LE GE modiro wa go ya ka ntlo le ntlo e sa dutše e le tsela e kgolo yeo Dihlatse tša Jehofa di phatlalatšago therešo ka yona, go dirišwa ga ditafola tše di kgahlišago tša dikgatišo le diteroli go ipontšhitše e le mokgwa o mongwe o atlegago kudu wa go bolela ditaba tše dibotse tša Mmušo wa Modimo. (Mat. 24:14) Bagoeledi ba Mmušo ba dirišitše mafelwana a go bea dikgatišo, ditafola le dintlwana gore ba fihlelele batho mafelong a batho bohle. Go oketša moo, diphuthego lefaseng ka moka di neilwe diteroli tša go bea dikgatišo tše e ka bago tše 250 000. Batho ba arabetše bjang?

Kua Dar es Salaam, Tanzania, batho ba e ka bago ba 700 ba kgopetše dithuto tša Beibele ga e sa le lenaneo le le kgethegilego la go nea bohlatse ditoropong le thomile moo ka  2014. Batho ba bantši bao ba thabelago ba tla dibokeng gomme ba batamela kgauswi le Modimo. Ka ngwaga o tee feela, batho ba ile ba tšea dikgatišo tša ka godimo ga tše 250 000 diteroling tša rena dinageng tša Afrika le moše wa mawatle.

Kua Dihlakahlakeng tša Solomon, moo bagoeledi ba ka tlase ga ba 2 000 ba bolelago ditaba tše dibotse tšhemong e kgolo ya dihlakahlaka tša ka godimo ga tše 300, mananeo a kgethegilego a go nea bohlatse phatlalatša ditoropong a fetogile mokgwa wa bohlokwa wa go phatlalatša dipeu tša therešo. Motsemošate wa moo e lego, Honiara, bana babo rena ba ile ba sepediša dimakasine tša ka godimo ga tše 104 000 le diporoutšha tša ka godimo ga tše 23 600, tše dintši tša dikgatišo tše ba di sepedišetša batho bao ba tšwago dihlakahlakeng le metseng yeo e lego kgole le toropo moo go se nago Dihlatse. Thapameng e nngwe, ba ile ba sepediša dikopi tše 400 tša puku ya Ke Eng Seo ge e le Gabotse Beibele e se Rutago? gomme batho ba 60 ba kgopela dithuto tša Beibele.

Mesong e mengwe, babulamadibogo ba ka mehla e lego Michael le Linda ba be ba beakanya lefelo la bona la go bea dikgatišo lebopong Sehlakahlakeng sa Margarita, Venezuela. Monna yo a bitšwago Aníbal o ile a batamela moo ba beilego dikgatišo gomme a amogela puku ya Seo Beibele e se Rutago. O ile a ba botša gore tatagwe o hlokofaletše lebopong leo mengwaga e šupago e fetilego, gomme ga e sa le go tloga ka yona nako yeo, mmagwe o ile a ba le kgateletšego ya monagano. Bekeng e latelago Aníbal o ile a boa gomme a botša Michael le Linda gore le ke letšatši leo tatagwe a hlokofetšego ka lona. O ile a ntšha founo ya gagwe, a founela mmagwe gomme a kgopela Michael gore a kgothatše mmagwe. Michael o ile a mo kgothatša. Ga e sa le go tloga ka nako yeo, mmago Aníbal o šetše a founetše Michael le Linda ka makga  a mmalwa, gomme ba ile ba mmalela mangwalo a homotšago. Molaetšeng o mongwe wo a ilego a o romela ka founo, mmago Aníbal o ngwadile gore: “Lehono ke ikwa ke le kaone kudu ka gobane le nkhomoditše le go nthuša go matlafatša tumelo ya ka.”

