Kgaolo 23

Go Thwe’ng ge e ba Motswadi wa ka a Lemaletše Dihlaretagi Goba Bjala?

“Ga e sa le tate a re o yo lokiša koloi, eupša ga se ra ka ra kwa go tšwa go yena mosegare ka moka. Mma o ile a leka go mo leletša mogala eupša a se o arabe. Ka morago ga sebakanyana ke ile ka lemoga gore mma o bonagala a tshwenyegile e bile eka o itokišeletša go sepela. O ile a mpotša gore: ‘Ke sa ya go tsomana le tatago.’

“Ka morago, mma o ile a boa a nnoši. Ke ile ka mmotšiša gore: ‘Na o hweditše tate a lokiša koloi?’ O ile a araba ka gore: ‘Aowa.’

“Ka yona nako yeo ke ile ka tseba gore tate o boetše mekgweng ya gagwe ya boradia. O dirile go fo swana le nakong e fetilego. E re ke le botšeng, tate o lemaletše dihlaretagi. Ge a boa gae, nna le mma re be re tšhogile kudu e bile re tshwenyegile. Letšatšing le le latelago ke ile ka mo hlokomologa, e lego selo seo se sa nthabišego le gatee.”—Karen wa nywaga e 14.

 BAFSA ba dimilione ba kgotlelela mathata a letšatši le letšatši a go phela le motswadi yo a lemaletšego dihlaretagi goba bjala. Ge e ba yo mongwe wa batswadi ba gago a lemaletše se sengwe sa dilo tše, a ka go leša dihlong, a go ferekanya gaešita le go go galefiša.

Ka mohlala, Mary o godišitšwe ke tate yo a bego a bonagala a lokile ge a le gare ga batho. Eupša o be a lemaletše bjala ka sephiring gomme ge a le ka gae a swara ba lapa la gagwe gampe e bile a ba roga. Mary o gopola ka go galefa gore: “Batho ba be ba tla tla go rena bana ke moka ba re botše gore re na le tate yo lerato le gore re lehlogonolo.” *

Ge e ba yo mongwe wa batswadi ba gago a lemaletše bjala goba dihlaretagi, o ka lebeletšana bjang le boemo bjoo?

Sebaki sa go Lemalela Dihlaretagi Goba Bjala

Sa pele, go a thuša go kwešiša bothata bja motswadi wa gago. Diema 1:5 e re: “Motho yo . . . a kwešišago o hwetša tlhahlo e bohlale.” Ka gona e tla ba mo gobotse gore o ithute se itšego mabapi le seo go lemalela dilo go se bolelago, gore ke bomang bao ba lemalelago bjala goba dihlaretagi le lebaka la gore ba dire bjalo.

Ka mohlala, molemaledi wa bjala ga se feela motho yo ka dinako tše dingwe a nwago ka mo go feteletšego. Go e na le moo, ke motho yo a sa ikwego gabotse ge a se a nwa bjala e bile ga a kgone go kgaotša. * O dula a nagana ka bjona gaešita le go bo rata ka mo go feteletšego moo e lego gore ge a ka thoma go bo nwa, ga a sa kgona go bo lekanyetša. Go bo lemalela ga gagwe go baka mathata a magolo ao a kgomago ba lapa la gagwe, mošomo le boemo bja gagwe bja tša maphelo.

Gaešita le ge batho ba bangwe ka tlhago ba ka lemalela  bjala, go bonagala le mabaka a maikwelo a akaretšwa. Ge e le gabotse, batho ba bantši bao ba lemaletšego bjala gantši ba itlhoile. (Diema 14:13) Go ba gona, ba bangwe ba bona ba godišitšwe ke batswadi bao ba bego ba lemaletše bjala. Go batho ba bjalo, go nwa bjala go ka ba lebatša mašuana a bjaneng. Go ka ba go akaretšwa mabaka a swanago ge motho a lemaletše dihlaretagi.

