Ka moragonyana ga gore Jesu a kolobetšwe, o ile a lebeletšana le lenaba leo le bego le ikemišeditše go mo šitiša le pele ga ge a ka thoma bodiredi bja gagwe. Ee, Diabolo o ile a leka Jesu leboelela. Ka morago, Jesu o ile a bolela ka yena yoo yo mobe kudu a re: “Mmuši wa lefase o etla. Le gona a ka se ntire selo.”—Johane 14:30.

Ponong moapostola Johane o ile a bona e sa le pele seo se letetšego ‘drakone e kgolo, yona noga ya kgale yeo e bitšwago Diabolo le Sathane.’ Lenaba leo la batho le šoro le be le tla rakwa legodimong, ‘le galefile kudu, ka ge le tseba gore le na le nako e kopana.’ (Kutollo 12:9, 12) Bakriste ba na le lebaka le lebotse la go dumela gore ba phela ‘nakong yeo e kopana’ le gore kgauswinyane ‘drakone, yona noga ya kgale,’ e tla lahlelwa sekoting gomme ya se dire selo ka nywaga e 1 000 ge Jesu a buša Mmušong wa Modimo.—Kutollo 20:1, 2.

Lebakeng leo, go tla direga’ng lefaseng, lona legae la rena? Go tla dula bomang mo le gona ka tlase ga maemo afe? Jesu ka boyena o ile a nea dikarabo. Seswantšhong sa gagwe sa mabapi le dinku le dipudi, o ile a bontšha seo bokamoso bo se swaretšego batho ba lokilego ba etšago dinku, bao ba dirišanago le bana babo Jesu le go ba swara gabotse. Le gona o ile a hlalosa ka mo go kwagalago seo se letetšego bao ba dirago se se fapanego, e lego bao ba etšago dipudi. Jesu o itše: “Bona bao [dipudi] ba tla fedišetšwa sa ruri, eupša baloki [dinku] ba tla ya bophelong bjo bo sa felego.”—Mateo 25:46.

Se se re thuša go kwešiša mantšu ao Jesu a a boditšego sesenyi seo se bego se kokotetšwe koteng hleng ga gagwe. Jesu ga se a nea motho yoo moputso o swanago le woo a o holofeditšego baapostola ba gagwe ba botegago, e lego moputso wa go ba karolo ya Mmušo wa magodimong. Go  e na le moo, Jesu o holofeditše modiradibe yoo yo a itsholago, a re: “Ruri ke go botša lehono, o tla ba le nna Paradeiseng.” (Luka 23:43) Ka go re’alo motho yoo o na le tebelelo ya go phela Paradeiseng, e lego phaka e botse, goba serapa sa go etša phaka. Ke mo go kwagalago gore bao lehono ba ipontšhago ba swana le dinku gomme ba tsena “bophelong bjo bo sa felego” le bona ba tla ba Paradeiseng yeo.

Se se dumelelana le tlhaloso yeo moapostola Johane a e neilego ya maemo ao a tlago go ba gona lefaseng ka nako yeo. O itše: “Tente ya Modimo e bathong, o tla dula le bona gomme e tla ba batho ba gagwe. Modimo ka noši o tla ba le bona. O tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:3, 4.

E le gore sesenyi seo se kgone go thabela bophelo Paradeiseng, se tla swanelwa ke go tsošwa bahung. Le gona e ka se be sona se nnoši se tsošwago bahung. Jesu o hlalositše seo gabotse ge a be a re: “Nako e a tla yeo ka yona bohle bao ba lego mabitleng ba tlago go kwa lentšu la gagwe gomme ba tšwa, bao ba dirilego dilo tše dibotse ba tla tsogela bophelong, bao ba tlwaetšego go dira dilo tše mpe ba tla tsogela kahlolo.”—Johane 5:28, 29.

Eupša go thwe’ng ka baapostola ba botegago le palo e nyenyane ya ba bangwe bao ba tlago go ba le Jesu legodimong? Beibele e re: “E tla ba baperisita ba Modimo le ba Kriste gomme ba tla buša le yena e le dikgoši ka nywaga e sekete (1 000).” (Kutollo 20:6) Bona ba bao e tlago go ba babušigotee le Kriste ba tla ba ba kile ba phela lefaseng e le banna le basadi. Ka gona ga go pelaelo gore e tla ba babuši ba legodimong bao ba nago le kwelobohloko le ba kwešišago ge ba buša bao ba lego lefaseng.—Kutollo 5:10.

Jesu o tla diriša sehlabelo sa gagwe sa topollo bathong bao ba lego lefaseng gomme a tloša thogako ya sebe sa leabela go bona. Jesu le babušigotee le yena ba tla thuša batho ba botegago gore ba boele ba phethagale. Ee, ka nako yeo batho ba tla thabela bophelo bjo Modimo a bego a ba reretše bjona mathomong ge a be a botša Adama le Efa gore ba ate ba tlale lefase. Le lehu leo le bilego gona ka baka la sebe sa Adama le ka se sa ba gona!

Ka go re’alo, Jesu o tla be a phethile sohle seo Jehofa a mo kgopetšego sona. Mafelelong a Pušo ya Jesu ya Nywaga e Sekete, yena o tla gafela Mmušo le lapa le phethagetšego la batho go Tatagwe. Moapostola Paulo o ngwadile mabapi le tiro ye e botse ya boikokobetšo yeo Jesu a e dirilego, a re: “Ge dilo tšohle di tla ba di beilwe ka tlase ga gagwe, ke moka Morwa le yena o tla ipea ka tlase ga Yo a beilego dilo tšohle ka tlase ga gagwe, gore Modimo e be tšohle go yo mongwe le yo mongwe.”—1 Bakorinthe 15:28.

Go molaleng gore Jesu o kgatha tema e bohlokwa go phethagatšeng merero e kgahlišago ya Modimo. Le gona ge merero yeo e tla be e dutše e tšwela pele e utollwa ka mo go sa felego, o tla dira dilo ka go dumelelana ka mo go feletšego le kamoo a ilego a itlhalosa ka gona ge a be a re: “Ke nna tsela le therešo le bophelo.”—Johane 14:6.