Kgaolo 14

Nka Itšhireletša Bjang Sekolong?

Araba mafoko a latelago ka therešo goba maaka:

1. Go ba mphenyašilo go akaretša feela go kweša batho ba bangwe bohloko mmeleng.

□Therešo

□Maaka

2. Ka mehla go tshwenywa ka tša thobalano go akaretša go kgomana le motho yo mongwe.

□Therešo

□Maaka

3. Banenyana le bona ba ka kgona go ba bomphenyašilo le go tlaiša batho ba bangwe.

□Therešo

□Maaka

4. Ge e ba o tshwenywa ke bomphenyašilo goba o tshwenywa ka tša thobalano, ga go na seo o ka se dirago ka taba yeo.

□Therešo

□Maaka

 GO BOIFA ke selo seo bafsa ba dimilione bao ba tshwenywago sekolong ba lebeletšanago le sona letšatši le letšatši. Mofsa yo a bitšwago Ryan o re: “Leeto la pese la metsotso e 15 le ile la fetoga tlaišo yeo e ilego ya bonagala e tšea diiri tše dintši ge batlaiši ba ka ba be ba se sa ntlaiša ka mantšu feela eupša ba ntlaiša le mmeleng.” Bafsa ba bangwe ba tshwenywa ka tša thobalano. Anita o re: “Mošemane yo a tumilego kudu o ile a nthibelela tsejaneng ya meagong ya sekolong gomme a thoma go ntshwaratshwara ka tsela e sa swanelago. Go mo kgopela ka botho gore a se ke a ntshwaratshwara ga se gwa ka gwa thuša ka selo. O be a sa nagane gore ke be ke tloga ke tiišitše.”

Bafsa ba bangwe ba tshwenywa Inthaneteng ke bao ba tsenago le bona ka klaseng. Na le wena o swarwa gampe? Ge e ba go le bjalo, o ka dira’ng ka boemo bjoo bjo thata? O ka dira mo gontši! Eupša sa pele, anke re aroganye maaka le therešo ka go sekaseka mafoko ao a lego mathomong a kgaolo ye.

1. Maaka. Bomphenyašilo ba bantši ba diriša mantšu, e sego diatla. Ditšhošetšo, maroga, dikgegeo le dikwero e ka ba mekgwa ya bomphenyašilo.

2. Maaka. Gaešita le go reta motho ka tsela yeo e sekametšego go tša thobalano, go dira metlae e lešago dihlong goba go ponyetša motho leihlo ka tsela ya go mo kganyoga e ka ba go tshwenywa ka tša thobalano.

3. Therešo. Bomphenyašilo le bao ba tshwenyago ba bangwe e ka ba batho ba bong ka moka.

4. Maaka. O ka gata megato e itšego gore o kgaotše go swarwa gampe. Anke re bone kamoo o ka dirago seo ka gona.

Kamoo o ka Fenyago Mphenya-šilo Ntle le go Diriša Diatla

Bomphenyašilo ba bangwe ba ka go tshwenya ka boomo e le gore  ba fo bona kamoo o tlago go arabela ka gona. Eupša Beibele e nea keletšo e bohlale yeo e rego: “O se ke wa akgofela go kgopišega moyeng.” (Mmoledi 7:9) Taba ke gore go “bušetša bobe ka bobe” go ka gakatša boemo gomme gwa lebiša mathateng a mangwe. (Baroma 12:17) Ka gona, o ka fenya bjang mphenyašilo ntle le go diriša diatla?

O se ke wa tšeela hlogong mantšu a mphenyašilo. Ge e ba o kwerwa e le feela gore batho ba go sege, le wena leka go sega go e na le gore o kgopišege. Mošemane yo a bitšwago Eliu o re: “Ka dinako tše dingwe tsela e kaonekaone ke ya gore o se tšeele hlogong mantšu ao a sego botho.” Ge e ba mphenyašilo a lemoga gore mantšu a gagwe ga a go kgopiše, a ka kgaotša go go tlaiša.

Eba boleta. Beibele e re: “Karabo ge e le boleta e phohliša pefelo.” (Diema 15:1) Mphenyašilo ga a letele gore o mo arabe ka botho gomme seo se ka okobatša boemo bjo bo sa kgahlišego. Ke therešo gore go nyakega boitshwaro gore o dule o theošitše maswafo ge o hlaselwa. Eupša ka mehla go dira bjalo ke tsela e kaone. Diema 29:11 e re: “Setlaela se ntšha bogale bja sona ka moka, eupša yo bohlale o thekga ditho go fihla mafelelong.” Go ba boleta ke leswao la gore motho o kgona go ema ka go tia. Motho yo boleta ga a šikinyege gabonolo, mola mphenyašilo gantši a sa ikholofele, a ferekana goba gaešita le go tshwenyega. Ke ka lebaka le  lebotse ge Beibele e re: “Yo a diegago go galefa o phala mogale.”—Diema 16:32.

