KA October 6, 2014 go ile gwa tšweletšwa ka lekga la pele seteišene sa thelebišene Inthaneteng seo se bitšwago JW Broadcasting. * Se be se le ka leleme la Seisemane. Ga e sa le go tloga ka August 2015, mananeo a seteišeneng se a fetolelwa ka maleme a ka godimo ga a 70 e le gore bana babo rena ba bantši le dikgaetšedi ba thabele mananeo a ao a agago moyeng. Batho ba bantši bao ba bogelago seteišene se lefaseng ka moka ba ile ba bontšha gore ba leboga tokišetšo ye e mpsha yeo e kgahlišago. Eupša ke dilo dife tšeo di ilego tša dirwa gore seteišene se sa JW Broadcasting se be gona?

 Go be go nyakega lefelo le le swanetšego. Ka gona, go ile gwa kgethwa lefelo la maleba moagong wa 30 Columbia Heights wa ntlongkgolo ya lefase ya Dihlatse tša Jehofa kua Brooklyn, New York. Ka beke e tee feela, lefelo le le kgethilwego le ile la hlwekišwa gomme Lefapha la go Lokiša Ditlabakelo la thoma go lokiša lefelo leo gore le swanele go tlo gaša seteišene seo sa thelebišene mola sehlopha sa bahlami se be se rulaganya ditlabakelo tša sebjalebjale tšeo di nago le seriti. Bana babo rena ba bantši le dikgaetšedi ba United States ba ile ba šoma bošego le mosegare ba hlama setudio seo le go rulaganya kamoo ba tlago go se aga kapejana ka gona. Dinyakišišo tšeo gantši di dirwago ka dikgwedi tše dintši di ile tša dirwa ka matšatšinyana feela, ke moka kapejana Lefapha la go Reka la thoma go otara dilo tše dintšintši tšeo di bego di hlokagala.

Go ile gwa tsenywa dithapo tše diteleletelele tša mohlagase le Inthanete, le gona sehlopha sa bašomi se be se swanetše go kgonthišetša gore ditlabakelo ka moka di šomišana gabotse. Nakong yeo, sehlopha sa rena sa diletšo tša mmino se be se rekhota mmino wo o tlago go rola mananeo a seteišeneng seo setudiong sa rena kua Patterson. Bana babo rena le dikgaetšedi bao ba tšwago dinageng tše dintši bao ba bego ba tlile moo go tlo rekhota mmino ba ile ba thuša ka go rekhota. Mantšu ao a bego a tlo bolelwa dibidiong a ile a ngwalwa, ditiragatšo tša rulaganywa gomme sehlopha sa batho bao ba šomago setudiong kua Brooklyn, Patterson, Wallkill le dinageng tše dingwe lefaseng ka moka se ile sa šoma ka thata gore dibidio di tšweletšwe gabotse. Ka morago ga gore setudio se fele gomme ditlabakelo ka moka di tsenywe, go ile gwa thoma modiro wa go lokišeletša mananeo a dikgwedi tše sego kae tša mathomo.

Ge re botšiša mahlwa-a-di-bona yo a lego intasetering ye gore go ka tšea nako e kaakaang go aga setudio seo se lekanago le seo ka bogolo, o ile a re gantši go ka tšea ngwaga le  seripa. Eupša bana babo rena le dikgaetšedi bao ba šomago ka thata ba dirile modiro woo ka dikgwedi tše pedi feela!

Mafelelo e bile a kgahlišago kudu! Lenaneo la kgwedi e nngwe le e nngwe, leo gantši le tšwelelago seteišeneng se ka Mošupologo wa mathomo wa kgwedi, le lebelelwa ka makga a fetago a dimilione tše pedi kgweding yeo. Ge go akaretšwa le dibidio tše dingwe, mananeo a seteišeneng se a lebelelwa ka makga a fetago a dimilione tše lesome ka kgwedi.

Batho ba Jehofa ba ikwa bjang ka tokišetšo ye e mpsha ya dijo tša moya? A e fo ba a mangwe a mangwalo a mantši a ditebogo ao re a hweditšego:

• “Bjo ke bošego bjoo bo thabišago kudu bophelong bja ka! Bošegong bjo, nna le mosadi wa ka re ile ra bogela lenaneo la May 2015 seteišeneng sa JW Broadcasting, gomme ga ke na mantšu a go hlalosa lethabo la ka. Ye ke e nngwe ya dimpho tše bohlokwa tšeo ke di neilwego ke Jehofa. Re leboga Sehlopha se Bušago le bana babo rena le dikgaetšedi ka moka bao ba šomilego ka thata go tšweletša tokišetšo ye e kgahlišago kudu ya dijo tša moya.”—Indonesia.

• “Bana babo rena ba bantši ba be ba se ba ka ba kwa setho sa Sehlopha se Bušago se nea polelo. Ga bjale, re a ba kwa e bile re kgona le go ba bona. Ruri ga se ra ka ra ikwa re le kgauswi le Sehlopha se Bušago le bana babo rena ba lefaseng ka bophara ka tsela ye.”—Kenya.

• “Ka ge monna wa ka e se Hlatse, ga go bonolo gore ke sware borapedi bja lapa le bana ba ka ba babedi bao e lego  bafsa. Ka gona, seteišene se se nkhotše kudu. Se dira gore ke ikwe ke le karolo ya mokgatlo, e bile se nea nna le bana ba ka kgothatšo yeo re tlogago re e hloka. Ruri ye ke tšhegofatšo yeo e tšwago go Jehofa.”—Brithania.

• “Re rata seteišene sa JW Broadcasting kudu! Le gona dithapelo tša rena di ile tša arabja ge mananeo a seteišeneng se a be a tšweletšwa le ka maleme a mangwe. Lena bana babo rena, le re kgothatša kudu ge re bona botho bja lena le kamoo le hlankelago Jehofa le thabile. Ga e sa le go tloga ge lenaneo le la thelebišeneng le thoma, go feta le ge e le neng pele re ikwa re le karolo ya mokgatlo wa Jehofa wo o kgahlišago.”—Czech Republic.

• “Go theetša ditho tša Sehlopha se Bušago ka segagešo go mpatametša kgauswi kudu le Jehofa.”—Brazil.

• “Ke na le mengwaga e 16 ke hlankela Jehofa, eupša kamoo ke ikwago ka gona le kamoo ke thabilego ka gona lehono, go ka bapišwa feela le ka tsela yeo ke ilego ka ikwa ka yona ge ke be ke kolobetšwa. Ke le leboga kudu bana babo rena ba ba rategago ka seteišene se sa JW Broadcasting.”—Brazil.

Ka thušo ya Jehofa, re a tseba gore seteišene se sa JW Broadcasting se tla tšwela pele go ba tšhegofatšo e kgolo ya dijo tša moya go bana babo rena ba lefaseng ka moka, le gona se tla tumiša le go tagafatša Jehofa.