Kgaolo 27

Ke ka Baka La’ng ke Ikwa ke Swanetše go Dira Dilo ka Tsela e Phethagetšego?

Na o a ferekana ge o sa hwetše dimaraka tša godimodimo ditlhahlobong tša gago?

□ Ee

□ Aowa

Na o ikwa eka o paletšwe o šoro ge motho yo a itšego a go swaya diphošo ka tsela le ge e le efe?

□ Ee

□ Aowa

Na o hwetša go le thata go dira bagwera goba go ba kgomarela ka gobane go bonagala eka ga ba dire dilo ka tsela yeo o e letetšego?

□ Ee

□ Aowa

GE E ba o arabile ka ee potšišong e tee goba go feta moo go tšeo di lego ka mo godimo, o ka ba o na le bothata bja go nyaka go dira dilo ka tsela e phethagetšego. O ka botšiša gore: ‘Eupša bothata ke’ng ka go leka go dira dilo ka tsela e phethagetšego?’ Bothata ga bo gona. Beibele e reta motho yo a “kgonago mošomo wa gagwe.” (Diema 22:29) Lega go le bjalo, motho yo a nyakago go dira dilo ka tsela e phethagetšego o gapeletša go dira dilo tšeo di sa kgonegego.

 Ka mohlala, Jason wa nywaga e 19 o dumela ka gore: “Ngwageng wa ka wa mafelelo sekolong, ke ile ka nagana gore ge nka se hwetše dimaraka tša godimodimo ditlhahlobong tša ka, gona ke tla ba ke le morutwana yo a tlogago a palelwa. Le gona ke kgona go letša piano, gomme ke be ke fela ke ipotša gore ke swanetše go e letša go swana le baletši ba maemo a godimo ba dikhonsateng.”

Go nyaka go dira dilo ka tsela e phethagetšego go ka ba gwa šitiša motho go hlankela Jehofa. Ela hloko seo se ka diragalelago mofsa yo ka mehla a lebelelwago e le mohlala. Ka ge a dula a šeditšwe ke batho ba bangwe, a ka ikwa eka o sepela godimo ga thapo yeo e tlemilwego sebakabakeng, moo motho yo mongwe le yo mongwe a lebeledišišago kgato e nngwe le e nngwe yeo a e gatago. Ke therešo gore Bakriste ba bafsa le ba bagolo ba holwa ke mehlala e mebotse ya ka phuthegong. Lega go le bjalo, ge mofsa a katanela go dula a dira dilo ka tsela e phethagetšego, a ka lahlegelwa ke lethabo tirelong ya Modimo. Ge e ba seo se ka direga, mofsa yo bjalo o hloka thušo. Eupša a ka fo se e kgopele, a tšhaba gore o tla nyamiša bao ba mo tšeelago godimo. Le gona a ka lekega go lahlela toulo, a nea mabaka ka gore: ‘Ge e ba ke palelwa ke go dira dilo ka tsela e phethagetšego, gona ke sa itshwenyetša’ng?’

Go Lwantšhana le go Nyaka go Dira Dilo ka Tsela e Phethagetšego

Motho yo a nyakago go dira dilo ka tsela e phethagetšego o lwantšhana le kgopolo e fošagetšego ya gore motho ga se a swanela go dira diphošo. Lega go le  bjalo, pono e bjalo e tloga e kgopame. Beibele e bolela ka mo go kwagalago gore: “Bohle ba dirile sebe gomme ba hlaelelwa ke letago la Modimo.” (Baroma 3:23) Ka gona, ga go kgonege gore re phethagale ka kgopolo e feletšego. Ge e le gabotse, go ipotša gore o ka kgona go dira dilo ka tsela e phethagetšego ke gabošilo go swana le go nagana gore o ka kgona go fofa. Le ge o ka ba o kgodišegile gore o ka fofa, o ka se tsoge o fofile!

O ka lwantšha bjang kgopolo ya go nyaka go dira dilo ka tsela e phethagetšego gore e se ke ya laola bophelo bja gago? Leka ditšhišinyo tše di latelago:

Naganišiša lefsa ka seo go atlega go se bolelago go wena. Na o itapiša ka go leka go phala batho ba bangwe? Beibele e re maiteko a bjalo a ka swana le “go kitimiša phefo.” (Mmoledi 4:4) Ntlha ke gore, ke batho ba sego kae bao ba atlegago tabeng yeo re ka rego ke go phala ba bangwe. Le gona, le ge e ba seo se direga, gantši e fo ba ka nakwana ke moka gwa tla motho yo mongwe yo a ba phalago kutšwanyana. Go atlega go bolela go dira seo o ka se kgonago—e sego go phala motho yo mongwe.—Bagalatia 6:4.

