Kgaolo 33

Ke ka Baka La’ng o Swanetše go Phema Diswantšho tše di Kgothaletšago Bootswa?

Ke gakae moo ka phošo o kopanago le diswantšho tše di kgothaletšago bootswa?

□ Le ka mohla

□ Ka sewelo

□ Gantši

Se gantši se diragala kae?

□ Inthaneteng

□ Sekolong

□ Thelebišeneng

□ Lefelo le lengwe

O arabela bjang?

□ Ke di tswalela kapejana.

□ Go nyaka go tseba go ntira gore ke di gaše mahlo.

□ Ke di tomolela mahlo ke be ke nyake tše dingwe.

 GE BATSWADI ba gago ba be ba lekana le wena, batho bao ba bego ba nyaka go bogela diswantšho tše di kgothaletšago bootswa ba be ba swanetše go di nyaka. Lehono go bonagala eka di nyaka wena. Ngwanenyana yo mongwe wa nywaga e 19 o re: “Ka dinako tše dingwe ge ke fetleka Inthanete goba ke reka dilo tše itšego ke diriša yona goba gaešita le ge ke lebelela ditatamente tša panka, gateetee go tšwelela diswantšho tšeo!” Se se tloga se tlwaelegile. Nyakišišong e nngwe, 90 lekgolong ya bafsa ba nywaga ya magareng ga e 8 le e 16 ba boletše gore ba ile ba bona diswantšho tše di kgothaletšago bootswa Inthaneteng e se ka maikemišetšo—gantši ba di bone ge ba be ba dira mošomo wa bona wa sekolo wa gae.

Ka baka la ge diswantšho tše di kgothaletšago bootswa di atile, o ka ipotšiša gore: ‘Na di tloga di le kotsi?’ Karabo ke ee! Diswantšho tšeo di theoša seriti sa batho bao ba tšwelelago go tšona le bao ba di bogelago gomme gantši di lebiša boitshwarong bjo bo gobogilego bja tša thobalano. Eupša go na le dikotsi tše dingwe.

Go bogela diswantšho tšeo e ka ba mokgwa wo o nago le ditlamorago tše šoro tša sa ruri. Ka mohlala, ela hloko monna yo a bitšwago Jeff yoo gaešita le ka morago ga nywaga e 14 a tlogetše go di bogela a dumetšego ka gore: “Ke ntwa ya letšatši le letšatši. Gaešita le ge kganyogo ya go di bogela e se sa le matla kudu, eupša e sa le gona. Ke sa dutše ke kganyoga go di bogela. Diswantšho tšeo di sa le gona ka monaganong wa ka. Ke duma ge nkabe ke sa ka ka thoma mokgwa wo o šišimišago. Mathomong o be o bonagala o se kotsi. Eupša bjale ke a tseba gore o tloga o le kotsi. Diswantšho tše di kgothaletšago bootswa di a gobatša, di a šišimiša le gona di theoša seriti sa beng ba tšona le sa bao ba di bogelago. Go sa šetšwe seo se bolelwago ke bathekgi ba tšona, di tloga di se na mohola.”

 Lebeledišiša Boemo

O ka phema bjang gore gaešita le ka phošo o se ke wa bona diswantšho tše di kgothaletšago bootswa? Sa pele, lebeledišiša boemo. Na go na le mokgwa woo o dirago gore o kopane le tšona? Ela hloko mehlala e latelago:

Na go na le kgonagalo ya gore ba bangwe ba bao o tsenago le bona sekolo ba go romele diswantšho tšeo ka e-mail goba ka mogalathekeng? Ge e ba go le bjalo, e tla ba gabohlale gore o phumole melaetša ya bona ntle le go e bula.

Ge o le Inthaneteng, na go fela go tšwelela melaetša goba diswantšho ge o ngwala mantšu a itšego gore o dire nyakišišo? Go tseba gore se se a kgonega go ka go thuša gore o ngwale ka šedi le ka go lebanya mantšu ao o a nyakišišago.

Ka mo tlase, ngwala maemo le ge e le afe ao a ilego a dira gore o bone diswantšho tšeo di kgothaletšago bootswa.

․․․․․

Na go na le selo le ge e le sefe seo o ka se dirago go fokotša goba go dira gore o se sa bona diswantšho tšeo ka phošo? Ge e ba go le bjalo, ngwala ka mo tlase seo o rulaganyago go se dira.

․․․․․

Ge e ba o Šetše o di Lemaletše

Go bona diswantšho tše di kgothaletšago bootswa ka phošo go fapane kudu le go di bogela ka boikemišetšo. Go thwe’ng ge  e ba go bile go fetoga mokgwa? Tseba gore go tlogela mokgwa o bjalo ga go bonolo. Ka mohlala: A re re diatla tša gago di tateditšwe ka gare. Ga go pelaelo gore o be o ka e kgaola ka go fo phatlalatša diatla tša gago. Eupša go thwe’ng ge e ba e be e tateditšwe ka makga a mantši diatleng tša gago? Go e kgaola go be go tla ba thata kudu. Go a swana le ka batho bao ba tlwaetšego go bogela diswantšho tše di kgothaletšago bootswa. Ge ba dutše ba di bogela gantšintši, ke moo ba di lemalelago le go feta. Ge e ba o lemaletše mokgwa wo, o ka o tlogela bjang?

