Jesu o be a dutše a dira boboledi ka matla ka nywaga e ka bago e mebedi. Na bjale ke nako ya gore a goge maoto gomme a iketle? Go fapana le seo, Jesu o katološa modiro wa gagwe wa boboledi ka go tšea “leeto la go ya le metse le metsana ka moka [ya Galilea], a ruta disinagogeng tša bona, a bolela ditaba tše dibotse tša Mmušo, a fodiša mohuta o mongwe le o mongwe wa bolwetši le mohuta o mongwe le o mongwe wa bofokodi.” (Mateo 9:35) Seo a se bonago se mo kgodiša ka go nyakega ga gore a katološe modiro wa boboledi. Eupša o tla phetha bjang se?

Ge Jesu a dutše a sepela, o bona batho bao ba nyakago thušo ya moya le khomotšo. Ba bjalo ka dinku tše di se nago modiši, ba a šokiša e bile ba gašane. O a ba šokela gomme o botša barutiwa ba gagwe gore: “Ee, puno ke e kgolo eupša bašomi ke ba sego kae. Ka baka leo, kgopelang Mong wa puno gore a romele bašomi punong ya gagwe.”—Mateo 9:37, 38.

Jesu o tseba seo se tlago go ba thuša. O bitša baapostola ba 12 ke moka o ba arola ka babedi ka babedi gomme ya ba dihlopha tše tshela tša bagoeledi. Ka morago o ba nea ditaelo tše di kwagalago, o re: “Le se ke la ya tikologong ya ba ditšhaba gomme le se ke la tsena motseng wa Basamaria, go e na le moo, tšwelang pele le eya dinkung tše di timetšego tša ntlo ya Isiraele. Ge le dutše le sepela, le bolele le re: ‘Mmušo wa magodimo o batametše.’”—Mateo 10:5-7.

Mmušo woo ba swanetšego go bolela ka wona ke woo Jesu a ba rutilego go o rapelela thapelong ya mohlala. ‘Mmušo o batametše’ ka kgopolo ya gore Kgoši e kgethilwego ya Modimo e lego Jesu Kriste e gona. Lega go le bjalo, ke’ng seo se hlatselago gore barutiwa ba gagwe ba tloga ba emela Mmušo wo? Jesu o ba nea matla a go fodiša balwetši gaešita le go tsoša bahu gomme ba dira dilo tše ka moka ka ntle le tefo. Ka gona, baapostola ba tla hlokomela bjang dinyakwa tša bona tše bjalo ka dijo tša letšatši le letšatši?

Jesu o botša barutiwa ba gagwe gore ba se ke ba dira ditokišetšo tša dilo tše di bonagalago bakeng sa leeto la bona la boboledi. Ga se ba swanela go swara gauta, silifera goba koporo ka mekotlaneng ya bona. E bile ga go nyakege gore ba sware mokotlana wa dijo bakeng sa leeto goba diaparo tše dingwe goba diramphašane. Ka baka la’ng? Jesu o ba kgonthišetša gore: “Mošomi o swanelwa ke dijo tša gagwe.” (Mateo 10:10) Batho ba ba thabelago molaetša bao ba tla ba hwetšago ba tla thuša barutiwa ka go ba nea dinyakwa tša motheo. Jesu o re: “Kae le kae moo le tsenago gona legaeng, le dule moo go fihla ge le tloga lefelong leo.”—Mareka 6:10.

Le gona Jesu o ba nea ditaelo tša kamoo ba ka yago go beng ba dintlo ka gona ka molaetša wa Mmušo, gomme o re: “Ge le tsena ka ntlong le dumediše ba ntlo yeo. Ge e ba ntlo e swanela, a khutšo yeo le e kganyogelago yona e e tlele, eupša ge e ba e sa swanele, a khutšo ya lena e boele go lena. Kae le kae moo motho a sa le amogelego goba a sa theetšego mantšu a lena, ge le etšwa ntlong yeo goba motseng woo le hlohlore lerole dinaong tša lena.”—Mateo 10:12-14.

Go ka direga gore motse ka moka goba motsana o gane molaetša wa bona. Seo se ka bolela’ng lefelong leo? Jesu o utolla gore le tla welwa ke kahlolo e matla. O hlalosa gore: “Ruri ke re go lena: Letšatšing la Kahlolo naga ya Sodoma le Gomora e tla gaugelwa go feta motse woo.”—Mateo 10:15.