Kgaolo 10

Ke ka Baka La’ng Mogwera wa ka a Nkwešitše Bohloko?

“Kerry e be e le mogwera wa ka wa paala. Letšatši le lengwe le le lengwe ke be ke mo nametša koloi ya ka ka morago ga mošomo ka ge a be a se na koloi. Lega go le bjalo, go se go ye kae ke ile ka thoma go lemoga gore o be a nyaka segwera sa ka e le feela gore a ikhole.

“O be a tla tsena ka koloing a bolela mogaleng goba a swaregile ka go ngwala melaetša mogalathekeng wa gagwe. Le ka mohla o be a sa leboge ge ke be ke mo nameditše koloi, e bile o ile a kgaotša go mpha moneelo bakeng sa peterole. Le gona dipolelo tša gagwe di be di sa age. Ke ile ka ikgalefela ka ge ke ile ka mo kgotlelela ka nako e telele gakaakaa!

“Ka letšatši le lengwe ke ile ka hlalosetša Kerry ka botho gore nka se sa kgona go mo nametša koloi ya ka ka morago ga mošomo. Ga e sa le go tloga ka nako yeo, ga se a ka a nyaka go gwerana le nna—e lego seo se nkgodišago le go feta gore o be a thabela segwera sa ka e le feela gore a ikhole. Seo se tloga se kweša bohloko!”—Nicole.

SE SE ka diragalela bagwera ba paala. Ka letšatši le lengwe ke monwana le lenala; letšatšing le le latelago ga ba boledišane le go boledišana. Go tla bjang gore segwera se sebotse se senyege kapejana gakaaka?

 ● Go Jeremy go ile gwa bonagala dilo ka moka di fetoga ge mogwera wa gagwe wa paala a be a hudugela tikologong yeo e lego bokgoleng bja dikhilomithara tše e ka bago tše 1 600. Jeremy o re: “Ka morago ga ge mogwera wa ka a hudugile, ga se a ka a nteletša mogala gomme seo se ile sa tloga se nkweša bohloko.”

● Kerrin o ile a thoma go lemoga go fetoga ga semelo sa yo e bilego mogwera wa gagwe wa paala ka nywaga e mehlano. Kerrin o re: “Mokgwa wa gagwe le dipolelo tša gagwe di be di ntshwenya e le ruri. O ile a thoma go swaya diphošo le go bolela ka go kodutla mabapi le dilo tšeo e bego e le tša bohlokwa go nna. Ge re be re leka go boledišana ka taba ye, o ile a ntatofatša ka gore ke itira moloki le gore ga ke botege ke moka a re segwera sa rena se be se sa mo hole ka selo!”

● Go Gloria, segwera sa kgauswi seo a bego a na le sona se ile sa fela ntle le temošo goba tlhaloso. Gloria o re: “Mathomong nna le mogwera wa ka re be re kwana kudu, e bile o ile a mpotša gore ke be ke le bjalo ka ngwanabo. Eupša gateetee o ile a kgaotša go dira dilo le nna gomme o be a itlhamela mabaka a go se kwagale.”

● Bothata magareng ga Laura le Daria bo thomile ge Daria a be a tšeela Laura lesogana la gagwe. Laura o re: “Daria o be a tla fetša diiri tše dintši a bolela le lesogana leo mogaleng gaešita le ge nna le lesogana leo re be re beana mabaka. Ka nako e tee,  ke ile ka se botegelwe ke mogwera wa ka wa paala ka ba ka lahlegelwa ke yo e bego e tla ba molekane wa ka wa lenyalo!”

Go Senyegile Kae?

