Kgaolo 31

Nka Lebeletšana Bjang le go Arogana ga Rena?

“Re be re dutše re beana mabaka ka dikgwedi tše tshela gomme re bile bagwera ka nywaga e mehlano. Ge lesogana la ka le be le nyaka gore re arogane, ga se la ka la kgona le go mpotša selo. Le ile la fo kgaotša go mpolediša. Ke ile ka ikwa ke se na mohola. Go nyama go be go nkgateleditše kudu. Ke ile ka dulela go ipotšiša gore: ‘Ke sentše’ng?’”—Rachel.

 GO AROGANA go ka senya boemo bja gago bja go ba yo a thabilego gomme boemo bjoo bja tšeelwa legato ke megokgo ya manyami. Ela hloko Jeff le Susan bao ba beanego mabaka ka nywaga e mebedi. Nakong yeo ka moka, lerato la bona le ile la gola. Jeff o be a romela Susan melaetša ya lerato mogalathekeng letšatši ka moka. Nako le nako Jeff o be a nea Susan dimpho go mmontšha gore o be a mo gopotše. Susan o re: “Jeff o be a dira boiteko bja go ntheetša e bile a nkwešiša. O be a dira gore ke ikwe ke le mmamoratwa.”

Go se go ye kae ke ge Jeff le Susan ba šetše ba bolela ka lenyalo le gore ba tla dula kae ge ba šetše ba nyalane. Le gona Jeff o be a le kgauswi le go kgopela Susan gore ba nyalane. Ke moka, gateetee Jeff o ile a kgaotša go ratana le Susan! Susan o be a hlakahlakane. O ile a fo tšwela pele ka mediro ya letšatši le letšatši, eupša o be a ikwa a hwile bogatšu ka go se kgolwe seo se diragetšego. O re: “Ke ile ka lapa kudu monaganong le mmeleng.” *

Lebaka Leo go Arogana go Lego Bohloko

Ge e ba o kile wa ba boemong bja go swana le bja Susan, o ka ba wa ipotšiša gore: ‘Na ke tla tsoga ke boetše sekeng?’ Kgateletšego ya gago e a kwešišega. Kgoši Solomone o ngwadile gore: “Lerato ke le matla bjalo ka lehu.” (Sefela sa Difela 8:6) Ka gona, go arogana le motho yo o ratanago le yena e ka ba e nngwe ya diphihlelo tše bohloko kudu tšeo o ka swanelwago ke go di kgotlelela. Ge e le gabotse, ba bangwe ba ile ba bolela gore karogano e swana le gore karolo ya gago e itšego e hwile. O ka ba wa ikhwetša o hlasetšwe ke tše dingwe tša dilo tše di latelago mohlomongwe le megato e mengwe ya go nyama:

Go gana. ‘Ga se gwa fela. Lesogana la ka le tla fetoša monagano wa lona ka morago ga letšatši letee goba a mabedi.’

 Go galefa. ‘A ka ntira seo bjang? Ga ke mo kwešiše!’

Kgateletšego. ‘Ga ke ratwe ke motho. Ga go na motho yo a tla tsogago a nthatile.’

Go amogela. ‘Ke tla boela sekeng. Go arogana ga rena go bohloko, eupša ke a kaonefala.’

Ditaba tše dibotse ke gore o ka fihla mogatong wa go amogela. Gore go tla feta nako e kaakang pele o fihla mogatong woo, go ithekgile ka dilo tše mmalwa tšeo di akaretšago gore tswalano ya lena e tšere nako e kaakang le gore e be e gotše go fihla bokgoleng bofe. Go sa dutše go le bjalo, o ka lebeletšana bjang le go robega pelo?

