Gateetee ka morago ga ge Jesu a kolobeditšwe ke Johane, moya wa Modimo o iša Jesu lešokeng la Judea. O na le dilo tše dintši tšeo a swanetšego go nagana ka tšona. Ge Jesu a kolobetšwa “magodimo a [ile a] bulega.” (Mateo 3:16) Ka gona o kgona go gopola dilo tšeo a ithutilego tšona le tšeo a di dirilego ge a sa le legodimong. Ruri go na le mo gontši mo a ka naganišišago ka gona!

Jesu o fetša matšatši a 40 le mašego a 40 a le lešokeng. Nakong yeo, ga a je selo. Ke moka ge Jesu a swerwe ke tlala kudu, Sathane Diabolo o a batamela gore a mo leke. O re: “Ge e ba o le morwa wa Modimo, gona botša maswika a gore e be dinkgwa.” (Mateo 4:3) Ka ge Jesu a tseba gore go fošagetše go diriša matla a mohlolo go kgotsofatša dikganyogo tša gagwe, o gana go lekega.

Diabolo ga a hwe matwa. O leka tsela e nngwe. O leka Jesu gore a itahlele fase a etšwa lebotong la tempele. Fela Jesu ga a lekege gore a dire pontšho e bjalo e makatšago. Jesu o bontšha ka go tsopola Mangwalong gore ke phošo go leka Modimo ka tsela e bjalo.

Molekong wa boraro, Diabolo ka tsela e itšego o bontšha Jesu “mebušo ka moka ya lefase le letago la yona” ke moka a re: “Dilo tše ka moka ke tla go nea tšona ge o ka wela fase wa nthapela gatee.” Jesu o gana gape a tiišitše, a re: “Tloga, Sathane!” (Mateo 4:8-10) O gana go ineela molekong wa go dira se se fošagetšego, ka ge a tseba gore tirelo e kgethwa e swanetše go direlwa Jehofa feela. Ee, o kgetha go dula a botegela Modimo.

Re ka ithuta se sengwe melekong ye le tseleng yeo Jesu a arabetšego go yona. Meleko ye e be e le ya kgonthe, e lego seo se bontšhago gore Diabolo ga e fo ba seka sa bobe bjalo ka ge batho ba bangwe ba bolela. Ke motho wa kgonthe yo a sa bonagalego. Pego ye e re bontšha gape gore ge e le gabotse mebušo ka moka ya lefase ke thoto ya Diabolo; ke yena a e laolago. Ke ka tsela efe e nngwe go nea ga gagwe Kriste mebušo ye e ka bago e bile moleko wa kgonthe?

Go oketša moo, Diabolo o boletše gore o be a ikemišeditše go putsa Jesu ge a ka mo rapela gatee feela, moo a bego a ka ba a nea Jesu mebušo ka moka ya lefase. Diabolo a ka leka go re leka ka tsela e swanago, mohlomongwe ka go re goketša ka dibaka tša go ka hwetša mahumo a lefase, matla goba maemo. Ruri re dira ka bohlale ge re latela mohlala wa Jesu ka go dula re botegela Modimo go sa šetšwe gore re welwa ke moleko ofe! Eupša gopola gore Diabolo o ile a tlogela Jesu “go fihla ka nako e nngwe e loketšego.” (Luka 4:13) Go ka direga se se swanago le ka rena, ka gona re swanetše go dula re le šedi.