Itšhireletše. Ge go bonagala boemo bo etšwa taolong, go ka nyakega gore o hwetše tsela ya go tloga moo. Diema 17:14 e re: “O tloge pele ga ge ntwa e ka thoma.” Ka gona, ge e ba go bonagala eka go tla tsoga ntwa, gona tloga goba o tšhabe. Ge e ba go tšhaba go sa kgonege, go ka nyakega gore o itšhireletše kotsing ka tsela yeo o ka kgonago ka yona.

Bega taba yeo. Batswadi ba gago ba na le tshwanelo ya go tseba ka seo se diregago. Le gona ba ka go nea keletšo e holago. Ka mohlala, ba ka šišinya gore o boledišane le morutiši ka taba yeo. Kgonthišega gore batswadi ba gago le barutiši ba ka swaragana le taba yeo ka bohlale, ntle le gore ba go tsenye mathateng a mangwe.

Tabakgolo ke efe? Ke gore mphenyašilo a ka se fenye ge e ba o sa arabele ka tsela yeo a e letetšego. Ka gona, o se ke wa mo dumelela a go galefiša. Go e na le moo, laola boemo bjoo ka go diriša ditšhišinyo tšeo re boletšego ka tšona.

Go Lebeletšana le go Tshwenywa ka tša Thobalano

Ge e ba o tshwenywa ka tša thobalano, ke ga tlhago gore o ikwe o galefile! Potšišo ke gore: O ka dira’ng ka seo? O ka dira mo gontši! O ka latela ditšhišinyo tše tše sego kae.

 Gana ka go tia dikgoketšo tša go ba le thobalano. Batho bao ba tshwenyago ba bangwe ka tša thobalano ba ka nagana gore ge o gana dikgoketšo tša bona o se wa tiiša ka ganong go ra gore o a dumela—goba go ra gore o ka dumela—ntle le ge e ba o ba kgodiša gore o nyaka ba kgaotša seo. Ka gona, aowa ya gago e be aowa. (Mateo 5:37) Ge e ba o thoma ka go segasega goba o dira tše ekego o lewa ke dihlong, seo se ka nea motho yo a go tshwenyago kgopolo ya gore o thabela seo. Gana ka go tia gomme o bolele ka go lebanya. Yeo ke tsela e kaonekaone yeo o ka itšhireletšago ka yona!

Mo hlabiše dihlong. Mofsa yo a bitšwago Anita o bolela ka motho yo a bego a mo tshwenya gore: “Ke ile ka swanelwa ke go mo hlabiša dihlong pele ga bagwera ba gagwe ka go mmotša ka go hlaboša gore A SE KE a ntshwaratshwara ka tsela yeo!” Mafelelo e bile afe? O re: “Bagwera ba gagwe ka moka ba ile ba mo sega. O ile a ntlhokomologa ka nakwana, eupša ka morago ga matšatši a sego  kae a kgopela tshwarelo ka seo a se dirilego gomme ka morago a ba a ntšhireletša ge motho yo a itšego a be a leka go ntshwenya.”

Ge e ba mantšu a sa šome, tloga moo. Tsela e nngwe e kaonekaone ke gore o tšhabe. Ge e ba go tšhaba go sa kgonege, gona o na le tshwanelo ya go lwantšha motho yoo a go tshwenyago ka tša thobalano. (Doiteronomio 22:25-27) Ngwanenyana yo mongwe wa Mokriste o re: “Ge mošemane yo a itšego a be a leka go ntshwara, ke ile ka mo itia ka matla ka letsogo ke moka ka tšhaba!”

Botša motho yo mongwe ka taba yeo. Adrienne wa nywaga e 16 o dumela ka gore: “Se ke seo mafelelong ke ilego ka swanelwa ke go se dira. Ke ile ka kgopela keletšo go batswadi ba ka ge mošemane yo ke bego ke nagana gore ke mogwera wa ka a be a hlwa a ntšhetše morago. Ge ke be ke gana seo a bego a se dira, ke moo a bego a phegelela kudu, go šetše go le bjalo ka ge eka re bapala papadi e itšego.” Batswadi ba Adrienne ba ile ba mo nea keletšo e šomago yeo e ilego ya mo thuša go lebeletšana le bothata bjoo. Ga  go na pelaelo gore le wena batswadi ba gago ba ka go thuša.

