Kgaolo 28

Nka Phema Bjang Bosodoma?

“Ge ke be ke le nywageng ya mahlalagadi, ke be ke lwantšhana le maikwelo a go kgahlegela bašemane ba bangwe. Ka pelong ke be ke tseba gore maikwelo ao e be e se a tlhago.”—Olef.

“Nna le mogwera wa ka wa ngwanenyana re ile ra atlana ka makga a sego kae. Ka ge ke be ke kgahlwa le ke bašemane, ke ile ka ipotšiša ge e ba ke le motho yo a kgahlegelago banenyana le bašemane.”—Sarah.

KE BATHO ba sego kae feela bao ba ka ganago gore lehono bosodoma go bolelwa ka bjona ka bolokologi kudu go feta nywaga e 30 go ya go e 40 e fetilego. Le gona ge o ka leka go bolela gampe ka bjona, ga go na pelaelo gore o tla ikgokela go swaiwa diphošo kudu! Amy wa nywaga e 16 o re: “Ngwanenyana yo mongwe o ile a mpotša gore ke swanetše go ba ke kgetholla le batho ba merafo e mengwe, ka gobane pono ya ka ka bosodoma e swana le go ba le kgethollo!”

Mekgwa ya lehono ya go tlogelela dilo e dirile gore bafsa ba bantši ba ratane le batho ba bong bjo bo swanago le bja bona. Becky wa nywaga e 15 o re: “Banenyana ba bantši ba sekolong sa gešo ba ipolela gore ba ratana le banenyana, gore ke batho bao ba ratanago le bašemane le banenyana goba bao ba nyakago go kwa gore go bjang go ba le thobalano le batho ba bong ka moka.” Christa wa nywaga e 18 o hwetša boemo e le bjo bo swanago sekolong sa gabo. O re: “Banenyana ba babedi bao ke tsenago le bona ka klaseng ba ile ba nkgopela gore ke robale le bona. Yo mongwe wa bona o ile a nngwalela lengwalo a mpotšiša ge e ba ke nyaka go bona gore go bjang go ba le thobalano le ngwanenyana.”

Ka ge ka go ratana ga batho ba bong bjo bo swanago go  bolelwa ka gona phatlalatša, o ka thoma go ipotšiša gore: ‘Na bosodoma ruri bo fošagetše? Go thwe’ng ge e ba ke kgahlegela motho wa bong bjo bo swanago le bja ka? Na seo se ra gore ke motho yo a ratanago le batho ba bong bjo bo swanago le bja ka?’

Modimo o Lebelela Bjang Bosodoma?

Batho ba bantši lehono—gaešita le baruti ba bangwe—ba nyenyefatša taba ya bosodoma. Lega go le bjalo, Lentšu la Modimo e lego Beibele ga le re tlogele re gakanegile ka taba ye. Le re botša gore Jehofa Modimo o bopile monna le mosadi le gore o rerile gore dikganyogo tša thobalano di kgotsofatšwe feela magareng ga monna le mosadi bao ba nyalanego. (Genesi 1:27, 28; 2:24) Ka gona ga go makatše ge Beibele e sola ditiro tša bosodoma.—Baroma 1:26, 27.

Batho ba bangwe ba ka re Lentšu la Modimo le fetilwe ke nako. Eupša o nagana gore ke ka baka la’ng ba akgofela go bolela seo? Na e ka ba e le ka gobane pono ya Beibele e thulana le pono ya bona? Batho ba bantši ba gana Lentšu la Modimo feela ka gobane le ruta selo se se fapanego le seo ba nyakago go se dumela. Lega go le bjalo, taba ya gore Lentšu la Modimo le fetilwe ke nako e kgopame e bile ga se ra swanela go e dumelelela e re tutuetša!

Eupša go thwe’ng ge e ba o ikwa o kgahlegela motho wa bong bjo bo swanago le bja gago? Na se se ra gore o mosodoma? Aowa. Gopola gore o ‘lebakeng la bofsa,’ e lego nako yeo ka yona dikganyogo tša thobalano di fo go itlela. (1 Bakorinthe 7:36) Ge e ba ka dinako tše dingwe o ikwa o kgahlegela motho wa bong bjo bo swanago le bja gago, kgodišega gore se ga se re gore o mosodoma. Gantši maikwelo a bjalo a a fela ge nako e dutše e eya. Mo nakong ye, o swanetše go phema go itshwara ka tsela ya bosodoma. Bjang?

