Kgaolo 32

Nka Itšhireletša Bjang Bathong Bao ba Gobošago ba Bangwe ka Thobalano?

Batho ba dimilione ba a katwa ngwaga le ngwaga goba ge e ba go se bjalo ba gobošwa ka thobalano, e bile nyakišišo e nngwe e bontšha gore bafsa ke bahlaselwa ba bagolo. Ka mohlala, go akanyetšwa gore kua United States, mo e ka bago seripagare sa batho ka moka bao ba ilego ba katwa ba ka tlase ga nywaga e 18. Ka baka la go ata ga go gobošwa, ke gabohlokwa gore o ahlaahle taba ye.

“Lesogana le lengwe le ile la ntshwara ke moka la ntahlela fase pele nka tseba seo se diregago. Ke ile ka leka sohle seo ke bego nka se kgona go le lwantšha. Ka re ke le gaša mahlong ka seela se se nago le pherefere, eupša la se kgaphela thoko. Ke ile ka leka go goeletša, eupša gwa se thuše selo. Ka le kgorometša, ka le raga, ka le itia le go le ngwapa. Ke moo ke ilego ka kwa thipa e ntsena nameng. Ke ile ka felelwa ke matla.”—Annette.

BATHO bao ba gobošago ba bangwe ka thobalano ba atile lehono, e bile gantši bafsa ke bona bao ba hlaselwago kudu. Bafsa ba bangwe, go etša Annette, ba hlaselwa ke batho bao ba sa ba tsebego. Ba bangwe ba hlaselwa ke baagišani. Seo se ile sa diragalela Natalie yo a bego a na le nywaga e 10 feela ge a be a gobošwa ka thobalano ke mofsa yo a lego mahlalagading yo a bego a dula kgauswi le gagabo. O re: “Ke be ke tšhogile kudu e bile ke lewa ke dihlong moo mathomong ke ilego ka se botše motho.”

Bafsa ba bantši ba ile ba gobošwa ka thobalano ke setho sa lapa. Mosadi yo a bitšwago Carmen o re: “Ge ke be ke na le nywaga e mehlano go ya go e 12, ke ile ka gobošwa ka thobalano ke  tate. Mafelelong ke ile ka mmotša ka seo ge ke be ke na le nywaga e 20. O ile a re o kgopela tshwarelo, eupša ka morago ga dikgwedi tše sego kae, a re ke mo tšwele motse.”

Go gobošwa ka thobalano ke moagišani, mogwera goba setho sa lapa go iphile matla ka tsela e boifišago lehono. * Eupša go swarwa gampe ga bafsa ga se selo se sefsa. Boitshwaro bjo bjalo bjo bo šišimišago bo be bo dirwa le mehleng ya ge Beibele e be e ngwalwa. (Joele 3:3; Mateo 2:16) Lehono re phela dinakong tše di hlobaetšago. Batho ba bantši ga ba na “lerato la tlhago,” le gona go tlwaelegile gore banenyana (gaešita le bašemane) ba gobošwe ka thobalano. (2 Timotheo 3:1-3) Gaešita le ge go se na megato e kgonthišeditšwego ya gore o dule o šireletšegile, go na le mo gontši mo o ka go dirago gore o itšhireletše. Ela hloko dikeletšo tše di latelago:

Ntšha mahlo dinameng. Ge o sepela ka ntle, tseba seo se diregago ka pele ga gago, ka morago le ka mathoko a mabedi. Mafelo a mangwe a tsebega ka go ba kotsi, kudukudu bošego. Leka ka mo go ka kgonegago go phema mafelo ao goba bonyenyane o kgonthišetše gore ga o sepele o nnoši.—Diema 27:12.

O se ke wa nea batho kgopolo e fošagetšego. Phema go bapala ka lerato goba go apara ka tsela yeo e tsošago kganyogo ya thobalano. Ditiro tše bjalo di ka fetišetša molaetša wa gore o nyaka go ba le thobalano—goba mohlomongwe gore o ka se gane go ba le yona.—1 Timotheo 2:9, 10.

Boledišanang ka mellwane. Ge e ba o beana mabaka, boledišana le motho yo o beanago mabaka le yena gore ke boitshwaro bofe bjo bo swanetšego le gore ke bofe bjo bo sa swanelago. * Ge o beile mellwane, o se ke wa ipea maemong ao a ka go beago kotsing ya gore o gobošwe.—Diema 13:10.

O se ke wa tšhaba go bolela. Ga go na phošo go bolela ka go tia gore: “O se ke wa ba wa leka go dira seo!” goba gore, “Ntlogele!” O se ke wa dikadika go dira bjalo o tšhaba gore o tla lahlegelwa  ke lesogana la gago. Ge e ba le ka go tlogela ka baka la se, go ra gore ga se la go swanela! Go feta moo, wena o swanelwa ke monna wa makgonthe, yo a hlomphago mmele wa gago le ditekanyetšo tša gago. *

Eba šedi ge o diriša Inthanete. O se ke wa nea motho le ge e le ofe boitsebišo bja gago goba wa tsenya dinepe tšeo di bontšhago gore o dula kae. * Ge o ka amogela molaetša wo o gobogilego wa thobalano, gantši selo se se kaonekaone seo o ka se dirago ke go se o arabe. Go se arabe melaetša e bjalo go dira gore bontši bja batho  bao ba gobošago ba bangwe ka thobalano Inthaneteng ba felelwe ke matla.

