Kgaolo 2

Dikotsi tša go Beana Mabaka ka Sephiring ke Dife?

Jessica o be a lebeletšane le boemo bjo thata kudu. Bo thomile ge morutwana yo a tsenago le yena ka klaseng yo a bitšwago Jeremy a be a mo kgahlegela. O re: “Jeremy o be a le botsana e bile bagwera ba ka ba be ba re ke lesogana la go itshwara gabotse leo nka se tsogego ke le bone felo. Banenyana ba mmalwa ba ile ba leka go ratana le yena, eupša yena o be a sa ba rate. O be a rata nna feela.”

Go se go ye kae, Jeremy o ile a kgopela Jessica gore a beane mabaka le yena. Jessica o ile a hlalosetša Jeremy gore ka ge e le yo mongwe wa Dihlatse tša Jehofa, a ka se dumelelwe go beana mabaka le motho yo a sego bodumeding bja gagwe. O re: “Eupša Jeremy o ile a loga leano.” O ile a mpotšiša gore: ‘Go re’ng re sa fo beana mabaka batswadi ba gago ba sa tsebe?’

GE E ba motho yo a itšego yo a go kgahlago a be a ka go botša mantšu a bjalo, o be o tla arabela bjang? O ka makatšwa ke go tseba gore Jessica o ile a dumelelana le leano la Jeremy. O re: “Ke be ke kgodišegile gore ge nka beana mabaka le yena, ke be ke tla mo dira gore a rate Jehofa.” Mafelelo e bile afe? Re tla bona. Sa pele, anke re boneng kamoo ba bangwe ba welago molabeng wa go beana mabaka ka sephiring.

Lebaka Leo Bafsa ba Bangwe ba Beanago Mabaka ka Sephiring

Ke ka baka la’ng bafsa ba bangwe ba beana mabaka ka sephiring? Lesogana le le bitšwago David le hlalosa taba ye ka boripana ka gore:  “Ba a tseba gore batswadi ba bona ba ka se ba dumelele, ka go re’alo ga ba ba botše.” Jane o bolela lebaka le lengwe. O re: “Go beana mabaka ka sephiring ke borabele. Ge o nagana gore ga o swarwe bjalo ka mofsa yo a godilego yo o naganago gore o yena, o phetha ka gore o tla fo dira dilo tšeo o di ratago ke moka wa se botše batswadi ba gago.”

Na o ka nagana ka mabaka le ge e le afe a mangwe ao ba bangwe ba lekegago go beana mabaka ka sephiring? Ge e ba a le gona, a ngwale ka mo tlase.

․․․․․

Ka ntle le pelaelo o a tseba gore Beibele e go laela gore o kwe batswadi ba gago. (Baefeso 6:1) Le gona ge e ba batswadi ba gago ba gana o beana mabaka, ba swanetše go ba ba na le lebaka le le kwagalago. Lega go le bjalo, o se ke wa makala ge o ikhwetša o nagana ka tsela e latelago:

 ● Ke ikwa ke hlokomologilwe ka gobane batho ka moka ba beana mabaka ka ntle le nna.

● Ke kgahlwa ke motho yo a sego bodumeding bja ka.

● Ke be nka rata go beana mabaka le Mokristegotee le nna, gaešita le ge ke sa le yo monyenyane kudu gore nka tsena lenyalong.

Mohlomongwe o tseba seo batswadi ba gago ba tlago go se bolela ka mantšu ao a lego ka mo godimo. E bile ka pelong o a tseba gore batswadi ba gago ba nepile. Ka nako e swanago, o ka ikwa go swana le ngwanenyana yo a bitšwago  Manami yo a rego: “Kgateletšo ya gore ke beane mabaka ke e matla kudu moo ka dinako tše dingwe ke sa tsebego gore ke eme kae. Bafsa ba lehono ba nagana gore ga go kgonege gore motho a se ke a beana mabaka. Ka ntle le moo, ga go monate go se be le motho yo o beanago mabaka le yena!” Bao ba ilego ba ikhwetša ba le boemong bjo bjalo ba ile ba thoma go beana mabaka gomme ba utela batswadi ba bona seo. Bjang?

“Re Ile ra Botšwa Gore ke Sephiri”

Polelwana “go beana mabaka ka sephiring” ka boyona e ra gore o tlo swanelwa ke go bolela maaka, e lego seo se nyakegago gore ditaba di tle di go sepelele gabotse. Ba bangwe ba beana mabaka ka sephiring ka go boledišana ka mogala goba ka Inthanete. Ge ba le gare ga batho e fo ba bagwera, eupša di-email tša bona, dipoledišano tša bona mogaleng le melaetša ya bona ya mogalathekeng, di bontšha gore ruri ba beana mabaka.