Therešo ke gore go nwa bjala goba go diriša dihlaretagi go fo gakatša mathata a motho; tsela ya gagwe ya go nagana le maikwelo di kgopama le go feta. Ke ka baka leo motswadi wa gago a ka hlokago thušo e kgolo ya setsebi seo se nago le bokgoni gore a lokologe mokgweng wo.

Go Fetoša Ditebelelo tša Gago

Ke therešo gore go kwešiša lebaka leo motswadi wa gago a itshwarago ka tsela e bjalo e šišimišago ga go tloše bothata. Lega go le bjalo, go kwešiša temalelo ya gagwe go ka go dira gore o mo kwele bohloko ka tekanyo e itšego.

Ka mohlala, na o ka letela gore motswadi wa gago yo a robegilego leoto a bapale kgwele ya maoto le wena? Go thwe’ng ge nkabe o be o tseba gore motswadi wa gago o gobetše a be a dira tša bošilo? Ga go pelaelo gore o be o tla nyamišwa ke seo. Lega  go le bjalo, o be o tla kwešiša gore go ba go fihla ge motswadi wa gago a fodile, a ka se kgone go bapala le wena gabotse. Go kwešiša ntlha ye go tla go thuša gore o fetoše dilo tšeo o di letetšego go motswadi wa gago.

Ka mo go swanago, motswadi yo a lemaletšego bjala goba dihlaretagi o golofetše maikwelong le monaganong. Ke therešo gore o ikgolofaditše. Le gona, o ka nagana gore ke mo go swanetšego gore o galefele motswadi wa gago ka baka la ditiro tša gagwe tša bošilo. Lega go le bjalo, go ba go fihlela motswadi wa gago a nyaka thušo ya gore a fenye temalelo ya gagwe, a ka se kgone go go hlokomela gabotse. Go lebelela temalelo ya gagwe e le kgobalo yeo e golofatšago go ka go thuša gore o fetoše dilo tšeo o di letetšego go yena.

Seo o ka se Dirago

O swanetše go lemoga gore go ba go fihla ge motswadi wa gago a lokišitše bophelo bja gagwe, wena o swanetše go phela le ditlamorago tša boitshwaro bja gagwe. Mo nakong ye, o ka dira’ng ka boemo bjo?

O se ke wa ithweša morwalo ka baka la temalelo ya motswadi wa gago. Ke motswadi wa gago a nnoši yo a ikarabelago ka temalelo ya gagwe e sego motho yo mongwe. Bagalatia 6:5 e re: “Yo mongwe le yo mongwe o tla rwala morwalo wa gagwe.” Ka gona, ga se mošomo wa gago go alafa motswadi  wa gago e bile ga o gapeletšege go mo šireletša go ditlamorago tša temalelo ya gagwe. Ka mohlala, ga go nyakege gore o mo šireletše ka go botša mongmošomo wa gagwe maaka goba go mo kuka ge a wetše fase ka pele ga mojako wa ntlo ka baka la go tagwa.

Kgothaletša motswadi wa gago gore a nyake thušo. Bothata bjo bogolo bjo motswadi wa gago a ka bago a na le bjona e ka ba go palelwa ke go dumela gore o na le bothata. Ge a hlaphogetšwe e bile a thekgile ditho, mohlomongwe motswadi wa gago yo e sego molemaledi gotee le bomogolwago ba ka mmotša kamoo boitshwaro bja gagwe bo kgomago lapa ka gona le seo a swanetšego go se dira.

Go oketša moo, motswadi wa gago wa molemaledi a ka holega ge e ba a ka ngwala dikarabo tša dipotšišo tše di latelago: Go tla direga’ng ka nna le ba lapa la ka ge nka tšwela pele ke enwa bjala goba ke diriša dihlaretagi? Go tla direga’ng ge nka kgaotša mokgwa wo? Nka dira’ng gore ke thušwe?