Rapela ka taba yeo. Lopa Jehofa go etša Dafida yo a itšego: “Mphetleke o tsebe pelo ya ka, hle Modimo. Ntlhahlobe o  tsebe dikgopolo tša ka tše di mpherekanyago, o bone ge e ba go nna go na le tsela e kwešago bohloko, o ntlhahle tseleng ya go iša mehleng ya neng le neng.” (Psalme 139:23, 24) Jehofa a ka go matlafatša ka go go nea khutšo yeo e “fetago kwešišo yohle ya batho.” Se se ka ‘diša pelo ya gago le matla a gago a monagano’ gomme sa go nea “matla a fetago a tlwaelegilego” go go thuša gore o se ke wa kgotsofatša dikganyogo tše di fošagetšego.—Bafilipi 4:6, 7; 2 Bakorinthe 4:7.

Tlatša monagano wa gago ka dikgopolo tše di agago. (Bafilipi 4:8) Bala Beibele ka mehla. O se ke wa nyatša matla a yona a go tutuetša monagano wa gago le pelo gore o dire dilo tše dibotse. (Baheberu 4:12) Lesogana leo le bitšwago Jason le re: “Beibele—go akaretša le mangwalo a bjalo ka 1 Bakorinthe 6:9, 10 le Baefeso 5:3—e ile ya nkgoma kudu. Ke bala mangwalo a le ge e le neng ge ke eba le dikganyogo tše di fošagetšego.”

Phema diswantšho tše di kgothaletšago bootswa le selo le ge e le sefe seo se kgothaletšago bosodoma. (Bakolose 3:5) Phema selo le ge e le sefe seo se tlago go tsoša dikganyogo tše di gobogilego. Se se tla akaretša diswantšho tše di kgothaletšago bootswa, mananeo a itšego a thelebišene le difilimi, mohlomongwe gaešita le dimakasine tšeo di bontšhago batho ba difešene bao ba nyakilego ba sa apara goba bao ba itšhidullago ka go kuka ditšhipi. Dira gore dikgopolo tše di sa hlwekago di tšeelwe legato ke tšeo di hlwekilego. Mošemane yo mongwe yo a lego mahlalagading o re:  “Nako le nako ge ke eba le dikganyogo tša bosodoma, ke naganišiša ka temana ya Beibele yeo ke e ratago.”

Ke therešo gore ba bangwe ba re ga go nyakege gore o dire dilo tše ka moka, ba re o swanetše go fo amogela dikganyogo tša gago tša mohuta le ge e le ofe tša thobalano le go amogela seo o naganago gore o sona. Eupša Beibele e re o ka kgona go fenya dikganyogo tša gago tše di fošagetšego. Ka mohlala, e re botša gore ba bangwe ba Bakriste ba lekgolong la pele la nywaga bao pele e bego e le basodoma ba ile ba fetoga. (1 Bakorinthe 6:9-11) Le wena o ka fenya ntwa ye—gaešita le ge mo nakong e le feela ntwa ya ka monaganong.

Go thwe’ng ge e ba dikganyogo tša go kgahlegela batho ba bong bjo bo swanago le bja gago di phegelela? O se ke wa ineela go tšona! Jehofa o hloile mekgwa ya bosodoma. Ka go re’alo, motho yo a lwantšhanago le dikganyogo tša go kgahlegela batho ba bong bjo bo swanago le bja gagwe o na le pakane yeo e fihlelelegago—a ka kgetha go se kgotsofatše dikganyogo tšeo.

Ka mohlala: Motho a ka ba a na le tshekamelo ya go ‘befelwa.’ (Diema 29:22) Mohlomongwe nakong e fetilego o be a ineela gabonolo go tlalelaneng ka bogale. Lega go le bjalo, ka morago ga go ithuta Beibele o thoma go lemoga go nyakega ga gore a be le boitshwaro. Na se se ra gore a ka se sa hlwa a tlalelana ka bogale? Aowa. Lega go le bjalo, ka ge a tseba seo Beibele e se bolelago ka bogale bjo bo sa laolegego, o tla katana ka matla gore a se ineele maikwelong a gagwe.

Go bjalo le ka motho yo a ikwago a kgahlegela batho ba bong bjo bo swanago le bja gagwe eupša ga bjale a ithutile seo Beibele  e se bolelago ka mekgwa ya bosodoma. Ka dinako tše dingwe, kganyogo yeo e fošagetšego e sa dutše e ka mo tlela. Eupša ka go lebelela bosodoma ka tsela yeo Jehofa a bo lebelelago ka yona, motho yoo a ka hwetša matla a go lwantšhana le kganyogo yeo.

