Baapostola ba 12 ba thabetše leeto la boboledi Galilea ka moka gomme ba begela Jesu “dilo ka moka tšeo ba di dirilego le go di ruta.” Go a kwagala gore ba lapile. Lega go le bjalo, ba hloka gaešita le nako ya go ja ka gobane batho ba bantši ba tsena ba etšwa. Ka gona Jesu o re: “Tlang, lena le nnoši, ka thopeng lefelong le le lego lekatana le khutšeng go se nene.”—Mareka 6:30, 31.

Ba namela sekepe, mohlomongwe kgauswi le Kaperenaume, ba leba lefelong leo le lego ka ntle ka bohlabela bja Noka ya Jorodane ka mošola wa Betsaida. Lega go le bjalo, batho ba bantši ba ba bona ge ba tloga gomme ba bangwe ba lemoga seo. Ba kitima gotee lebopong gomme sekepe se ba hwetša moo ge se fihla.

Ge Jesu a fologa sekepe, o bona lešaba gomme o a le šokela ka gobane le bjalo ka dinku tše di se nago modiši. Ka gona o thoma “go le ruta dilo tše dintši” ka Mmušo. (Mareka 6:34) E bile o fodiša “bao ba nyakago go fodišwa.” (Luka 9:11) Ge nako e dutše e eya, barutiwa ba re go yena: “Lefelo le le lekatana, le nako e šetše e ile; phatlalatša mašaba, gore a ye metsaneng a yo ithekela tša go ja.”—Mateo 14:15.

Jesu o araba ka gore: “Ga go nyakege gore a tloge; lena a neeng sa go ja.” (Mateo 14:16) Gaešita le ge Jesu a šetše a tseba seo a tlago go se dira, o leka Filipi ka go mmotšiša gore: “Re tla reka kae dinkgwa gore batho ba ba je?” Go botšišwa Filipi ka ge a etšwa kgauswi le Betsaida. Lega go le bjalo, go reka dinkgwa ga go rarolle bothata bjo. Go na le banna ba e ka bago ba 5 000. Le gona palomoka ya bao ba lego gona e ka ba e le palo yeo gabedi, ge go akaretšwa basadi le bana! Filipi o araba ka gore: “Dinkgwa tše di lekanago ditenariase tše makgolopedi [tenariase ke mogolo wa letšatši] di ka se ba lekane, le ge yo mongwe le yo mongwe a ka hwetša mo gonyenyane.”—Johane 6:5-7.

Mohlomongwe e le go bontšha go se kgonagale ga go fepa batho bao ka moka, Andrea o re: “Go na le mošemanyana yo a nago le dinkgwa tše hlano tša garase le dihlatswana tše pedi. Eupša tšeo ke’ng ge batho e le ba bantši gakaakaa?”—Johane 6:9.

Ke nako ya seruthwane, pejana ga Paseka ya 32 C.E., gomme mmoto o apešitšwe ke bjang bjo botala. Jesu o laela barutiwa ba gagwe go botša batho gore ba dule bjanyeng ka dihlopha tša ba 50 le tša ba 100. O tšea dinkgwa tše hlano le dihlapi tše pedi gomme o leboga Modimo. Ke moka o ngwathaganya dinkgwa tšeo le dihlapi tšeo. Ka gona Jesu o di nea barutiwa gore ba di abele batho. Se se makatšago ke gore batho ka moka ba a ja go fihlela ba khora!

Ka morago Jesu o botša barutiwa ba gagwe gore: “Topelelang marathana ao a šetšego, e le gore go se be le seo se senywago.” (Johane 6:12) Ba tlatša diroto tše 12 ka marathana ao a kgoboketšwago.