Ge e ba go befa, tloga. Diema 17:14 e re: “[Tloga] pele ga ge ntwa e ka thoma.” O se ke wa ipea kotsing ka go tsena ditaba gare ge go na le ngangišano. Ge e ba go kgonega, eya phapošing ya gago goba gabo mogwera wa gago. Ge e ba go bonagala eka go tla tsoga ntwa, o ka swanelwa ke go nyaka thušo go batho ba bangwe.

Amogela kamoo o ikwago ka gona. Bafsa ba bangwe ba ikwa ba le molato ka gobane ba galefela motswadi wa bona wa molemaledi. E fo ba ga tlhago gore o ikwe o galefa ka tekanyo  e itšego, kudukudu ge e ba temalelo ya motswadi wa gago e mo šitiša go go bontšha lerato le go go nea thekgo yeo o e hlokago. Ke therešo gore Beibele e go tlama gore o godiše motswadi wa gago. (Baefeso 6:2, 3) Eupša go mo “godiša” go bolela go hlompha matla a gagwe a taolo, go fo swana le ge o swanetše go hlompha matla a taolo a lephodisa goba a moahlodi. Seo ga se re gore o dumelelana le temalelo ya gagwe. (Baroma 12:9) Le gona ga se gore ga se wa loka ka gobane o šišimišwa ke go nwa ga gagwe goba go diriša gampe dihlaretagi; ge e le gabotse, go diriša gampe ditagi go a šišimiša.—Diema 23:29-35.

Gwerana le batho bao ba agago. Ge bophelo ka lapeng leno bo hlakahlakane, o ka feleletša o se sa tseba seo bophelo bja kgonthe bo lego sona. Ka go re’alo, go bohlokwa gore o gwerane le batho bao ba phetšego gabotse moyeng le maikwelong. Ditho tša phuthego ya Bokriste di ka go kgothatša kudu, tša go thekga gomme tša fela di go imolla kgateletšegong ya ka lapeng. (Diema 17:17) Go tlwaelana le malapa a Bakriste go ka go nea mohlala o mobotse wa bophelo bja lapa woo o ka tšeelago legato mohlala wo e sego wona woo o o bonago ka lapeng leno.

 Inyakele thušo. Go thuša kudu gore o be le motho yo a godilego tsebong yo o ka mmotago le yoo o ka mmotšago maikwelo a gago. Bagolo ba phuthego ba ikemišeditše go go thuša ge o ba hloka. Beibele e re banna ba ba “swana le lefelo la go tšhabela phefo le lefelo la go utela ledimo, [ba] swana le melapo nageng e se nago meetse, le moriti wa leswika le legolo nageng e omilego.” (Jesaya 32:2) Ka gona o se ke wa tšhaba goba wa lewa ke dihlong tša go ya go bona gore ba go homotše le go go eletša.

Gare ga megato e tshelelago yeo e lego ka mo godimo, ngwala woo o tlago go leka go o gata pele. ✎

O ka fo se kgone go fetoša boemo bja ka lapeng leno, eupša o ka kgona go fetoša tsela yeo bo go kgomago ka yona. Go e na le gore o leke go laola motswadi wa gago, lebiša tlhokomelo mothong yo o ka kgonago go mo laola—wena. Moapostola Paulo o ngwadile gore: “Dulang le šomela phološo ya lena.” (Bafilipi 2:12) Go dira bjalo go tla go thuša go ba le pono e nepagetšego, e bile go ka ba gwa tutuetša motswadi wa gago go nyaka thušo ka baka la temalelo ya gagwe.

KGAOLONG YA RENA YEO E LATELAGO

Go thwe’ng ge e ba go bonagala batswadi ba gago ba duletše go ngangišana? O ka lebeletšana bjang le go hlakahlakana maikwelong mo go bakwago ke seo?

[Mengwalo ya tlase]

KEY SCRIPTURE

“Temogo ya motho e fokotša bogale bja gagwe.”—Diema 19:11.