O se ke wa Lahlela Toulo!

Ge e ba o lwantšhana le dikganyogo tša go kgahlegela batho ba bong bjo bo swanago le bja gago, o ka ikwa go swana le lesogana le lengwe leo le boletšego gore: “Ke lekile go fetoša maikwelo a ka. Ke rapetše Jehofa gore a nthuše. Ke badile Beibele. Ke kwele dipolelo tše di theilwego Beibeleng tšeo di bolelago ka taba ye. Ga ke sa tseba gore ke dire eng.”

Ge e ba o le boemong bjo bo swanago, gona o lebeletšane le ntwa ya mahlo a mahwibidu. Ga se ntwa yeo o ka e fenyago gabonolo. Lega go le bjalo, motho le ge e le ofe yo a kganyogago go kgahliša Modimo o swanetše go latela ditekanyetšo tša Gagwe tša boitshwaro le go phema boitshwaro bjo bo gobogilego, gaešita le ge go dira bjalo go ka ba thata kudu. Le ka mohla o se ke wa lebala gore Modimo o kwešiša ntwa yeo o e lwago ka monaganong wa  gago le gore o kwela bohloko bao ba mo hlankelago. * (1 Johane 3:19, 20) Ge o ekwa ditaelo tša Modimo, o dira gore a tle a go šegofatše. Ge e le gabotse, go lota ditaelo tša Modimo “go na le moputso o mogolo.” (Psalme 19:11) Gaešita le gona bjale, o tla thabela tsela e kaonekaone ya go phela lefaseng le leo le nago le mathata.

Ka gona, ithekge ka Modimo gomme o lwantšhe dikganyogo tše di fošagetšego. (Bagalatia 6:9) Katanela go ‘hlaswa se kgopo’ gomme o “kgomarele go se sebotse.” (Baroma 12:9) Ge nako e dutše e eya e bile o dira boiteko, o tla hwetša gore ga o sa ba le dikganyogo tše di fošagetšego. Se se kaone le go feta ke gore ge o phema mekgwa ya bosodoma, o tla ba le tebelelo ya go phela ka mo go sa felego lefaseng le lefsa la Modimo la go loka.

KGAOLONG YA RENA YEO E LATELAGO

O ka laola bjang maikwelo a go kgahlegela batho ba bong bjo bo fapanego le bja gago?

[Mongwalo wa tlase]

KEY SCRIPTURE

“Ntlhahlobe o tsebe dikgopolo tša ka tše di mpherekanyago, o bone ge e ba go nna go na le tsela e kwešago bohloko.”—Psalme 139:23, 24.

KELETŠO

E le gore o be le pono e nepagetšego ka bonna, ithute mohlala wa Jesu. (1 Petro 2:21) E be e le mohlala o phethagetšego wa motho yo a nago le matla a bonna ao a sepedišanago le boleta.

NA O BE O TSEBA . . . ?

Gaešita le ge mohlomongwe o sa kgone go laola dikganyogo tša gago ka mo go feletšego, eupša o kgona go laola ditiro tša gago. O ka kgetha go se kgotsofatše dikganyogo tše di fošagetšego.

KGATO YEO KE TLAGO GO E TŠEA!

Ge e ba motho yo mongwe a mpotšiša lebaka leo ka lona Beibele e solago bosodoma, ke tla re ․․․․․

Ge e ba motho yo mongwe a re Beibele ga e na pono e bulegilego ka bosodoma, ke tla mo nea mabaka ka gore ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng Modimo a hloile bosodoma?

● Ke megato efe e šomago yeo o ka e gatago e le gore o se ke wa tanywa ke bosodoma?

● Na go ba le pono ya Modimo ka bosodoma go ra gore o hloile basodoma?

[Ntlhakgolo go letlakala 236]

“Tsela e kgopamego ya lefase ya go nagana e kgomile tsela yeo ke bego ke nagana ka yona gomme ya dira gore ke gakanege le go feta tabeng ya ge e ba ke le motho yo a kgahlegelago batho ba bong bjo bo swanago le bja ka. Ga bjale ke phema selo le ge e le sefe goba motho le ge e le ofe yo a kgothaletšago bosodoma.”—Anna

[Seswantšho go letlakala 233]

Bafsa ka moka ba lebeletšane le kgetho—e ka ba go amogela pono e gobogilego ya lefase ka thobalano goba go latela tsela e hlwekilego ya boitshwaro yeo e lego ka Lentšung la Modimo