Go swanelwa ke go lebeletšana le bomphenyašilo goba go tshwenywa ka tša thobalano ga go bonolo. Eupša dula o gopola se: Bafsa ba Bakriste ga se ba swanela go ba bahlaselwa bao ba sa kgonego go ikemela ge ba tshwenywa ke bomphenyašilo; e bile ga se ba swanela go kgotlelela goba go tanywa ke dikgoketšo tša batho bao ba tshwenyago ba bangwe ka tša thobalano. Ka go gata megato yeo go boletšwego ka yona, o ka kgona go lebeletšana le ditlhohlo tše.

BALA KA MO GO OKETŠEGILEGO MABAPI LE TABA YE GO BOLUMO 1, KGAOLO 18

KGAOLONG YA RENA YEO E LATELAGO

Kgateletšo ya dithaka ke e nngwe ya dilo tše matla kudu tšeo o swanetšego go lebeletšana le tšona. Ithute kamoo o ka lebeletšanago le yona ka kgodišego.

KEY SCRIPTURE

“Ge e ba go kgonega, go fihla moo go ithekgilego ka lena, ebang le khutšo le batho bohle.”—Baroma 12:18.

KELETŠO

Ge e ba o tshwenywa ke bomphenyašilo, bolela le bona o tiišitše ka ganong eupša o se ke wa ba bogale. Ka go tia botša mphenyašilo gore a kgaotše go go tshwenya. Tloga boemong bjoo o išitše maswafo fase. Ge e ba o tšwela pele o tshwenywa, gona bega taba yeo.

NA O BE O TSEBA . . . ?

Go apara diaparo tša mmala o itšego wa dihlopha tša disenyi goba diaparo tša mohuta o itšego tša dihlopha tšeo go ka dira gore o hlaselwe. Yo e kilego ya ba setho sa sehlopha sa disenyi o re: “Ge e ba motho yo a itšego a apere go swana le rena eupša e se yo mongwe wa rena, go na le kgonagalo e kgolo ya gore a hlaselwe. O tla swanelwa ke gore e be setho sa sehlopha sa rena goba go sego bjalo o tla itiwa.”

KGATO YEO KE TLAGO GO E TŠEA!

Ge e ba motho yo a itšego a leka go nkgalefiša goba go nthumola, ke tla ․․․․․

E le gore ke pheme go ipakela mathata, ke tla ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● O ka ba bjang le kgodišego e oketšegilego le go itshwara ka seriti ka go re’alo wa fokotša kgonagalo ya go tshwenywa ke bomphenyašilo?

● O ka dira’ng ge e ba o tshwenywa ka tša thobalano? (Nagana ka a mangwe a maemo ao o ka lebeletšanago le ona le ditsela tšeo o ka arabelago ka tšona.)

● Ke ka baka la’ng o se wa swanela go tšea gabohwefo taba ya go tshwenywa ka tša thobalano?

[Ntlhakgolo go letlakala 123]

“Ge e ba o tseba gore go tlo lwewa, gona o swanetše go šetša ditaba tša gago ke moka o ye gae. Ba bangwe ba a dula ba bogela gomme ke moo ba tsenago mathateng.”—Jairo

[Lepokisi go letlakala 125]

kamoo o ka thibelago go tshwenywa ka tša thobalano

O se ke wa bapala ka lerato. Ge e ba o dira bjalo go ra gore o nyaka go tshwenywa. Beibele e botšiša gore: “Na motho a ka gokolela mollo sehubeng sa gagwe gomme diaparo tša gagwe tša se swe?” (Diema 6:27) Therešo ke gore go bapala ka lerato go swana le go bapala ka mollo.

Hlokomela batho bao o gweranago le bona. Go tla naganwa gore ditekanyetšo tša gago tša boitshwaro di swana le tša bagwera ba gago. Ngwanenyana yo a bitšwago Carla o re: “Ge e ba o gwerana le batho bao ba ineelago dikgoketšong tša thobalano goba bao ba thabelago go šetšwa, gona le wena o tla tshwenywa.”—1 Bakorinthe 15:33.

Šetša tsela yeo o aparago ka yona. Go se apare ka bothakga go romela molaetša wa gore o tloga o kganyoga go kgahlegelwa ke batho ba bong bjo bo fapanego le bja gago—gomme o tla hwetša seo o se nyakago.—Bagalatia 6:7.

O se ke wa uta gore o Mokriste. Ge e ba o uta seo, ga go na motho yo a tlago go ba le lebaka la go letela gore o phele ka ditekanyetšo tša Bokriste tša boitshwaro.—Mateo 5:15, 16.

[Seswantšho go letlakala 124]

Go arabela ka bogale ditšhošetšong tša mphenyašilo go swana le go tšhela peterole mollong

[Seswantšho go letlakala 127]

Botša motho yo a go tshwenyago ka tša thobalano gore a kgaogane le wena!