Jesu le bao a sepelago le bona ba fihla Jeriko, yeo e lego mo e ka bago leeto la letšatši go tloga Jerusalema. Ge e le gabotse, Jeriko ke motse o lego gabedi, motse wa kgale wo o lego bokgole bja mo e ka bago dikhilomithara tše 1,6 go tloga motseng o mofsa wa Baroma. Ge Jesu le mašaba ba etšwa go o mongwe wa metse ye gomme ba batamela o mongwe, difofu tše pedi di kwa khuduego ye. O mongwe wa bona o bitšwa Baratimeo.

Ge Baratimeo a ekwa gore Jesu o a feta, yena le mogwera’gwe ba thoma go goeletša ba re: “Morena, re gaugele, Morwa wa Dafida!” (Mateo 20:30) Ba bangwe ba bao ba lego lešabeng ba ba kgalemela ka go tia gore ba homole, eupša bobedi bja bona ba goeletša kudu. Ge Jesu a ekwa khuduego ye o a ema. O kgopela bao a nago le bona gore ba bitše yo a ka bago a goeletša. Ba ya go bakgopedi bao gomme ba re go o tee wa bona: “Tia matla! Tsoga, o a go bitša.” (Mareka 10:49) Ka ge sefofu se se tletše lethabo, se lahla seaparo sa sona sa ka ntle, sa taboga ke moka sa ya go Jesu.

Jesu a botšiša a re: “Le nyaka gore ke le direle’ng?” Difofu tšeo ka bobedi tša lopa tša re: “Morena, a mahlo a rena a buduloge.” (Mateo 20:32, 33) Jesu ka go di kwela bohloko, o kgwatha mahlo a tšona gomme o botša se sengwe ka go lebanya o re: “Sepela. Tumelo ya gago e go fodišitše.” (Mareka 10:52) Difofu tše pedi tšeo e lego bakgopedi di thoma go bona, gomme ga go pelaelo gore bobedi bja tšona di thoma go tumiša Modimo. Ge batho ba bona seo se diregilego, le bona ba tumiša Modimo. Banna bao e bego e le difofu bjale ba thoma go latela Jesu.

Jesu o dikologilwe ke mašaba a magolo ge a phatša Jeriko. Batho bohle ba nyaka go bona yoo a fodišitšego difofu. Batho ba pitlaganya Jesu go tšwa mahlakoreng ka moka; ka baka leo, ba bangwe ga ba kgone le go ka mmona. Se ke seo Sakeo a lebeletšanego le sona. Ke yena molekgetho yo mogolo go balekgetho ba bangwe kua Jeriko le tikologong ya gona. Ka ge e le yo mokopana, ga a kgone go bona seo se diregago. Ka gona Sakeo o kitimela kua pele gomme a namela sehlare sa mosikamore (goba, mogommurupei) seo se lego tseleng yeo Jesu a sepelago go yona. Sakeo o kgona go bona se sengwe le se sengwe gabotse a le moo godimo. Ge Jesu a batamela gomme a bona Sakeo a le godimo ga sehlare, o re: “Sakeo, akgofa o fologe, gobane lehono ke swanetše go dula ntlong ya gago.” (Luka 19:5) Sakeo o a fologa gomme a kitimela gae go yo amogela moeng wa gagwe yo a hlomphegago.

Ge batho ba bona seo se diregago, ba thoma go ngongorega. Ba nagana gore ga se gwa swanela gore Jesu e be moeng wa monna yo a lebelelwago e le modiradibe. Sakeo o humišitšwe ke go hlakola batho tšhelete ka boradia modirong wa gagwe wa go ba molekgetho.

Ge Jesu a tsena legaeng la Sakeo, batho ba a belaela ba re: “O etetše ntlong ya monna wa modiradibe.” Lega go le bjalo, Jesu o bona kgonagalo ya gore Sakeo a ka sokologa. Jesu o bona seo se direga. Sakeo o a ema gomme a mmotša a re: “Morena ke nea badiidi seripa sa dilo tša ka gomme se sengwe le se sengwe seo ke se hlakotšego motho ka go mo latofatša ka maaka, ke se bušetša gane.”—Luka 19:7, 8.

A tsela e botse ya Sakeo ya go bontšha gore o itshola e le ka kgonthe! Go ka direga gore o kgona go bala dipegong tša gagwe tša lekgetho gore ge e le gabotse ke tšhelete e kaakang yeo a e hweditšego go Bajuda, gomme o ena gore o tla ba bušetša yona ka makga a mane. E bile seo se feta le seo molao wa Modimo o se nyakago. (Ekisodo 22:1; Lefitiko 6:2-5) Go oketša moo, Sakeo o holofetša go nea badiidi seripa sa dilo tša gagwe.

Jesu o kgahlwa ke go bona bohlatse bjo bja go itshola ga Sakeo gomme o re go yena: “Lehono phološo e tlile ntlong ye, gobane le wena o morwa wa Aborahama. Gobane Morwa wa motho o tletše go tsoma le go phološa seo se bego se timetše.”—Luka 19:9, 10.

Pejana, Jesu o hlalositše boemo bja ‘se se timetšego’ ka go diriša seswantšho sa gagwe sa mabapi le morwa yo a timetšego. (Luka 15:11-24) Bjale o neile mohlala wa kgonthe wa motho yo go ka thwego o be a timetše eupša e le yoo a hweditšwego. Baetapele ba bodumedi le balatedi ba bona ba ka belaela ka Jesu le go mo swaya diphošo ka gobane a šeditše bao ba swanago le Sakeo. Lega go le bjalo, Jesu o tšwela pele go nyaka le go bušetša barwa ba ba timetšego ba Aborahama mohlapeng.