Mohlomongwe o thabela go hwetša ditaba tše dibotse. Ruri go na le ditaba tše dibotse kudu tšeo di ngwaletšwego wena le baratiwa ba gago.

Ditaba tše tše dibotse di ka Beibeleng, e lego puku yeo Mmopi wa legohle, Jehofa Modimo, a dirilego gore e ngwalwe nywageng e mentši e fetilego. Ka pukung ye, re tla ahlaahla dipuku tše nne tša Beibele tšeo di swerego ditaba tše dibotse kudu bakeng sa rena ka moka. Tšona di bitšwa ka maina a banna bao Modimo a ba dirišitšego go di ngwala, e lego Mateo, Mareka, Luka le Johane.

Ba bantši ba bitša dipego tše tše nne gore ke Diebangedi tše nne. Dipego tše tše nne ka moka di anega ebangedi, goba ditaba tše dibotse, mabapi le Jesu—gore ke yena tsela ya Modimo ya go phološa batho le gore ka ge e le Kgoši ya Mmušo wa Modimo wa magodimong, Jesu o tla tlišetša bohle bao ba dumelago go yena ditšhegofatšo tša ka mo go sa felego.—Mareka 10:17, 30; 13:13.

Mohlomongwe o ka ba o ile wa ipotšiša lebaka leo ka lona Modimo a ilego a budulela gore go ngwalwe dipego tše nne tša bophelo bja Jesu gotee le dithuto tša gagwe.

Go na le mehola ya gore dipego tše tša mabapi le seo Jesu a se boletšego le seo a se dirilego e be tšeo di ikemetšego. Ka mohlala, akanya banna ba bane ba eme kgauswi le morutiši yo a tumilego. Monna yo a emego ka pele ga morutiši o na le ofisi ya lekgetho. Yo a emego ka go le letona ke ngaka. Monna yo a theeditšego a le ka go le letshadi ke morei wa dihlapi e bile ke mogwera wa kgonthe wa morutiši. Ge e le monna wa bone, yo a lego ka morago ga morutiši, yena ke motho yo a lego šedi e bile e le yo monyenyane go bona ka moka. Banna ba ka moka ba bane ba a botega, gomme yo mongwe le yo mongwe wa bona o na le dilo tše di kgethegilego tšeo di mo kgahlago goba tšeo a di phegelelago bophelong. Ge e ba yo mongwe le yo mongwe wa bona a ngwala pego ya dilo tšeo morutiši a di boletšego le tšeo a dirilego, go ka direga gore dipego tšeo tše nne di tla tšweletša ditaba goba ditiragalo tše di sa swanego. Ka go ela hloko dipego tše ka moka tše nne, e le ge re gopola ditsela tše di sa swanego tša go nagana goba go bea dintlha, re ka hwetša taba ka botlalo ya seo morutiši a se boletšego le seo  a se dirilego. Se se bontšha kamoo re ka holwago ke go ba le dipego tše nne tšeo di ikemetšego tša bophelo bja Morutiši yo Mogolo e lego Jesu.

Ge mohlala o tšwela pele, molekgetho o nyaka go ipiletša go batho bao e lego Bajuda, ka gona o rulaganya dithuto tše dingwe goba ditiragalo tše dingwe ka tsela ya gore di thuše batho bona bao. Ngaka e bolela kudu ka go fodišwa ga balwetši goba digole, ka gona ga e bolele ka dilo tše dingwe tšeo molekgetho a di ngwadilego goba e di bea ka tsela e fapanego. Mogwera wa kgonthe o gatelela maikwelo a morutiši gotee le dika tša gagwe. Pego ya monna yo monyenyane go bona ke e kopana, e bile ke yeo e opago kgomo lenaka. Lega go le bjalo, pego ya yo mongwe le yo mongwe wa bona e nepagetše. Se se bontšha gabotse kamoo go ba le dipego ka moka tše nne tša bophelo bja Jesu go humišago kwešišo ya rena ka ditiro tša gagwe, dithuto tša gagwe le semelo sa gagwe.