Megato yeo e fetilego e ka dira gore o se ke wa hlaselega gabonolo. (Diema 22:3) Lega go le bjalo, therešo ke gore ga se ka mehla o ka kgonago go laola maemo a gago ka mo go feletšego. Ka mohlala, ga se ka mehla o ka dulago o na le motho yo o sepelago le yena goba go phema mafelo a kotsi. Le gona o ka ba o dula tikologong e kotsi.

Mohlomongwe o tseba go tšwa phihlelong e bohloko gore dilo tše mpe di ka direga go sa šetšwe maiteko a gago a go phema kotsi. Go swana le Annette yo a tsopotšwego mathomong a kgaolo ye, o ka ba o ile wa swarwa o sa itebetše gomme wa fenywa. Goba go etša Carmen, o ka ba o ile wa gobošwa ge o be o sa le ngwana, ka go re’alo wa se be le matla a go laola boemo bjoo—goba gaešita le go kwešiša ka botlalo seo se bego se direga. O ka lebeletšana bjang le go ipona molato moo gantši go tlaišago bao ba kilego ba gobošwa ka thobalano?

Go Lebeletšana ka Katlego le go Ipona Molato

Annette o sa dutše a lwantšhana le maikwelo a go ipona molato ka seo se diragetšego. O re: “Ke nna lenaba la ka le legologolo. Ke dula ke nagana ka tiragalo ya bošegong bjoo leboelela. Ke ikwa eka nkabe ke ile ka leka ka matla go lwantšha lesogana leo. Taba ke gore, ka morago ga gore le ntlhabe  ka thipa, ke ile ka se šikinyege ka baka la letšhogo. Ga se ka ka ka kgona go dira selo le ge e le sefe se sengwe, eupša ke ikwa eka nkabe ke ile ka se dira.”

Natalie le yena o lwantšhana le maikwelo a go ipona molato. O re: “Nkabe ke ile ka se bote motho kudu gakaakaa. Batswadi ba ka ba be ba beile molao wa gore nna le ngwanešo re dule re le gotee ge re bapala ka ntle, eupša ga se ka ba theetša. Ka gona ke nagana gore ke ile ka nea moagišani wa rena sebaka sa gore a nkgoboše. Seo se diragetšego se kgomile ba lapa lešo, gomme ke ikwa ke ikarabela ka go ba bakela bohloko bjo bogolo ka tsela ye. Ke tshwenywa kudu ke seo.”

Ge e ba maikwelo a gago a swana le a Annette goba Natalie, o ka lebeletšana bjang le go ipona molato? Sa pele, leka go dula o nagana ka taba ya gore ge e ba o ile wa katwa, o be o sa rate seo. Batho ba bangwe ba tšea taba ye gabohwefo, ba fahlela ka gore “seo e fo ba e le mokgwa wa bašemane” le gore batho bao ba ilego ba katwa ba be ba nyaka seo. Eupša ga go na motho yo a swanelwago ke go katwa. Ge e ba o kile wa ba mohlaselwa wa tiro e bjalo e kgopo, molato ga se wa gago!

Ke therešo gore go bonolo go bala mantšu a rego, “molato ga se wa gago”; eupša go a dumela go ka ba thata kudu. Ba bangwe ga ba botše motho ka seo se diragetšego gomme ba tlaišwa ke go ikwa ba le molato le maikwelo a mangwe a fošagetšego. Lega go le bjalo, ke mang yo a holegago kudu ge e ba o sa bolele—na ke wena goba ke mogoboši wa gago? O tla ba o ikhola ge o ka dira se se fetago go fo homola.

Go Bolela ka Seo se go Diragaletšego

Beibele e re botša gore ge Jobo monna wa go loka a be a le tlalelong e kgolo o ile a re: “Ke tla ntšha matshwenyego a ka ka nna.  Ke tla bolela ke šulafaletšwe moyeng!” (Jobo 10:1) Le wena o tla holwa ke go dira se se swanago. Go ntšhetša motho yo o mmotago sa mafahleng ka seo se diragetšego, go ka go thuša ge nako e dutše e eya gore o kgone go amogela go katwa ga gago gomme o imologe maikwelong a gago ao a go gateletšago.

Ge e le gabotse, ge e ba o le Mokriste, go bohlokwa gore o bolele le mogolo wa phuthego ka seo se diragetšego. Mantšu a homotšago a modiši yo lerato a ka go kgonthišetša gore ka ge o le mohlaselwa wa go katwa, ga se wa šilafatšwa ke sebe sa motho yo mongwe. Seo ke se Annette a se hweditšego. O re: “Ke ile ka boledišana le mogwera wa ka wa paala, gomme a nkgothaletša gore ke bolele le bagolo ba mmalwa ba Bakriste ka phuthegong ya gešo. Ke leboga gore ke ile ka dira bjalo. Ba ile  ba dula fase le nna ka makga a mmalwa gomme ba mpotša seo ke bego ke tloga ke nyaka go se kwa, ba re seo se diragetšego ga se molato wa ka. E tloga e se molato wa ka e le ruri.”

