Jesu o sa dutše a le Samaria goba Galilea. Bjale Bafarisei ba mmotšiša mabapi le go tla ga Mmušo, woo ba letetšego gore o tle ka letago le legolo le ka monyanya. Lega go le bjalo, o re: “Mmušo wa Modimo ga o tle ka go lemogega pepeneneng; le gona batho ba ka se ke ba re: ‘Bonang šo’ goba ‘šole!’ Gobane Mmušo wa Modimo o gare ga lena.”—Luka 17:20, 21.

Ba bangwe ba ka phetha ka gore Jesu o bolela gore Mmušo o buša dipelong tša bahlanka ba Modimo. Lega go le bjalo, seo e ka se be therešo, ka gobane Mmušo ga o dipelong tša Bafarisei bao Jesu a bolelago le bona. Fela mmušo o gare ga bona, ka gobane Kgoši e kgethilwego ya Mmušo wa Modimo, e lego Jesu, e gare ga bona.—Mateo 21:5.

Mohlomongwe ge Bafarisei ba tlogile, Jesu o nea barutiwa ba gagwe ditaba tše dingwe tša mabapi le go tla ga Mmušo. O thoma ka go ba lemoša mabapi le go ba ga gagwe matleng a Mmušong, o re: “Matšatši a tla tla mo le tlago go duma go bona le lengwe la matšatši a Morwa wa motho, eupša le ka se ke la le bona.” (Luka 17:22) Jesu o bontšha gore go buša ga Morwa wa motho Mmušong ke selo sa nakong e tlago. Pele ga ge nako yeo e fihla, barutiwa ba bangwe ba ka ba ba o fagahletše, eupša ba tla swanela ke go dula ba letile go fihlela nakong e beilwego ya Modimo ya gore Morwa wa motho a tle.

Jesu o tšwela pele a re: “Batho ba tla re go lena: ‘Bonang šo!’ Goba ba re: ‘Bonang šole!’ Le se ke la tšwa goba la ba šala morago. Gobane go etša ge legadima le gadima go tšwa karolong e nngwe tlase ga legodimo go ya karolong e nngwe tlase ga legodimo, le Morwa wa motho o tla ba bjalo.” (Luka 17:23, 24) Barutiwa ba Jesu ba tla šireletšwa bjang gore ba se latele bomesia ba maaka? Jesu o re go tla ga Mesia wa kgonthe go tla bonagala go etša ge legadima le bonwa tikologong e kgolo. Bohlatse bja go ba gona ga gagwe a le matleng a Mmušo bo tla bonwa gabotse ke babogedi bohle bao ba lego šedi.

Ke moka Jesu o bapetša boemo le ditiragalo tša bogologolo go bontšha kamoo mekgwa ya batho e tlago go ba ka gona nakong yeo, ge a re: “Go etša ge go diregile mehleng ya Noa, go tla ba bjalo le mehleng ya Morwa wa motho . . . Ka mo go swanago, go etša ge go diregile mehleng ya Lota: Ba be ba eja, ba enwa, ba reka, ba rekiša, ba bjala, ba aga. Eupša ka letšatši leo Lota a tšwilego Sodoma ka lona, gwa na mollo le sebabole di etšwa legodimong gomme tša ba fediša ka moka. Go tla ba ka tsela e swanago letšatšing leo ge Morwa wa motho a utollwa.”—Luka 17:26-30.

Jesu ga a bolele gore batho mehleng ya Noa le ya Lota ba fedišitšwe feela ka gobane ba be ba phegelela mediro e tlwaetšwego ya go ja, go nwa, go reka, go rekiša, go bjala le go aga. Noa le Lota gotee le malapa a bona ba be ba dira tše dingwe tša dilo tšeo. Eupša batho ba bangwe ba be ba swaregile ka mediro e bjalo ba sa ele hloko thato ya Modimo e bile ba hlokomologa nako yeo ba bego ba phela go yona. Ka gona, Jesu o lemoša barutiwa ba gagwe gore ba ele hloko thato ya Modimo le go e dira ka mafolofolo. Ka go re’alo o ba bontšha tsela ya go phološwa—ke gore, tsela ya go ba thuša gore ba tšwele pele ba phela—ge Modimo a tliša phedišo nakong e tlago.

Barutiwa ba tla swanelwa ke go phema go šitišwa ke dilo tša lefase tšeo di ba dikologilego, e lego “[dilo] tše di šetšego morago.” Jesu o re: “Letšatšing leo, motho yo a lego godimo ga ntlo yo dilo tša gagwe di lego ka ntlong a se ke a fologa go tlo di tšea, ge e le motho yo a lego tšhemong, anke le yena ka mo go swanago a se ke a boela dilong tše di šetšego morago. Gopolang mosadi wa Lota.” (Luka 17:31, 32) O ile a fetoga sehlwaseeme sa letswai.

Ge Jesu a tšwela pele a hlalosa boemo bjo bo bego bo tla ba gona nakong ya ge Morwa wa motho a buša e le Kgoši, o botša barutiwa ba gagwe o re: “Bošegong bjoo batho ba babedi ba tla ba ba le malaong a tee; yo mongwe o tla tšewa, eupša yo mongwe a tlogelwa.” (Luka 17:34) Ka gona, ba bangwe ba tla phološwa mola ba bangwe ba tlogelwa, e lego go loba maphelo a bona.

Barutiwa ba botšiša gore: “Kae, Morena?” Jesu o araba ka gore: “Moo setoto se lego gona, ke moo le dintšhu di tlago go kgobokana gona.” (Luka 17:37) Ee, ba bangwe ba tla kgona go bonela kgole go etša dintšhu. Barutiwa ba ba tla kgobokeletšwa go Kriste wa kgonthe, e lego Morwa wa motho. Nakong yeo e tlago, Jesu o tla nea barutiwa ba gagwe ba botegago therešo yeo e phološago bophelo.