KELETŠO

Go e na le gore o hloye motswadi wa gago, hloya dilo tše mpe tšeo a di dirago.—Diema 8:13; Juda 23.

NA O BE O TSEBA . . . ?

Ka Beibeleng, go “godiša” go ka fo bolela go hlompha bolaodi bjo bo theilwego ka molao. (Baefeso 6:1, 2) Ka go re’alo, go godiša motswadi ga se ka mehla go nyakago gore o dumelelane le boitshwaro bja gagwe.

KGATO YEO KE TLAGO GO E TŠEA!

Ge e ba motswadi wa ka a thoma go ntlaiša ka mantšu goba mmeleng, ke tla ․․․․․

Nka kgothaletša motswadi wa ka go nyaka thušo ka go ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke’ng seo se dirago gore batho ba bangwe ba lemalele bjala goba dihlaretagi?

● Ke ka baka la’ng e se molato wa gago ge motswadi wa gago e le molemaledi?

● Ke dilo dife boemong bja gago tšeo o ka kgonago go di laola, gona o ka dira seo bjang?

[Ntlhakgolo go letlakala 192]

“Ke a tseba gore batswadi ba ka ba sa dutše ba tla nteša dihlong nakong e tlago, eupša ke tseba le gore ge nka ithekga ka Jehofa, o tla nnea matla a go kgotlelela.”​—Maxwell

 [Lepokisi go letlakala 198]

Ge Motswadi wa Gago a Kgaotša go Hlankela Jehofa

● Ge e ba yo mongwe wa batswadi ba gago a kgaotša go phela ka go dumelelana le ditekanyetšo tša Beibele—mohlomongwe a bile a tsebiša batho gore ga a sa nyaka go ba karolo ya phuthego ya Bokriste—o ka dira’ng?

● Tseba gore Jehofa ga a bone wena molato ka boitshwaro bja motswadi wa gago. Beibele e re: “Yo mongwe le yo mongwe wa rena o tla ikarabela go Modimo.”—Baroma 14:12.

● Phema mokgwa wa go ipapetša le bafsa ba bangwe bao maemo a bona a lego kaone. (Bagalatia 5:26) Lesogana le lengwe leo tatago lona a tlogetšego lapa la gagwe le re: “Go e na le gore o hlwe o nagana ka seo, go thuša kudu go nagana kamoo o ka lebeletšanago le boemo bjoo.”

● Tšwela pele o hlompha motswadi yoo wa gago yo a sa itshwarego gabotse, le gona ge e ba ditaelo tšeo a go neago tšona di sa thulane le ditekanyetšo tša Modimo, di latele. Taelo ya Jehofa ya gore bana ba godiše batswadi ba bona ga se ya ithekga ka gore motswadi ke modumedi goba go se bjalo. (Baefeso 6:1-3) Ge o godiša le go kwa batswadi ba gago go sa šetšwe mafokodi a bona, o bontšha gore o rata Jehofa.—1 Johane 5:3.

● Tlwaelana kudu le phuthego ya Bokriste. Ka phuthegong o ka hwetša khomotšo go ditho ka moka tše di lego bjalo ka lapa leno. (Mareka 10:30) Lesogana le le bitšwago David le be le tšhaba gore ditho tša phuthego di ka hlokomologa lona le ba bangwe ka lapeng la gabo ka gobane tatago lona o kgaoditše go hlankela Jehofa. Eupša David o ile a hwetša gore o be a tšhaba lefeela. O re: “Re be re sa dirwe gore re ikwe eka re balahlwa. Se se ile sa nkgodiša gore phuthego e be e tloga e na le taba le rena.”

[Seswantšho go letlakala 194]

Go lebelela temalelo ya motswadi wa gago e le kgobalo yeo e golofatšago go ka go thuša gore o fetoše dilo tšeo o di letetšego go yena