Selalelong sa gagwe sa mafelelo le baapostola ba gagwe, Jesu o ba rutile thuto e botse ya tirelo ya boikokobetšo ka go ba hlapiša dinao. Ke ka baka la’ng seo se swanela? Ka baka la bofokodi bjo ba bego ba bo bontšha. Ba ineetše go Modimo, fela ba sa tshwenyegile ka gore ke mang mo go bona yoo e lego yo mogolo go ba feta. (Mareka 9:33, 34; 10:35-37) Bofokodi bjoo bo tšwelela gape mantšiboeng a.

Baapostola ba ba le “ngangišano e šoro go bona mabapi le gore ke ofe yo a bego a bonala e le yo mogolo go bona ka moka.” (Luka 22:24) Jesu o swanetše go ba a nyamišwa ke go ba bona ba ngangišana gape. Jesu o dira’ng?

Go e na le gore a kgalemelele baapostola kgopolo ya bona le mekgwa ya bona, Jesu ka go se fele pelo o bontšhana le bona mabaka o re: “Dikgoši tša ditšhaba di di buša ka thata gomme bao ba nago le matla go tšona ba bitšwa bahlankedi ba setšhaba. Fela ga go bjalo go lena. . . . Gobane ke mang yo e lego yo mogolo, na ke yo a dutšego tafoleng goba yo a hlankelago?” Ke moka, Jesu o ba gopotša ka mohlala woo a bego a dutše a ba beela wona, o re: “Eupša nna ke gare ga lena ke le yo a hlankelago.”—Luka 22:25-27.

Go sa šetšwe go se phethagale ga bona, baapostola ba ile ba kgomarela Jesu maemong a mantši a thata. Ka gona o re: “Ke dira kgwerano ya Mmušo le lena go etša ge Tate a dirile kgwerano le nna.” (Luka 22:29) Banna ba ke balatedi ba Jesu bao ba botegago. O ba kgonthišetša gore ka kgwerano yeo a e dirago le bona, ba tla ba Mmušong le go hwetša kabelo pušong ya gagwe.

Le ge baapostola ba na le tebelelo e kgahlišago, e sa le batho ba nama le ba sa phethagalago. Jesu o re go bona: “Sathane o le kganyogile gore a le fefere bjalo ka korong,” yeo e gašanago ge e feferwa. (Luka 22:31) O ba lemoša gape o re: “Ka moka ga lena le tla kgopša mabapi le nna bošegong bjo, gobane go ngwadilwe gwa thwe: ‘Ke tla hlaba modiši gomme dinku tša mohlape tša gašana.’”—Mateo 26:31; Sakaria 13:7.

Petro o gana ka tsela ya go ipota, o re: “Gaešita le ge ba bangwe ka moka ba ka kgopša ka nakwana, nna nka se kgopše le ka mohla!” (Mateo 26:33) Jesu o botša Petro gore le pele mogogonope o ka lla gabedi bošegong bjoo, Petro o tla be a mo latotše. Lega go le bjalo, Jesu o oketša ka gore: “Ke go lopetše gore tumelo ya gago e se ke ya fela, gomme wena ge o šetše o itshotše o matlafatše bana beno.” (Luka 22:32) Petro o mo kgonthišetša ka sebete o re: “Gaešita le ge e ba nka swanelwa ke go hwa le wena, le gatee nka se go latole.” (Mateo 26:35) Baapostola ba bangwe ba bolela se se swanago.

Jesu o botša barutiwa ba gagwe o re: “Ke na le lena lebakanyana. Le tla nnyaka; gomme go etša ge ke itše go Bajuda: ‘Moo ke yago le ka se kgone go tla,’ e bile ke botša le lena gona bjale.” Ke moka a oketša ka gore: “Ke le nea taelo e mpsha ya gore le ratane; go etša ge ke le ratile, gore le lena le ratane. Bohle ba tla tseba ka se gore le barutiwa ba ka, ge e ba le ratana.”—Johane 13:33-35.

Ge Petro a ekwa Jesu a bolela gore o tla ba le bona nakwana feela, o a botšiša o re: “Morena, o ya kae?” Jesu o a araba o re: “Moo ke yago o ka se kgone go ntatela gona bjale, eupša o tla latela ka morago.” Petro o bolela a maketše, o re: “Morena, ke ka baka la’ng nka se kgone go go latela gona bjale? Ke tla gafa moya wa ka ka baka la gago.”—Johane 13:36, 37.

Bjale Jesu o bolela ka nako yeo a ilego a roma baapostola leetong la boboledi kua Galilea ba sa swara sekhwama sa tšhelete goba mokotlana wa dijo. (Mateo 10:5, 9, 10) O ba botšiša gore: “Na le ile la hloka selo le ge e le sefe?” Ba araba ka gore: “Aowa!” Eupša ba swanetše go dira’ng matšatšing ao a tlago? Jesu o a ba laela o re: “Bjale yo a nago le sekhwama sa tšhelete a se tšee, a tšee le mokotlana wa dijo; yo a se nago tšhoša a rekiše seaparo sa gagwe sa ka ntle a e reke. Gobane ke le botša gore seo se ngwadilwego se swanetše go phethagala go nna, e lego gore: ‘O badilwe le batho ba go hloka molao.’ Gobane seo se lego mabapi le nna se a phethagala.”—Luka 22:35-37.

Jesu o bolela ka nako yeo ka yona a tla bego a kokotetšwe koteng hleng ga badirabobe, goba ba go hloka molao. Ka morago ga moo balatedi ba gagwe ba tla tlaišwa o šoro. Ba nagana gore ba itlhamile gomme ba re: “Morena, bona ditšhoša tše pedi šidi.” O araba ka gore: “Di lekane.” (Luka 22:38) Taba ya gore ba na le ditšhoša tše pedi, kgauswinyane e tla nea Jesu sebaka sa go ba ruta thuto e nngwe e bohlokwa.