Mokgwa o mongwe wa boradia ke go rulaganya dipokano tša bogwera, ka morero wa gore ka morago yo mongwe le yo mongwe a be le motho wa gagwe. James o re: “Nakong e nngwe re ile ra laletšwa go tla lefelong le itšego re le sehlopha, gomme ra hwetša gore dilo di be di rulagantšwe e sa le pele e le gore batho ba itšego ba babedi ba be gotee. Re ile ra botšwa gore ke sephiri.”

Go etša ge James a bolela, gantši go beana mabaka ka sephiring go kgonega ka thušo ya bagwera. Carol o re: “Gantši o hwetša yo mongwe wa bagwera ba gago a tseba ka seo eupša a kgetha go se botše motho ka baka la go se nyake go ipolaiša ka wena.” Ka dinako tše dingwe, go ba le go se botege ga ka boomo. Beth wa nywaga e 17 o re: “Ba bantši ba beana mabaka ka sephiring ka go se botše batswadi ba bona therešo gore ba ya kae.” Ngwanenyana yo a bitšwago Misaki wa nywaga e 19 o ile a dira sona seo. O re: “Ke ile ka swanelwa ke go loga maano. Ke be ke le šedi  gore ke se bolele maaka ka ntle le ao a kgomago go beana mabaka ga ka e le gore batswadi ba ka ba tšwele pele ba mpota.”

Dikotsi tša go Beana Mabaka ka Sephiring

Ge e ba o lekega go beana mabaka ka sephiring—goba ge e ba o šetše o dira bjalo—o swanetše go ipotšiša dipotšišo tše pedi tše di latelago:

Ke tla feleletša kae? Na o ikemišeditše go nyalana le motho yoo ka nako e sa fedišego pelo? Evan wa nywaga e 20 o re: “Go beana mabaka o se na maikemišetšo a go tsena lenyalong go swana le go bapatša selo se itšego eupša o sa se rekiše.” Mafelelo e ka ba afe? Diema 13:12 e re: “Go diega ga selo seo se letetšwego go bolaiša pelo.” Na ruri o nyaka go roba pelo ya motho yo o tshwenyegilego ka yena? Temošo e nngwe še: Go beana mabaka ka sephiring go tla dira gore o se ke wa hwetša thušo ya batswadi ba gago le ya batho bao ba godilego tsebong bao ba go ratago. Ka baka la se, go na le kgonagalo e kgolo ya gore o wele molabeng wa boitshwaro bjo bo gobogilego bja tša botona le botshadi.—Bagalatia 6:7.

Jehofa Modimo o ikwa bjang ka seo ke se dirago? Beibele e re: “Dilo ka moka di hlobotše e bile di molaleng mahlong a yo re ikarabelago go yena.” (Baheberu 4:13) Ka gona ge e ba o uta go beana mabaka ga gago goba ga mogwera wa gago, Jehofa o šetše a tseba seo. E bile ge e ba o kile wa bolela maaka, seo se swanetše go go tshwenya. Jehofa Modimo o tloga a hloile maaka. Ee, “leleme la maaka” le lokeleditšwe gare ga dilo tša mathomo ka Beibeleng tšeo di mo šišimišago!—Diema 6:16-19.

Go Utolla Sephiri

Ruri o tla ba o dira gabotse ge o ka boledišana le batswadi ba gago goba Mokriste yo a godilego tsebong ka tswalano le ge e le efe ya ka sephiring yeo o ka bago o le go yona. Le gona ge e ba mogwera wa gago a beana mabaka ka sephiring, o se ke wa tsenya letsogo go seo ka go mo thuša go se uta. (1 Timotheo 5:22) Go ba  gona, o tla ikwa bjang ge e ba tswalano ya gagwe e ka feleletše ka ditlamorago tše bohloko? Na o tla be o sa tsenya letsogo go se nene go seo?

Ka mohlala: A re re mogwera wa gago o na le bolwetši bja swikiri gomme ka sephiring o ipolaiša dilo tša go ba le swikiri. Go thwe’ng ge e ba o ka tseba ka seo eupša mogwera wa gago a go rapela gore o se ke wa botša motho? Ke’ng seo o bego o tla tshwenyega kudu ka sona—na ke go šireletša mogwera wa gago goba na ke go dira selo seo mohlomongwe se ka phološago bophelo bja gagwe?

Le wena o lebeletšane le boemo bjo bo swanago ge e ba o tseba gore mogwera wa gago o beana mabaka ka sephiring. O se ke wa tshwenyega ka gore o tla senyetša sa ruri segwera sa lena. Ge nako e dutše e eya, ge e ba e le mogwera wa paala o tla bona gore o be o mo kganyogela tše dibotse.—Psalme 141:5.

Na ke go Beana Mabaka ka Sephiring Goba ke go se Nyake go Phatlalatša Ditaba tša Gago?

Therešo ke gore ga se diphiri ka moka tša mabapi le go beana mabaka tšeo di akaretšago maaka. Ka mohlala, a re re lesogana le kgarebe ba nyaka go tsebana kaone, eupša ka nakwana ga ba nyake go  phatlalatša seo. Mohlomongwe go etša ge lesogana leo le bitšwago Thomas le bolela, “ga ba nyake go hlwa ba tshwenywa ka dipotšišo tša go swana le gore: ‘Bjale le tlo nyalana neng?’”

