Molaetša go Batswadi

Go bafsa, go phatša nywageng ya mahlalagadi go ka swana le go sepela thapong e tlemilwego sebakabakeng. Ba ka bonagala ba sa kgonthišege ka kgato e nngwe le e nngwe e bile e ba boifiša. Ka ge le le batswadi, ka dinako tše dingwe le ka kganyoga gore nkabe le kgona go dira gore bana ba lena ba se ke ba lebeletšana le seo. Therešo ke gore le ka se kgone, eupša le ka ba thuša gore ba se ke ba wa. Ke lena batswadi le ka thušago bana ba lena kudu gore ba kgomarele tsela e nepagetšego, ba phatše nywageng ya mahlalagadi gomme e tle e be batho ba bagolo bao ba nago le boikarabelo.

Na le ipotša gore seo go bonolo go se bolela go e na le go se dira? Le nepile. Go ka bonagala eka ke malobanyana mo ge morwa wa lena e be e le ngwana wa matšato yo a bego a sa kgaotše go bolela; ga bjale ke mofsa yo a homotšego yo a sa nyakego go bolela le lena. Ga se kgale ge morwedi wa lena a be a nyaka go sepela le lena gohle mo le yago; ga bjale o bonagala a lewa ke dihlong tša go bonwa a na le batswadi ba gagwe!

Lega go le bjalo, ga se la swanela go ikwa le sa swanelege go thuša ngwana wa lena ge le lebeletšane le diphetogo tše. Le ka hwetša bohlale bjo bo ka neago lena le bana ba lena tlhahlo ya kgonthe. Mothopo wa bohlale bjoo ke Lentšu la Modimo e lego Beibele.

Puku ye ya Dipotšišo tša Bafsa le Dikarabo tše Šomago, Bolumo 2, e hlametšwe go nea bana ba lena mabaka a kwagalago ao a tšwago ka Mangwalong. Ge le ka lebelela Dikagare go matlakala 4 le 5, le tla hwetša seetšanyana ka ditaba tše di fapafapanego tšeo di ahlaahlwago ka pukung ye. Eupša puku ye e tla dira se se fetago go fo le botša ditherešo tša bophelo. Elang hloko dintlha tše di latelago:

(1) Puku ye e dira gore mmadi a tšee karolo. Mafelong a mantši bana ba lena ba tla kgothaletšwa go ngwala dikarabo tša bona dipotšišong le mafokong a fapafapanego. Ka mohlala, lepokisi leo le rego, “Tsela ya go Itokišetša go Lebeletšana le Kgateletšo ya Dithaka” le le lego go matlakala 132 le 133 le tla thuša bana ba lena go nagana ka ditlhohlo tše itšego tšeo ba lebanago le tšona le ditsela  tšeo ba ka arabelago ka tšona. Go oketša moo, dikarolo ka moka tše senyane tša puku ye di phetha ka letlakala leo le nago le sehlogo se se rego, “Pego ya ka” leo go lona bana ba lena ba ka ngwalago dikgopolo le maikwelo a bona mabapi le ditaba tšeo di ahlaahlilwego karolong yeo.

(2) Puku ye e kgothaletša poledišano. Ka mohlala, go matlakala 63 le 64 go na le lepokisi leo le rego, “Nka Boledišana Bjang le Tate Goba Mma ka Thobalano?” Le gona, mafelelong a kgaolo e nngwe le e nngwe go na le lepokisi leo le rego, “O Nagana Eng?” Lepokisi le ga e fo ba poeletšo, eupša le ka dirišwa gape bakeng sa poledišano ya lapa. Go oketša moo, kgaolo e nngwe le e nngwe e na le karolo yeo e rego, “Kgato yeo ke Tlago go e Tšea!” yeo e phethago ka lefoko leo mofsa a kgopelwago go le feleletša leo le rego: “Seo ke tlago go botšiša motswadi wa ka goba batswadi ba ka ka taba ye ke gore . . . ” Lefoko le le tla kgothaletša bafsa go kgopela keletšo e lekalekanego go batswadi ba bona ge ba dutše ba phatša nywageng e thata ya mahlalagadi.

Temošo še: E le go kgothaletša bana ba lena bao ba lego mahlalagading go ngwala ka dipukung tša bona ka bolokologi, le se ke la nyaka go tseba seo ba se ngwadilego. Ka morago ba ka phuthologa gomme ba le botša maikwelo a bona ka ditaba tšeo ba di ngwadilego.

Ikhweletšeng dikopi tša puku ye gomme le e baleng ka kelohloko. Ge le dutše le bala, lekang go gopola pherekano, kgakanego le dipelaelo tšeo le bilego le tšona ge le be le le mahlalagading. Ge go swanetše, botšang barwa goba barwedi ba lena diphihlelo tša lena. Seo se tla kgothaletša bana ba lena gore ba le ntšhetše sa mafahleng. Ge ba bolela, theetšang! Ge e ba maiteko a go boledišana le bona a bonagala a sa atlege, le se ke la lahlela toulo. Gaešita le ge bana ba ka le bontšha gore ga ba na taba le keletšo ya lena, gantši ba tšeela godimo keletšo ya lena go feta ya dithaka tša bona.

Re thabela go nea lena le bana ba lena puku ye yeo e theilwego Beibeleng gomme re rapelela gore e be tšhegofatšo ka malapeng a lena.

Bagatiši