Mananeo a kgethegilego a go nea bohlatse ditoropong a rulagantšwe mafelong a 127 ditoropong tše 14 kua United States. Dikgweding tše šupago tša mathomo tša ngwaga wa tirelo wa 2015, go ile gwa thongwa dithuto tša Beibele tše 8 445! Le gona mokgwa wo wa go nea bohlatse o thušitše batho ba bantši bao ba kilego ba kopanela gore ba boele ba tle dibokeng gape. Ka mohlala, monna yo a bitšwago Terry o be a lebeletše le lengwe la mafelo a rena a go bea dikgatišo kua Los Angeles, California, ka gona banyalani ba Dihlatse bao ba bego ba eme moo ba ile ba mmotšiša ge e ba a kile a bala dikgatišo tša rena. O ile a hlalosa gore ke yo mongwe wa Dihlatse tša Jehofa eupša o na le mengwaga e ka bago e mene a fodile moyeng. Banyalani bao ba ile ba bala le go ahlaahla le yena lengwalo la Hesekiele 34:11, moo Jehofa a rego: “Ke tla tsoma dinku tša ka gomme ka di hlokomela.” Ba ile ba mmotša ka wepesaete ya rena le ka seteišene sa rena sa thelebišene sa JW Broadcasting. Mesong e latelago, Terry o ile a ngwalela ngwanabo rena yoo e-mail, a mo hlalosetša gore pejana ga ge a ka bona tafola ya go nea bohlatse, o be a ile a llela Modimo a kgopela gore a mo swarele ka ge a ile a tlogela go ya dibokeng tša phuthego. Le gona o be a ile a kgopela Jehofa gore a mo thuše gore a batamele kgauswi le yena. Terry o itše: “Ka morago ga moo le ile la ntumediša ka borutho, la mpalela lengwalo le le kgothatšago gomme la mpotša seo ke bego ke swanetše go se dira gore ke boele mokgatlong wa Jehofa. Yeo e bile karabo ya thapelo ya ka.”

Kua Addis Ababa, Ethiopia, go na le mafelo a mane a go nea bohlatse ditoropong. Ka dikgwedi tše tharo bana babo rena ba ile ba sepediša dikgatišo tše 37 275, gomme batho ba 629 ba kgopela go etelwa ke Dihlatse. Gare ga batho ba bantši  bao ba ilego ba amogela puku ya Seo Beibele e se Rutago go be go na le mokgalabje yo mongwe yo a ilego a thoma go e bala gateetee. Nakong e fetilego o be a kile a tsenela seminare sa bodumedi, gomme a na le dipotšišo ka Jesu le Mmušo wa Modimo. Ka gona letšatšing le le latelago, o ile a boela moo Dihlatse di emago gona gore a yo hwetša dikarabo tša dipotšišo tša gagwe. Letšatši ka morago ga moo, o ile a dumela go  swarelwa thuto ya Beibele, gomme mafelelong a yona beke yeo, a ya dibokeng ka lekga la pele. Gona bjale o ba gona dibokeng tša rena ka mehla gomme o tšwela pele gabotse.

Monna yo mongwe wa Mojuda o ile a ya lefelong la dikgatišo kua Mexico gomme a botšiša bana babo rena ba babedi ge e ba ba na le kgatišo yeo e bolelago ka lehu. Ba ile ba mmotša gore makasine wo o bolelago ka lehu o fedile, eupša ba mo nea wo o bolelago ka bokamoso. Monna yoo o ile a swara yo mongwe wa bana babo rena ka letsogo gomme a re: “Ga ke nyake go kwa selo ka bokamoso. Ke nyaka go ipolaya.” Ke moka o ile a thoma go lla. Bana babo rena ba ile ba mmotšiša gore ke ka baka la eng a be a ikwa ka tsela yeo. O ile a bolela a lla a re: “Morwa wa ka o sa tšwa go hlokofala.” Ka gona ba ile ba mmontšha kgaolo 7 ka pukung ya Seo Beibele e se Rutago. Ba ile ba mmalela dirapa tše pedi tša mathomo ka tlase ga sehlogwana se se rego, “Ge yo o mo Ratago a E-hwa” le mafelelong a sehlogo seo moo go hlaloswago ka kholofelo ye re nago le yona ka bahu. A kgomegile kudu maikwelong, o ile a swara ngwanabo rena ka letsogo gape gomme a mmotšiša gore: “Na seo ruri ke therešo?” Bana babo rena ba ile ba mo kgonthišetša gore ruri Jehofa o tlo phethagatša kholofetšo yeo. O ile a ba botšiša gore: “Ke swanetše go dira’ng gore ke tle ke bone morwa wa ka gape?” Ba ile ba rulaganya go etela monna yoo legaeng la gagwe. Ge ba fihla legaeng la monna yoo, ba ile ba mo hwetša a letile gomme a fagahletše go thoma go ithuta Beibele.

Molebeledi yo mongwe wa mosepedi yo a ilego a thuša go thoma mananeo a kgethegilego a go nea bohlatse phatlalatša ditoropong tša kua New York o itše: “Ruri Jehofa o šegofaditše lenaneo le! Ga se feela gore ke mokgwa o atlegago kudu wa go fihlelela batho ba diketekete, eupša gape o dirile gore re kopane le batho ba bantši bao ba fodilego moyeng goba bao ba kgaotšwego—‘dinku tše di timetšego’—bao gona bjale ba thušwago gore ba boele mohlapeng.”—Hesekiele 34:15, 16.