Kgateletšo e matla e tšwago bathong ba bangwe e ka ba le mafelelo a šoro kudu. (Sefela sa Difela 2:7) Ka gona, ba bangwe mathomong a tswalano ya bona ka bohlale ba kgetha go se botše motho. (Diema 10:19) Anna wa nywaga e 20 o re: “Se se nea batho ba babedi nako ya go dira phetho ya ge e ba ba tla tšwetša pele tswalano ya bona. Ge e ba go le bjalo, gona ba ka botša batho ba bangwe.”

Ka nako e swanago, e tla ba mo go fošagetšego go se botše batho bao ba nago le tshwanelo ya go tseba ka seo, bjalo ka batswadi ba gago goba batswadi ba motho yo o beanago mabaka le yena. Ge e le gabotse, ge e ba o sa nyake motho a tseba gore o beana mabaka, o swanetše gore o ipotšiše lebaka la seo. Na ke ka gobane o šetše o tseba gore batswadi ba gago ba tla ba le lebaka le le kwagalago la go ganana le seo?

“Ke Ile ka Tseba Seo ke Bego ke Swanetše go se Dira”

Jessica yo go boletšwego ka yena mathomong a sehlogo se, o ile a kgaotša go beana mabaka ka sephiring le Jeremy ge a be a ekwa phihlelo ya kgaetšedi yo mongwe wa Mokriste yo a bego a  beana mabaka ka sephiring. Jessica o re: “Ka morago ga go kwa kamoo kgaetšedi yoo a aroganego ka gona le lesogana la gagwe, ke ile ka tseba seo ke bego ke swanetše go se dira.” Na go arogana moo go be go le bonolo? Aowa! Jessica o re: “Mošemane yoo ke yena feela yo ke bego ke tloga ke mo rata. Ke ile ka lla ka mehla ka dibeke tše mmalwa.”

Lega go le bjalo, Jessica o be a tseba gore o rata Jehofa. Gaešita le ge a ile a fapoga go se nene, o be a tloga a nyaka go dira se se nepagetšego. Ge nako e dutše e eya, bohloko bja go arogana le lesogana la gagwe bo ile bja fola. Jessica o re: “Ga bjale tswalano ya ka le Jehofa e matlafetše le go feta. Ke leboga kudu gore o re nea tlhahlo yeo re e hlokago ka nako e swanetšego!”

KGAOLONG YA RENA YEO E LATELAGO

A re re o loketše go beana mabaka e bile o hweditše motho yo a go kgahlago. Eupša o tseba bjang gore motho yoo ke yo a go swanetšego?

KEY SCRIPTURE

“Re rata go itshwara ka go botega dilong tšohle.”—Baheberu 13:18.

KELETŠO

Ga se gore o swanetše go botša lefase ka moka gore o beana mabaka. Lega go le bjalo, o swanetše go botša batho bao ba nago le tshwanelo ya go tseba ka seo. Bao gantši ba akaretša batswadi ba gago le ba motho yo o beanago mabaka le yena.

NA O BE O TSEBA . . . ?

Ditswalano tše di swarelelago di theilwe go botegeng. Go beana mabaka ka sephiring go dira gore batswadi ba gago ba se sa go bota e bile go fokodiša motheo wa tswalano ya gago le motho yo o beanago mabaka le yena.

KGATO YEO KE TLAGO GO E TŠEA!

Ge e ba ke beana mabaka le Mokristegotee le nna ka sephiring, ke tla ․․․․․

Ge e ba mogwera wa ka a beana mabaka ka sephiring, ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Naganišiša ka  maemo a mararo ao a ngwadilwego ka mantšu a makoto go letlakala 22. Ge e ba bo le gona, ke boemo bofe bjo bo hlalosago kamoo o ikwago ka gona ka dinako tše dingwe?

● O ka lokiša bjang boemo bjoo ka ntle le gore o beane mabaka ka sephiring?

● Ge e ba o be o tseba gore mogwera wa gago o beana mabaka ka sephiring, o be o tla swaragana bjang le boemo bjoo, gona ke ka baka la’ng o be o ka kgetha go dira bjalo?

[Ntlhakgolo go letlakala 27]

“Ke ile ka kgaotša go beana mabaka ka sephiring. Go be go le thata go ya sekolong gomme ka mehla ke bona mošemane yo ke bego ke beana mabaka le yena. Eupša Jehofa Modimo o kgona go bona dilo tšohle, mola rena re sa kgone. Re swanetše go fo bota Jehofa.”​—Jessica

[Seswantšho go letlakala 25]

Go šireletša mogwera wa gago yo a beanago mabaka ka sephiring go swana le go šireletša mogwera wa gago yo a nago le bolwetši bja swikiri eupša a ipolaiša dilo tše di nago le swikiri