Go Gatela Pele

O ka ba o ile wa kwa batho ba bangwe ba re nako e fodiša dintho ka moka. Ge le sa tšwa go arogana, mantšu ao a ka fo se go hole ka selo. Seo ke ka gobane nako e fo ba e le karolo ya tharollo ya mathata. Ka mohlala: Ge nama ya gago e ka segwa ke selo, e tla fola ge nako e dutše e eya, eupša gona bjale go bohloko. O swanetše go dira gore madi a kgaotše go tšwa gomme o okobatše bohloko. Le gona o swanetše go boloka karolo yeo e gobetšego e se na ditšhila. Go a swana le ka go gobala maikwelong. Ga bjale go bohloko. Eupša go na le megato yeo o ka e gatago go  okobatša bohloko le go dira gore o se ke wa šilafatšwa ke go galefa. Go feta ga nako go tla kgatha tema ya gona, eupša wena o ka kgatha ya gago bjang? Leka se se latelago.

● Itumelele go lla. Ga se phošo go lla. Go ba gona, Beibele e re go na le “nako ya go lla” gaešita le “nako ya go golola.” (Mmoledi 3:1, 4) Go lla ga go bolele gore o a fokola. Ge a be a tlaletšwe maikwelong, gaešita le Dafida yo e bego e le mohlabani yo sebete, le yena o ile a dumela ka gore: “Bošego bjo bongwe le bjo bongwe bolao bja ka le mosamelo wa ka di tlala megokgo.”—Psalme 6:6, Today’s English Version.

● Hlokomela boemo bja gago bja tša maphelo. Go itšhidulla le go ja dijo tše di nago le phepo go tla go thuša go buša matla ao a go lahlegetšego ge o be o ekwa bohloko bja go arogana le motho yo o mo ratago. Beibele e re ‘go tlwaetša mmele go a hola.’—1 Timotheo 4:8.

Ke dikarolo dife tša boemo bja gago bja tša maphelo tšeo go ka nyakegago gore o šomele go tšona?

․․․․․

● Dula o swaregile. O se ke wa kgaotša go dira dilo tšeo o di ratago. Go oketša moo, gona bjale go feta le ge e le neng pele, o se ke wa ipea lekatana. (Diema 18:1) Go gwerana le batho bao ba nago le taba le wena go tla go nea selo se itšego se se agago seo o ka naganago ka sona.

Ke dipakane dife tšeo o ka ipeelago tšona e le gore o dule o swaregile?

․․․․․

● Rapela Modimo o mmotše maikwelo a gago. Se e ka ba tlhohlo. Ka morago ga go arogana le motho yo ba ratanago le yena, ba bangwe e bile ba ikwa eka ba radiilwe ke Modimo. Ba fahlela ka gore: ‘Ke rapetše gantšintši gore ke hwetše motho yo ke tlago go ratana le yena, bjale bona gore go diragetše’ng gona bjale!’ (Psalme 10:1) Eupša, na e be e tla ba mo go swanetšego go lebelela Modimo e le feela motho yo a kopanyago baratani a le legodimong? Le gatee; e bile ga se molato wa gagwe ge motho yo o ratanago le yena a se sa hlwa a nyaka go tšwetša pele tswalano ya lena. Seo re se tsebago ka Jehofa ke gore: ‘O a go hlokomela.’ (1 Petro 5:7) Ka gona mo tšhollele sa mafahleng ka thapelo. Beibele e re: “Tsebišang Modimo dikgopelo tša lena . . . ; ke moka khutšo ya Modimo yeo e fetago kwešišo yohle ya batho e tla diša dipelo tša lena le matla a lena a monagano ka Kriste Jesu.”—Bafilipi 4:6, 7.

Ke dilo dife ka go kgethega tšeo o ka di botšago Jehofa ka thapelo ge o dutše o katanela go lebeletšana le bohloko bja karogano?

․․․․․

 Go Lebelela Pele

Ka morago ga ge o bile le nako ya go fola, o tla dira gabotse gore o hlahlobišiše seo se ka bago se diregile tswalanong ya gago e fetilego. Ge o šetše o loketše go dira bjalo, o ka hwetša e le mo go thušago go ngwala kamoo o tlago go arabela ka gona dipotšišong tše di lego lepokising le le lego go letlakala 224 leo le rego, “Nka Ithuta’ng Karoganong?”

