo tše sego kae feela tšeo di tsošago kgahlego mekerong ya ditaba go feta ge motho yo a tumilego a bolela gore ke monna yo a ratanago le banna, ke mosadi yo a ratanago le basadi goba gore ke motho yo a ratanago le banna le basadi. Batho ba bangwe ba reta  batho ba bjalo ka baka la sebete sa bona; mola ba bangwe ba ba nyatša ka baka la mekgwa ya bona e gobogilego. Magareng ga dipono tše tše pedi, batho ba bantši ba lebelela bosodoma e fo ba go kgetha go phela ka tsela e fapanego. Daniel wa nywaga e 21 o re: “Ge ke be ke sa le sekolong, le bana bao e bego e se basodoma ba be ba nagana gore ge e ba o be o na le bothata ka taba ya bosodoma, gona o be o na le kgethollo e bile o ahlola ba bangwe.”

Boemo bja kgopolo bja mabapi le bosodoma bo ka fapana go tloga molokong o mongwe go ya go o mongwe goba go ya ka dinaga. Eupša Bakriste ga ba ‘išwe kua le kua ke phefo e nngwe le e nngwe ya thuto.’ (Baefeso 4:14) Go e na le moo, ba kgomarela pono ya Beibele.

Pono ya Beibele ke efe ka bosodoma? Le gona ge e ba o phela ka ditekanyetšo tša Beibele tša boitshwaro, o ka araba bjang bao ba bolelago gore o na le kgethollo, o yo a ahlolago batho goba gaešita le gore o hloile basodoma? Ela hloko dipotšišo tše di latelago goba mantšu le ditsela tšeo o ka arabago ka tšona.

“Beibele e re’ng ka bosodoma?”

“Beibele e bolela ka mo go kwagalago gore Modimo o rerile gore thobalano e thabelwe feela ke monna le mosadi bao ba nyalanego. (Genesi 1:27, 28; Lefitiko 18:22; Diema 5:18, 19) Ge Beibele e ganetša bootswa, e bolela ka boitshwaro bjo bo gobogilego bja motho yo e lego mosodoma le bja yo e sego mosodoma.” *—Bagalatia 5:19-21.

“Pono ya gago ke efe ka bosodoma?”

“Ga se ka hloya basodoma, eupša nka se amogele boitshwaro bja bona.”

Gopola se: Ge e ba o hlahlwa  ke ditekanyetšo tša Beibele tša boitshwaro, gona seo ke kgetho ya gago ya bophelo, e bile o na le tshwanelo ya go e kgomarela. (Joshua 24:15) O se ke wa hlabja ke dihlong ka baka la pono ya gago.—Psalme 119:46.

“Na Bakriste ga se ba swanela go hlompha batho ba mehuta yohle, go sa šetšwe gore ba kgetha go ba ba bong bofe?”

“Ruri go bjalo. Beibele e re: ‘Godišang batho ba mehuta ka moka’ goba go etša ge Today’s English Version e fetolela temana ye ka gore, ‘Hlomphang batho ka moka.’ (1 Petro 2:17) Ka gona, Bakriste ga se ba hloya basodoma. Ba bontšha botho go batho ka moka, go akaretša le bao e lego basodoma.”—Mateo 7:12.

“Na pono ya gago ka bosodoma ga e kgothaletše go kgetholla banna bao ba ratanago le banna le basadi bao ba ratanago le basadi?”

“Le gatee. Ke hloile boitshwaro bja bosodoma, e sego batho.”

O ka oketša ka gore: “Ka mohlala, e bile ke kgetha go se kgoge. Ge e le gabotse, ke hwetša mokgwa wo e le o šišimišago. Eupša a re re wena o a kgoga gomme o ikwa ka tsela e fapanego. Nka se go kgetholle ka baka la pono ya gago ka go kgoga, go fo swana le ge ke kgodišegile gore o ka se nkgetholle ka pono ya ka ka go se kgoge—na ke nepile? Taba e swanago e šoma le diponong tša rena tše di sa swanego ka bosodoma.”

“Na Jesu ga se a ruta gore re  amogele batho ba bangwe? Ge e ba go le bjalo, na Bakriste ga se ba swanela go fo amogela bosodoma?”

“Jesu ga se a kgothaletša balatedi ba gagwe go amogela tsela e nngwe le e nngwe ya go phela. Go e na le moo, o rutile gore tsela e lebišago phologong e bulegetše ‘yo mongwe le yo mongwe yo a dumelago go yena.’ (Johane 3:16) Go dumela go Jesu go akaretša go latela ditekanyetšo tša Modimo tša boitshwaro tšeo di iletšago mehuta e itšego ya boitshwaro—go akaretša le bosodoma.”—Baroma 1:26, 27.