 Eba le pono e lekalekanego. Dilo tšeo o di letetšego go wena di swanetše go lekana le bokgoni bja gago le mafokodi a gago. Go ipeela dipakane tšeo o ka se di fihlelelego go ka bontšha gore ga o na boipoetšo—gaešita le gore o ipona o le bohlokwa kudu go feta batho ba bangwe. Moapostola Paulo o re nea keletšo e botse yeo e rego: “Ke botša yo mongwe le yo mongwe gare ga lena gore a se ke a ikgopola kudu go feta kamoo go nyakegago gore a nagane ka gona.” (Baroma 12:3) Ka gona, eba le tekatekano. Naganišiša lefsa ka dilo tšeo o di letetšego go wena. Katanela go dira seo o ka se kgonago, e sego go dira dilo ka tsela e phethagetšego.

 O se ke wa tšeela dilo godimo ka mo go feteletšego! Leka go dira dilo tšeo o sa kgonego go di dira, go swana le go letša seletšo se itšego sa mmino. Therešo ke gore o tlo dira diphošo tše dintši. Lega go le bjalo, mo nakong ye leka go lebelela diphošo tša gago ka leihlo le lengwe. Beibele e re go na le “nako ya go sega.” (Mmoledi 3:4) Ka gona ke ka baka la’ng o sa leke go itshega ge o dirile diphošo? Go dira bjalo go tla go thuša go lemoga gore go dira diphošo e fo ba e le tsela ya go ithuta. Ke therešo gore o ka thatafalelwa ke go amogela gore le wena o dira diphošo. Eupša katanela go ntšha ka monaganong wa gago dikgopolo tše di go nyamišago le tše di fošagetšego.

Ka mehla o gopole gore Jehofa ga se a letela gore re dire dilo ka tsela e phethagetšego; o letetše feela gore re mmotegele. (1 Bakorinthe 4:2) Ge e ba o katanela go botega, o ka thabišwa e le ka kgonthe ke seo o lego sona—gaešita le ge o sa dire dilo ka tsela e phethagetšego.

KGAOLONG YA RENA YEO E LATELAGO

Lehono bosodoma bo amogelwa ka gohle. O ka bo phema bjang? Go thwe’ng ge e ba o na le dikganyogo tša bosodoma?

KEY SCRIPTURE

“Lefaseng ga go motho yo a lokilego yo a dirago seo se lokilego gomme a sa dire sebe.”—Mmoledi 7:20.

KELETŠO

Nagana ka mošomo wo o bego o dikadika go o dira e le feela ka gobane o be o tšhaba gore o ka se o dire ka tsela e phethagetšego. Ke moka bea letšatši leo o tlago go o dira ka lona.

NA O BE O TSEBA . . . ?

Jehofa o phethagetše, eupša ge a dirišana le rena batho ba sa phethagalago, ga a letele gore re dire dilo ka tsela e phethagetšego. O na le tekatekano e bile o kwešiša mafokodi a rena.

KGATO YEO KE TLAGO GO E TŠEA!

Ge ke thoma go itshwaya diphošo ka mo go feteletšego, ke tla ․․․․․

Ge ke thoma go swaya ba bangwe diphošo ka mo go feteletšego, ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke dikarolong dife tša bophelo, ge e ba di le gona, tšeo o nago le go ipeela dipakane tšeo o ka se kgonego go di fihlelela?

● Ke ditemana dife tša Beibele tšeo di go bontšhago gabotse gore Jehofa Modimo ga se a letela gore bahlanka ba gagwe ba dire dilo ka tsela e phethagetšego?

● Ke ka baka la’ng batho ba bangwe ba ka go katoga ge e ba o na le mokgwa wa go nyaka gore dilo di dirwe ka tsela e phethagetšego?

● Nakong e tlago o tla itshwara bjang ge o dira diphošo?

[Ntlhakgolo go letlakala 226]

“Go dira sohle seo o ka se kgonago le go nyaka go dira dilo ka tsela e phethagetšego ke dilo tše pedi tše di sa swanego; mokgwa wa pele o bontšha go ba le tekatekano mola o mongwe o se bjalo.”—Megan

[Lepokisi go letlakala 228]

Kamoo go Nyaka go Dira Dilo ka Tsela e Phethagetšego go Kgomago Segwera

Na o katogile batho ka gobane ba sa phele go ya kamoo o letetšego ka gona? Goba na batho ga ba nyake go gwerana le wena ka gobane dilo tšeo o di letetšego go bona di bonagala di sa kgonege? Beibele e re eletša ka gore: “O se itire yo a lokilego kudu goba wa ipontšha o le yo a hlalefilego kudu. O re’ng o itshenya?” (Mmoledi 7:16) Tsela e nngwe yeo motho yo a nyakago gore dilo di dirwe ka tsela e phethagetšego a dirago gore batho ba mo katoge, ke ka go ikarola bathong bao mohlomongwe ba ka thabelago go ba le yena. Ngwanenyana yo a bitšwago Amber o re: “Ga go na motho yo a nyakago go ba gare ga batho bao ba mo dirago gore a ikwe a nyatšega, e bile ke bone batho bao ba nyakago gore dilo di dirwe ka tsela e phethagetšego ba lahlegelwa ke bagwera ba babotse ka baka la dilo tše di sa rego selo.”

[Seswantšho go letlakala 229]

Go leka go dira dilo ka tsela e phethagetšego ke ga lefeela go fo swana le go leka go fofa