Batho ba ka bolela ka ‘Ebangedi ya Mateo’ goba ‘Ebangedi ya Johane.’ Seo ga se phošo, ka gobane e nngwe le e nngwe e na le “ditaba tše dibotse ka Jesu Kriste.” (Mareka 1:1) Lega go le bjalo, ge go bolelwa ka kgopolo e nabilego, go na le ebangedi e tee e akaretšago, goba ditaba tše dibotse, ka Jesu—yeo re e hwetšago dipegong tše tše nne.

Barutwana ba bantši ba Lentšu la Modimo ba bapišitše le go dumelelanya ditiragalo le dintlha tšeo di hwetšwago ka pukung ya Mateo, ya Mareka, ya Luka le ya Johane. Mo e ka bago ka 170 C.E., mongwadi wa Mosiria yo a bitšwago Tatian o ile a leka go dira bjalo. O ile a lemoga gore dipuku tše tše nne di nepagetše e bile di buduletšwe gomme a kgoboketša seo se bitšwago Diatessaron, e lego pego e dumelelanago ya bophelo bja Jesu le bodiredi bja gagwe.

Puku ya Jesu—Tsela, Therešo le Bophelo e dira se se swanago, eupša e nepagetše kudu e bile e feletše. Seo se a kgonega ka ge ga bjale re kwešiša gabotse phethagalo ya diporofeto le diswantšho tše dintši tša Jesu. Kwešišo ye e hlalosa gabotse dilo tšeo a di boletšego le tšeo a di dirilego, gotee le tatelano ya ditiragalo tšeo. Dilo tšeo di hweditšwego ke baepi ba marope le tšona di file tshedimošo mabapi le ditaba tše itšego le tsela ya bangwadi ya go nagana. Ke therešo gore ga go na yo a ka bolelago ka go lebanya mabapi le tatelano ya ditiragalo ka moka. Eupša puku ya Jesu—Tsela, Therešo le Bophelo e na le ditaba tše di nago le tekatekano le tše di kwagalago.

Ge o dutše o bala le go thabela puku ye, leka go gopola molaetša wa yona wa motheo wo o ngwaletšwego wena le baratiwa ba gago. Gopola gore Jesu Kriste o ile a botša moapostola Thomase a re: “Ke nna tsela le therešo le bophelo. Ga go yo a tlago go Tate ge e se ka nna.”—Johane 14:6.

Puku ye ya Jesu—Tsela, Therešo le Bophelo e tla go thuša go lemoga kamoo Jesu e tlogago e le “tsela.” Ke ka yena feela go kgonegago gore re batamele Jehofa Modimo ka thapelo. Go oketša moo, Jesu ke tsela yeo ka yona re boelanywago le Modimo. (Johane 16:23; Baroma 5:8) Lega go le bjalo, ke ka Jesu feela re kgonago go ba le tswalano e amogelegago le Modimo.

Jesu ke “therešo.” O be a bolela le go phela ka go dumelelana le therešo; go be go le bjalo ka ge eka Jesu ke therešo e tlilego e sepela ka maoto. O ile a phethagatša diporofeto tše dintši, tšeo di bilego “Ee ka yena.” (2 Bakorinthe 1:20; Johane 1:14) Diporofeto tše bjalo di re thuša go bona tema e bohlokwa kudu yeo Jesu a e kgathago go phethagatšweng ga morero wa Modimo.—Kutollo 19:10.

Le gona Jesu Kriste ke “bophelo.” A diriša topollo, e lego go neela ga gagwe bophelo bjo bo phethagetšego gotee le madi a gagwe, o ile a dira gore re kgone go hwetša ‘bophelo bja kgonthe,’ e lego “bophelo bjo bo sa felego.” (1 Timotheo 6:12, 19; Baefeso 1:7; 1 Johane 1:7) E bile o tla ipontšha e le “bophelo” go bao ba hwilego eupša e le bao ba tlago go tsošetšwa bophelong ba na le tebelelo ya go phela Paradeiseng ka mo go sa felego.—Johane 5:28, 29.

Ka moka ga rena re swanetše go kwešiša le go tšeela godimo tema yeo Jesu a e kgathago morerong wa Modimo. Eka o ka thabela go ithuta mo go oketšegilego ka Jesu—yena “tsela le therešo le bophelo.”