Ke therešo gore tswalano ya lerato yeo o bego o le go yona ga se ya feleletša ka tsela yeo o bego o e letetše. Eupša gopola se: Ge motho a le ka gare ga ledimo, go bonolo gore a lebiše tlhokomelo leratadimeng le leso le puleng yeo e tšhologago. Lega go le bjalo, mafelelong pula e a khula ke moka leratadima la apoga. Bafsa bao ba tsopotšwego pejana kgaolong ye ba hweditše gore ge nako e dutše e eya, ba ile ba kgona go gatela pele. Kgonthišega gore go ka ba bjalo le ka wena!

KGAOLONG YA RENA YEO E LATELAGO

O ka gata megato efe gore o itšhireletše bathong bao ba gobošago ba bangwe ka thobalano?

[Mongwalo wa tlase]

LENGWALO LA BOHLOKWA

“[Jehofa] o alafa ba dipelo tše di kwelego bohloko, o tlema dintho tša bona tše bohloko.”—Psalme 147:3.

KELETŠO

Susan yo go boletšwego ka yena mathomong a kgaolo ye, o ile a dira lelokelelo la mangwalo gomme a dula a a swere e le gore a ka a bala ge a ikwa a gateletšwe kudu ke maikwelo a gagwe. Mohlomongwe le wena o ka dira se se swanago ka a mangwe a mangwalo ao a bontšhitšwego kgaolong ye.

NA O BE O TSEBA . . . 

Bafsa ba bantši bao ba lego mahlalagading bao ba beanago mabaka ga ba feleletše ba nyalane, gomme bao ba feleletšago ba nyalane ba hlalana ka bontši.

 KGATO YEO KE TLAGO GO E TŠEA!

E le go nthuša gore ke gatele pele ka morago ga karogano, ke tla ․․․․․

Seo nka šomelago go sona e le gore ke tle ke be molekane yo kaone nakong e tlago ge ke beana mabaka ke ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke’ng seo o ithutilego sona ka wena tswalanong ya gago ya lerato ya nakong e fetilego?

● O ithutile’ng ka motho wa bong bjo bo fapanego le bja gago tswalanong yeo?

[Ntlhakgolo go letlakala 227]

“Go feta ga nako go dira gore o be le pono e botse kutšwanyana. Ka morago maikwelo a gago a ka se sa ba godimo, ka gona o ka kgona go nagana ka boemo bjoo ka kelohloko gomme wa lebala ka bjona. Le gona, o ka tseba mo go oketšegilego ka motho yoo o lego yena le seo o tlago go se nyaka go molekane gotee le seo o swanetšego go se šetša e le gore o pheme boemo bjo bo swanago nakong e tlago.”—Corrina

 [Lepokisi go letlakala 224]

Letlakala la Dipotšišo

Nka Ithuta’ng Karoganong?

Na o boditšwe gore ke ka baka la’ng le arogane? Ge e ba go le bjalo, ngwala lebaka leo ka mo tlase gaešita le ge o bona le sa kwagale. ․․․․․

O nagana gore ke mabaka afe a mangwe ao a ka bago a ile a akaretšwa? ․․․․․

Ge o gadima morago, na go na le seo nkabego o ile wa se dira seo se ka bego se ile sa fetoša ditlamorago tšeo di bilego gona? Ge e ba se le gona, ke’ng? ․․․․․

Na phihlelo ye e utolotše dikarolo le ge le dife tšeo o ka ratago go gola go tšona moyeng goba maikwelong? ․․․․․

Ke’ng seo o tlago go se dira ka tsela e fapanego tswalanong ya lerato e latelago, ge e ba se le gona? ․․․․․

[Seswantšho go letlakala 223]

Go arogana go swana le bohloko bja go segwa ke selo—go bohloko, eupša ge nako e dutše e eya go tla fola