Motho yo mongwe le yo mongwe o dira diphošo. Ka gona o ka letela gore nengneng mogwera wa gago a dire goba a bolele selo se itšego seo se tlago go go kweša bohloko. Ge o gadima morago, o ka gopola makga a mmalwa ao le wena o ilego wa kweša ba bangwe bohloko. (Mmoledi 7:22) Ngwanenyana yo a bitšwago Lisa o re: “Ka moka ga rena ga se ra phethagala gomme ka dinako tše dingwe re tlo kwešana bohloko.” Gantši go se kwane mo go bakilwego ke go se kwešišane mo go sa rego selo go ka rarollwa ka go fo boledišana.

Lega go le bjalo, mabakeng a mangwe go fela ga segwera ga go bakwe ke tiragalo e tee feela, eupša go bakwa ke gore ganyenyane-ganyenyane le lemoga gore bobedi bja lena ga le swane ka tsela yeo le kilego la nagana gore le a swana. Gopola gore ge o dutše o gola, dilo tšeo di go kgahlago di a fetoga gomme go bjalo le ka tšeo di kgahlago mogwera wa gago. O ka dira’ng ge o lemoga gore wena le mogwera wa gago le thoma go arogana?

 Kamoo o ka Tsošološago Segwera

Na o kile wa gagola se sengwe sa diaparo tša gago tšeo o di ratago kudu? O ile wa dira’ng? Na o ile wa se lahla goba wa se roka? Ga go na pelaelo gore seo o ilego wa se dira se be se ithekgile kudu ka gore se gagogile gakaakang le gore o be o se rata kudu gakaakang. Ge e ba o be o tloga o rata seaparo seo, go molaleng gore o ile wa nyaka ditsela tša go se roka. Mabakeng a mantši, se se swanago se a kgonega le ka segwera se se fedilego. Kgato yeo o tlago go e tšea e ithekgile kudu ka seo se diregilego le ka gore o bona segwera seo e le sa bohlokwa gakaakang. *

Ka mohlala, ge e ba o kile wa botšwa mantšu a sego botho goba wa swarwa ka tsela e sego botho, o ka kgona go rarolla bothata bjoo ka go latela keletšo ye e lego go Psalme 4:4 yeo e rego: “Bolelang le nnoši ka dipelong tša lena le le malaong a lena gomme le ikhomolele.” Ka gona pele ga ge o ka fediša segwera, naganišiša. Na mogwera wa gago o dirile seo ka boomo? Ge e ba o sa kgonthišege, ke ka baka la’ng o sa fo nagana gore mogwera wa gago o be a se na maikemišetšo a mabe? Mabakeng a mantši  o ka dumelela ‘lerato gore le bipe dibe tše dintši.’—1 Petro 4:8.

Le gona o ka ba wa lekodišiša ge e ba o ile wa tsenya letsogo go bakeng bothata bjo le nago le bjona. Ka mohlala, ge e ba mogwera wa gago a utollotše sephiri sa gago, na e ka ba e le gore le go tloga mathomong e be e se gabohlale gore o mmotše sona? Taba e nngwe yeo o ka naganišišago ka yona ke ge e ba o itirile gore o kwerwe mohlomongwe ka go bolela kudu goba ka go bolela tša bošilo. (Diema 15:2) Ge e ba go le bjalo, ipotšiše gore: ‘Na ke swanetše go dira diphetogo e le gore mogwera wa ka a tle a ntlhomphe kutšwanyana?’

“Na re ka Boledišana ka Seo se Diragetšego?”

Lega go le bjalo, go thwe’ng ge e ba o ikwa gore o ka se ke wa fo lebala ka taba yeo? Ge e ba go le bjalo, go ka ba kaone gore o boledišane le mogwera wa gago ka yona. Eupša hlokomela gore o se ke wa dira bjalo o galefile. Beibele e re: “Motho yo a galefilego o fehla dikgang, eupša yo a diegago go galefa o fediša ntwa.” (Diema 15:18) Ka gona leta go fihlela o išitše maswafo fase pele ga ge o ka leka go rarolla taba yeo.