Go bolela ka seo se diragetšego le go hlalosa maikwelo a gago go ka go thuša gore o se ke wa dula o galefile goba wa boloka sekgopi. (Psalme 37:8) Le gona go ka go thuša gore o imologe, mohlomongwe ka lekga la mathomo ka morago ga nywaga e mentši. Natalie o ile a hwetša gore seo ke therešo ka morago ga gore a botše batswadi ba gagwe ka go gobošwa ga gagwe. O re: “Ba ile ba nthekga. Ba nkgothaletša gore ke bolele ka seo, gomme seo se nthušitše gore ke se ke ka nyama kudu le go galefa ka gare.” Natalie gape o ile a homotšwa ke go rapela. O re: “Go boledišana le Modimo go nthušitše, kudukudu ka dinako tšeo ke bego ke ikwa gore ga ke kgone go botša motho yo mongwe ka seo. Ge ke rapela, ke kgona go bolela ka bolokologi. Seo se dira gore ke ikwe ke na le khutšo ya kgonthe e bile ke išitše maswafo fase.” *

Le wena o ka hwetša gore go na le “nako ya go alafa.” (Mmoledi 3:3) Ithekge ka bagwera ba lerato bao ba etšago bagolo bao ba hlaloswago ba swana le “lefelo la go tšhabela phefo le lefelo la go utela ledimo.” (Jesaya 32:2) Itlhokomele mmeleng le maikwelong. Khutša ka mo go lekanego. Le gona go feta tšohle, ithekge ka Jehofa Modimo wa khomotšo yohle, yoo kgauswinyane a tlago go tliša lefase le lefsa leo go lona ‘badirabobe ba tlago go fedišwa, eupša bao ba holofetšego Jehofa e tlago go ba beng ba lefase.’—Psalme 37:9.

[Mengwalo ya tlase]

 LENGWALO LA BOHLOKWA

“Mehleng ya bofelo go tla ba le dinako tše di hlobaetšago tšeo go lego thata go lebeletšana le tšona. Gobane batho e tla ba baithati, . . . ba ba se nago lerato la tlhago, . . . ba se nago boitshwaro, ba bogale, ba go se rate go loka.”—2 Timotheo 3:1-3.

KELETŠO

Ge e ba o kile wa gobošwa ka thobalano, eba le lelokelelo la mangwalo ao a ka go homotšago. Mangwalo ao a ka akaretša Psalme 37:28; 46:1; 118:5-9; Diema 17:17; le Bafilipi 4:6, 7.

NA O BE O TSEBA . . . 

Kua United States, bana ba ka godimo ga 90 lekgolong ba tseba batho bao ba ba gobošago ka thobalano.

KGATO YEO KE TLAGO GO E TŠEA!

Ge ke ipona molato ka seo se diragetšego, ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Mehola ya go botša ba bangwe ka go gobošwa ga gago ke efe?

● Go ka direga’ng ka wena le ba bangwe ge e ba o sa botše motho?

[Ntlhakgolo go letlakala 232]

“Go thata kudu go botša ba bangwe ka go gobošwa ga gago, eupša seo ke selo se se kaonekaone seo o ka se dirago. Go botša ba bangwe go go thuša gore o lebale ka go nyama le go galefa ga gago gomme go dira gore o boele o be le matla.”​—Natalie

[Lepokisi go letlakala 230]

“Ge e ba o Nthata . . . ”

Batho ba bangwe bao ba gobošago ba bangwe ka thobalano ga ba gapeletše banenyana eupša ba a ba foraforetša. Bjang? Ka go bolela mantšu a bjalo ka gore, “Batho ka moka ba ba le thobalano,” “Go ka se tsoge go tsebile motho,” goba go etša ge go boletšwe go Kgaolo 24 ka pukung ye, “Ge e ba o nthata, o tla dira se.” O se ke wa forwa ke mošemane yo a lekago go go kgodiša gore ge e ba o mo rata o swanetše go robala le yena. Taba ke gore motho le ge e le ofe yo a naganago ka tsela yeo o fo ba a nyaka go ikgotsofatša. Ga a go naganele goba go naganela bophelo bja gago. Go fapana le seo, monna wa makgonthe o tla etiša dikgahlego tša gago pele ga tša gagwe gomme o tla bontšha gore o kgona go kgomarela ditekanyetšo tša Modimo tša boitshwaro. (1 Bakorinthe 10:24) Monna wa makgonthe a ka se sware banenyana bjalo ka ge eka ba diretšwe thobalano feela. Go e na le moo, o tla lebelela “basadi ba bafsa bjalo ka dikgaetšedi ka tshekego yohle.”—1 Timotheo 5:1, 2.

[Seswantšho go letlakala 233]

Maikwelo ao o šalago o na le ona ka baka la go gobošwa a boima kudu gore o ka a rwala o nnoši. Ke ka baka la’ng o sa hwetše thušo ka go bolela le motho yo mongwe?