“Basodoma ba ka se fetoše dikganyogo tša bona; ba belegwe ba le bjalo.”

“Beibele ga e bolele selo mabapi le tsela yeo basodoma ba bopegilego ka yona, le ge e dumela gore mekgwa e mengwe ke yeo e tsemilego medu mothong. (2 Bakorinthe 10:4, 5) Beibele e botša Bakriste go phema ditiro tša bosodoma gaešita le ge ba bangwe ba na le tshekamelo ya go kgahlegela batho ba bong bjo bo swanago le bja bona.”

Tšhišinyo: Go e na le go nwelela dingangišanong tša seo se bakago dikganyogo tša bosodoma, gatelela gore Beibele e iletša boitshwaro bja bosodoma. O ka dira papišo ka gore: “O a tseba batho ba bantši ba re ge e ba motho e le yo šoro ke ka baka la leabela. (Diema 29:22) Go thwe’ng ge e ba seo e be e le therešo? Ka ge o ka ba o tseba, Beibele e iletša go galefa. (Psalme 37:8; Baefeso 4:31) Na molao woo ga se wa loka feela ka baka la gore batho ba bangwe ba ka ba ba rata bošoro?”

“Modimo a ka botša bjang motho yo a kgahlegelago batho ba bong bjo bo swanago le bja gagwe go ila bosodoma? Seo ke go ba sehlogo.”

 “Go bea mabaka mo go bjalo go theilwe ponong e fošagetšego ya gore batho ba swanetše go latela maikwelo a bona a thobalano. Beibele e nea batho seriti ka go ba kgonthišetša gore ba ka kgetha go se kgotsofatše dikganyogo tša bona tšeo di sa swanelago tša thobalano ge e ba ba tloga ba nyaka go dira bjalo.”—Bakolose 3:5.

“Gaešita le ge o se monna yo a ratanago le banna goba mosadi yo a ratanago le basadi, o swanetše go fetoša tsela yeo o lebelelago bosodoma ka yona.”

“A re re ga ke rate go petšha eupša wena o a go rata. Na e be  e tla ba mo go kwagalago go nkgapeletša gore ke fetoše pono ya ka, feela ka gobane batho ba dimilione ba kgetha go petšha?”

Gopola se: Basodoma go akaretša le batho ba bantši ba na le ditekanyetšo tša boitshwaro tšeo di dirago gore ba hloye dilo tše itšego—mohlomongwe bomenetša, go hloka toka goba ntwa. Beibele e ganetša boitshwaro bjo bjalo; e bile e ganetša mehuta e itšego ya boitshwaro bja tša botona le botshadi go akaretša le bosodoma.—1 Bakorinthe 6:9, 10.

Ga se gore Beibele ga e na tekatekano goba gore e kgothaletša kgethollo. E fo ba e laela bao ba nago le dikganyogo tša bosodoma gore ba dire se se swanago le seo se letetšwego go bao ba kgahlegelago batho ba bong bjo bo sa swanego le bja bona, gore ba ‘tšhabe bootswa.’—1 Bakorinthe 6:18.

Ge e le gabotse, dimilione tša batho ba e sego basodoma bao ba ratago go latela ditekanyetšo tša Beibele ba bontšha boitshwaro go sa šetšwe diteko le ge e le dife tšeo ba ka lebeletšanago le tšona. Palo ya bona e akaretša bontši bja bao ba sego lenyalong le bao go nago le kgonagalo e kgolo ya gore ba se tsene lenyalong gotee le ba bantši bao ba nyalanego le balekane ba golofetšego bao ditho tša bona tša pelego di sa šomego tabeng ya thobalano. Ba kgona go phela ba thabile ntle le go kgotsofatša dikganyogo tša bona tša thobalano. Bao ba nago le dikganyogo tša bosodoma ba ka dira se se swanago ge e ba ba tloga ba nyaka go kgahliša Modimo.—Doiteronomio 30:19.

BALA KA MO GO OKETŠEGILEGO MABAPI LE TABA YE GO BOLUMO 2, KGAOLO 28

KGAOLONG YA RENA YEO E LATELAGO

Banenyana ba bangwe ba nagana gore go robala le masogana a bona go tla matlafatša tswalano ya bona le ona. Ga go bonagale go le bjalo! Ithute gore ke ka baka la eng go se bjalo.

[Mongwalo wa tlase]

LENGWALO LA BOHLOKWA

“Ka gona bolayang mekgwa ya lefase yeo e lego dithong tša mebele ya lena, e lego bootswa, go se hlweke, kganyogo e fošagetšego ya go robala ga monna le mosadi, kganyogo e gobatšago le megabaru, e lego borapedi bja medimo ya diswantšho.”—Bakolose 3:5.