Kwešiša gore diswantšho tše di kgothaletšago bootswa di kotsi kudu. Diswantšho tše di kgothaletšago bootswa ke mokgwa wa Sathane wa go goboša selo seo Jehofa a se bopetšego gore se hlomphege. Go di kwešiša ka kgopolo ye go tla go thuša gore o ‘hloye se sebe.’—Psalme 97:10.

Ela hloko ditlamorago. Diswantšho tše di kgothaletšago bootswa di thuba manyalo. Di  nyenyefatša batho bao ba tšweleditšwego go tšona. Di theoša seriti sa motho yo a di bogelago. Beibele e bolela ka lebaka leo le kwagalago gore: “Yo bohlale ke yo a bonego kotsi a ikuta.” (Diema 22:3) Ka mo tlase, ngwala kotsi yeo e ka go welago ge e ba o be o ka lemalela mokgwa wa go bogela diswantšho tše di kgothaletšago bootswa.

․․․․․

Itlame. Monna yo a botegago e lego Jobo o itše: “Ke dirile kholofetšo e tiilego gore le ka mohla nka se lebelele ngwanenyana ka go mo kganyoga.” (Jobo 31:1,Today’s English Version) Tše di latelago ke tše dingwe tša ‘dikholofetšo tše di tiilego’ tšeo o ka di dirago:

Nka se diriše Inthanete ge ke le noši ka phapošing.

Ke tla tswalela gateetee molaetša goba Wepesaete le ge e le efe yeo e nago le diswantšho tše di gobogilego.

Ge nka boela mokgweng wa go di bogela, ke tla boledišana le mogwera yo a godilego tsebong.

Na o ka nagana ka dilo tše dingwe tšeo le tšona di ka go thušago go fenya mokgwa wa go bogela diswantšho tše di kgothaletšago bootswa? Ge e ba go le bjalo, di ngwale mo.

․․․․․

 Rapela ka taba ye. Mopsalme o ile a lopa Jehofa ka gore: “Tlogediša mahlo a ka go bona se se hlokago mohola.” (Psalme 119:37) Jehofa Modimo o nyaka gore o atlege, le gona a ka go nea matla a gore o dire se se nepagetšego.—Bafilipi 4:13.

Boledišana le motho yo mongwe. Gantši go kgetha motho yo o ka mo ntšhetšago sa mafahleng ke mogato o bohlokwa wa gore o tlogele mokgwa wo. (Diema 17:17) Ka mo tlase, ngwala leina la motho yo a godilego tsebong yoo o tlago go ikwa o lokologile go boledišana le yena ka taba ye.

․․․․․

Kgonthišega gore o ka atlega ntweng ya gago ya go katanela go tlogela mokgwa wa go bogela diswantšho tše di kgothaletšago bootswa. Ge e le gabotse, nako e nngwe le e nngwe ge o phemile go di bogela, o tloga o fentše. Botša Jehofa ka phenyo yeo gomme o mo leboge gore o go neile matla. Ka mehla gopola gore ge o phema molaba wa diswantšho tše di kgothaletšago bootswa, o thabiša pelo ya Jehofa!—Diema 27:11.

KEY SCRIPTURE

“Ka gona bolayang mekgwa ya lefase yeo e lego dithong tša mebele ya lena, e lego bootswa, go se hlweke, kganyogo e fošagetšego ya go robala ga monna le mosadi, kganyogo e gobatšago le megabaru, e lego borapedi bja medimo ya diswantšho.”—Bakolose 3:5.

KELETŠO

Kgonthišetša gore o rulagantše khomphutha ya gago ka tsela yeo e sa go dumelelego go tsena mekerong ya diswantšho tše di kgothaletšago bootswa. Le gona phema go bula melaetša yeo o sa e tsebego.

NA O BE O TSEBA . . . ?

Ge motho a lemaletše go bogela diswantšho tše di kgothaletšago bootswa o swana le barongwa ba kgopo ba mehleng ya Noa bao ba ilego ba ba le kganyogo yeo e sego ya tlhago ya go ba le thobalano.—Genesi 6:2.

KGATO YEO KE TLAGO GO E TŠEA!

E le gore ke se ke ka bona diswantšho tše di kgothaletšago bootswa ka phošo, ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Diswantšho tše di kgothaletšago bootswa di goboša bjang selo seo se hlomphegago?

● O ka thuša bjang ngwaneno yo a nago le bothata bja go bogela diswantšho tše di kgothaletšago bootswa?

[Seswantšho go letlakala 276]

Diswantšho tše di kgothaletšago bootswa di dira gore motho a di lemalele—ge o di bogela gantšintši, ke moo go bago thata kudu go tlogela go di bogela

[Ntlhakgolo go letlakala 278]

“Pele ga ge nka ithuta Beibele, ke ile ka diriša gampe mo e ka bago mehuta ka moka ya dihlaretagi tše di tsebjago. Eupša go dilo ka moka tšeo ke bego ke di lemaletše, mokgwa wa go bogela diswantšho tše di kgothaletšago bootswa o be o le thata kudu gore ke o tlogele. Ke feela ka thušo ya Jehofa moo ke ilego ka kgona go fenya bothata bjo.”—Jeff