 Ge o yo boledišana le mogwera wa gago, gopola gore morero wa gago ga se go yo “bušetša bobe ka bobe.” (Baroma 12:17) Go e na le moo, morero wa gago ke go yo rarolla bothata le go tsošološa segwera sa lena. (Psalme 34:14) Ka gona bolela ka go tšwa pelong. Mohlomongwe o ka re: “E šetše e le nako re le bagwera. Na re ka boledišana ka seo se diragetšego?” Ge o šetše o tseba sebaki sa bothata, go ka ba bonolo go tsošološa segwera seo. Gaešita le ge mogwera wa gago a sa nyake le bolela, o ka kgothatšwa ke gore wena o lekile go tsošološa khutšo.

Mafelelong, kgonthišega gore gaešita le ge “go na le bagwera bao ba ratago go jana ka meno,” go bile go na le “mogwera yo a kgomarelago motho go phala ngwanabo.” (Diema 18:24) Therešo ke gore gaešita le bagwera ba paala ka dinako tše dingwe ba ka ba le diphapano. Ge seo se direga, dira sohle seo o ka se kgonago gore o tsošološe segwera seo. Ruri go ikemišetša go rarolla diphapano ke bohlatse bja gore o ba motho yo mogolo yoo a godilego tsebong.

BALA KA MO GO OKETŠEGILEGO MABAPI LE TABA YE GO BOLUMO 1, KGAOLO 8

KGAOLONG YA RENA YEO E LATELAGO

Tše dingwe tša dithaka tša gago di ka fetša diiri tše dintši di boledišana le batho Inthaneteng. Di gogelwa ke’ng?

[Mongwalo wa tlase]

KEY SCRIPTURE

“Ge e ba go kgonega, go fihla moo go ithekgilego ka lena, ebang le khutšo le batho bohle.”—Baroma 12:18.

KELETŠO

Pele o kitimela go dira diphetho, theetša seo mogwera wa gago a tlago go se bolela ka bothata bjo le nago le bjona.—Diema 18:13.

NA O BE O TSEBA . . . ?

Bagwera ba babotse ba fana nako ya go dira dilo tše dingwe le go ba le bagwera ba bangwe. (Diema 25:17) Ka mo go fapanego, go nyaka go tšea nako ya mogwera wa gago ka moka le go hlwa o na le yena go ka fediša segwera.

KGATO YEO KE TLAGO GO E TŠEA!

Ge e ba ke nyaka go boledišana le mogwera wa ka mabapi le selo se itšego seo a nkwešitšego bohloko ka sona, ke tla thoma ka gore ․․․․․

Gaešita le ge ke galefišitšwe ke seo mogwera wa ka a ntirilego sona, ke tla nyaka go boloka khutšo ka go ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng ka dinako tše dingwe segwera se fela ganyenyane-ganyenyane?

● Ke diphapano tša mohuta ofe tšeo o ka kgonago go di rarolla o nnoši, gomme ke tša mohuta ofe tšeo o tlago go swanelwa ke go boledišana ka tšona le mogwera wa gago yo a go kwešitšego bohloko?

● Ke dithuto dife tše di holago tšeo o ka ithutago tšona phihlelong ya go kwešwa bohloko ke mogwera wa gago?

● Ke megato efe yeo o ka e gatago e le gore o fokotše dikgonagalo tša go kwešwa bohloko ke mogwera wa gago?

[Ntlhakgolo go letlakala 95]

“Ge nkabe go kgonega gore ke gwerane le mogwera wa ka gape, ke be nka se letele gore segwera sa rena e be seo se phethagetšego. Ke be ke tla theetša mogwera wa ka kutšwanyana le go mo thekga gomme ka se lebeledišiše kudu mafokodi a gagwe. Ga bjale ke a kwešiša gore seo se dirago gore segwera se atlege ke go lebeletšana ka katlego le diteko le mathata ao le bago le ona.”​—Keenon

[Seswantšho go letlakala 94]

Segwera seo se fedilego se swana le seaparo seo se gagogilego—eupša bobedi bja tšona di ka lokišwa