KELETŠO

Le ge boitshwaro bja batho ba bangwe bo ka go tshwenya, phema go itira moloki. Therešo ke gore ba na le tokologo ya go ikgethela seo ba nyakago go se dumela—go etša ge le wena o na le yona.

NA O BE O TSEBA . . . ?

Bakriste ba bangwe ba lekgolong la pele la nywaga bao ba bego ba dira ditiro tša bosodoma nakong e fetilego ba ile ba kgona go fetoša ditsela tša bona tše di sa hlwekago gomme ba ‘hlatswiwa ba hlweka’ mahlong a Modimo.—1 Bakorinthe 6:9-11.

KGATO YEO KE TLAGO GO E TŠEA!

Ge motho yo mongwe a re pono ya Beibele ka bosodoma e šiilwe ke nako, ke tla re ․․․․․

Go dira gore ke kwagale gore ga ke amogele boitshwaro bja bosodoma, e sego batho ka bobona, ke tla re ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng Modimo a na le tshwanelo ya go beela batho melao ya boitshwaro?

● O holega bjang ka go kgomarela melao ya Beibele ya boitshwaro?

[Ntlhakgolo go letlakala 170]

“Mošemane yo mongwe sekolong o be a nagana gore ke be ke le sehlogo ka baka la ge ke sa rate tsela yeo a bego a phela ka yona. Eupša ge ke be ke mo hlalosetša gore ke be ke se ka mo hloya—gomme ge a lemoga gore ke be ke se ka hloya feela bosodoma eupša ke hloile le mehuta yohle ya boitshwaro bjo bo gobogilego—o ile a thoma go ntlhompha e bile a nkemelela ge batho ba bangwe ba be ba nkganetša.”—Aubrey

 [Lepokisi go letlakala 168]

Go Thwe’ng ka go Ratana le Bašemane le Banenyana?

Gaešita le ge mokgwa wo o hwetšagala bobedi go bašemane le banenyana, go bonagala o atile kudu go banenyana. Go ba bangwe e fo ba taba ya go kganyoga go tseba. Lisa wa nywaga e 26 o re: “Ge bafsa ba bogela difilimi le thelebišene gotee le go theetša mmino woo o kgothaletšago banenyana go atlana, ba tla lekega go dira seo—kudukudu ge ba sa nagane gore seo se fošagetše.”

Go ba bangwe go bonagala e le go kgahlegelana ga kgonthe. Vicky wa nywaga e 13 o re: “Moletlong o mongwe ke ile ka gahlana le banenyana ba babedi bao ba ratanago le bašemane le banenyana, gomme ka morago ke ile ka kwa ka mogwera wa ka gore ba be ba nthata. Mafelelong ke ile ka thoma go romela yo mongwe wa banenyana bao melaetša ka mogalathekeng gomme ka thoma go mo rata.”

Na o kile wa ikwa ka tsela yeo Vicky a bego a ikwa ka yona? Batho ba bantši ba tla go kgothaletša gore o fo amogela seo o lego sona le gore o ipolele gore o rata bobedi bašemane le banenyana. Lega go le bjalo, o swanetše go lemoga gore go kgahlegela motho wa bong bjo bo swanago le bja gago gantši e fo ba mogato o fetago. Se ke seo Vicky a se lemogilego. Lisette wa nywaga e 16 le yena o lemogile se se swanago. O re: “Go boledišana le batswadi ba ka ka maikwelo a ka go dirile gore ke ikwe ke le kaone. Le gona dithutong tša ka tša sekolong tša thutaphedi (Biology), ke ile ka ithuta gore nakong ya nywaga ya mahlalagadi, dihomoune di ka fetofetoga kudu. Ke tloga ke nagana gore ge e ba bafsa ba be ba tseba ka mo go oketšegilego ka mebele ya bona, ba be ba tla kwešiša gore go kgahlegela batho ba bong bjo bo swanago e ka ba selo sa nakwana, e bile ba ka se ikwe ba gapeletšega gore e be basodoma.”

Gaešita le ge maikwelo a gago a ka bonagala a tsemile medu go feta go ba ao a iphetelago, hlokomela gore Beibele e go nea pakane yeo o ka e fihlelelago: O ka kgetha gore o se latele dikganyogo tše di fošagetšego, go sa šetšwe gore ke dife.

[Seswantšho go letlakala 169]

Ge go tliwa tabeng yeo batho ba bantši ba naganago gore e nepagetše, Bakriste ba na le sebete sa go fapana le lešaba