Emily yo a nago le mengwaga e 12 o dula kua Australia. Ka letšatši le lengwe morutiši wa gagwe o ile a boledišana le barutwana ba gagwe ka bohlokwa bja go kgetha bagwera ba babotse. Seo se ile sa dira gore Emily a nyake go bontšha morutiši wa gagwe bidio ya dipopaye ya Mogwera wa Paale ke wa Mohuta Mang? Barutwana ba ile ba ntšha mahlo dinameng ge morutiši wa bona a be a ba bontšha bidio yeo. Ka morago ga gore ba bone bidio yeo, ba ile ba tšea  iri ka moka ba boledišana ka yona. Morutiši yo o ile a bontšha le diklase tše dingwe bidio yeo. Ke moka Emily o ile a botša morutiši wa gagwe le barutwana bao a tsenago le bona ka klaseng ka wepesaete ya jw.org. Emily o re: “Jehofa o ile a nnea sebete sa gore ke botše barutwana ba makgolo ka wepesaete ye. Ruri o ntšhegofaditše.”

Bagoeledi ba bahlano ba ile ba tšea leeto la diiri tše senyane ba sepela ditseleng tša go se sepelege tša dithabeng gore ba yo bea tafola ya dikgatišo tše di theilwego Beibeleng lefelong la go rekiša dipuku tše difsa kua Suai, Timor-Leste. Bao ba bego ba etla tafoleng yeo, ba be ba makatšwa ke go bona dikgatišo tše di theilwego Beibeleng ka maleme a lefelong leo a 12, ka ge go be go na le dipuku tše sego kae goba di se gona ka a mantši a maleme ao. Mosadi yo mongwe o ile a bona sehlogo sa poroutšha e nngwe gomme a goeletša ka gore: “Le ke leleme la gešo!” E be e le la mathomo bophelong bja gagwe a bala kgatišo e itšego ka segagabo, e lego Sebunak. Ka matšatši a mane feela, bagoeledi bao ba ile ba sepediša dikgatišo tše 4 571 gomme batho ba bantši ba kgopela gore ba tle ba ba etele ka magaeng a bona. Bontši bja batho bao ba bego ba thabela ba be ba se ba ka ba kopana le Dihlatse tša Jehofa. Bana ba ile ba dula diiri tše dintši ba lebeletše dibidio tša Eba Mogwera wa Jehofa ka leleme la Setetun Dili. Ba bangwe ba bona ba ile ba kgona le go swara mantšu a dikopelo tša dibidio tšeo ka hlogo gomme ba di opela ka lethabo.

Brian le Roxanne bao e lego baromiwa, ba ile ba kgopela tumelelo ya go bea teroli ya go nea bohlatse kholetšheng yeo e lego sehlakahlakeng sa Palau. Baromiwa bao ba ile ba boledišana le mohlokomedi wa kholetšhe gomme ba mo laetša bidio yeo e bolelago ka modiro wa rena wa go nea bohlatse mafelong a batho bohle yeo e lego go jw.org. Ba ile ba mo nea le dikgatišo tšeo ba bego ba tlo di bea teroling ya bona ya go nea bohlatse. Mohlokomedi yoo o ile a botša Brian le Roxanne  gore ba swanetše go boledišana le molaodi wa ditaba tša mabapi le barutwana. Ka morago ga seboka seo, ba ile ba botšwa gore ba swanetše go ba le seboka se sengwe gape, lekgeng le ba be ba swanetše go boledišana le yo mongwe wa balaodi ba bagolo kholetšheng yeo.

Brian o re: “Re bile le poledišano e kgahlišago le molaodi yo mogolo wa kholetšhe, eupša o ile a re re boele ofising ya mohlokomedi wa kholetšhe, gomme ge re le moo re ile ra laelwa gore re ngwale lengwalo la go kgopela tumelelo ya go bea teroli ya rena ya dikgatišo tša go nea bohlatse. Re be re nyamišwa ke gore ba be ba re emaemiša, eupša lengwalo lona re ile ra le ngwala.”

Ka morago ga gore ba ngwale lengwalo leo, Brian le Roxanne  ba ile ba boela go molaodi yo mogolo wa kholetšhe la bobedi, ba feditše le pelo gore o tlo gana kgopelo ya bona. Brian o re: “Re ile ra makala kudu ge molaodi yoo wa kholetšhe a re botša gore o badile dikgatišo tšeo re ilego ra mo nea tšona e bile o nagana gore di kwagala kudu. O ile a re se ke sona seo barutwana ba bego ba se hloka.” Ee, re ile ra dumelelwa go diriša teroli ya go nea bohlatse!

Brian o tšwela pele ka gore: “Molaodi wa ditaba tša mabapi le barutwana o ile a re botša gore barutwana bao ba dulago kholetšheng yeo ba ka išwa dikerekeng tšeo ba ratago go ya go tšona ka Sontaga. Le gona o itše: ‘Ge e ba ba nyaka go ya kerekeng ya lena, re tla ba iša.’ Nna le Roxanne re ile ra makala. Re be re naganne gore balaodi ba kholetšhe yeo ba tla gana kgopelo ya rena, go e na le moo, ba ile ba holofetša gore ba tla iša barutwana Holong ya Mmušo!”

Letšatšing la mathomo leo Brian le Roxanne ba ilego ba bea teroli ya dikgatišo kholetšheng, ba ile ba sepediša dipuku tše 65, dimakasine tše 8 le diporoutšha tše 11. Le gona ba bile le dipoledišano tše di kgahlišago kudu le barutwana gomme molaodi yo mogolo wa kholetšhe le molaodi wa ditaba tša mabapi le barutwana ba ile ba kgothaletša Brian le Roxanne gore ba boe gape.

Lipson, e lego setho sa lapa la Bethele, o be a boela lekaleng la Sehlakahlakeng sa Solomon ka morago ga gore a fetše karolo ka moka ya mesong a bolela ditaba tše dibotse. Ge a dutše a sepela mo seterateng, o ile a kwa kopelo ya Mmušo e lla ka lebenkeleng le itšego. Ka ge a be a nyaka go tseba gore go direga eng, o ile a phetha ka gore a tsene. O ile a makala kudu ge a bona sehlopha sa batho ba bagolo le bana se lebeletše bidio ya kopelo 55, ya sehlogo se se rego “Bophelo bjo bo sa Felego—Mafelelong!,” go tšwa dibidiong tša Eba Mogwera wa Jehofa. Ka morago ga gore kopelo yeo e fele, mong wa lebenkele o ile a botša sehlopha seo gore: “Ke na le bidio e nngwe gape yeo ke nyakago gore le e bone.” O ile a ba bontšha bidio ya dipopaye ya O se ke wa Utswa. Ka morago ga gore bidio yeo e  fele, o ile a kgothaletša bareki ka moka gore ba se ke ba utswa ka lebenkeleng la gagwe.

Ka ge bareki ba bangwe ba bantši ba ile ba tsena ka lebenkeleng leo ge bidio e le gare e bapala, mong wa lebenkele leo o ile a re: “Ke nyaka gore ka moka ga lena le kwe koša yeo ke e ratago.” Ke moka o ile a bapala kopelo 55 gape. Ka morago ga moo, mong wa lebenkele leo o ile a phetha ka gore a ba bontšhe le bidio ya Ke ka Baka la Eng o Swanetše go Ithuta Beibele? le ya Ke Eng Seo se Diregago Thutong ya Beibele? ka Sepidgin sa Dihlakahlakeng tša Solomon.

Ke badudi ba sego kae ba Dihlakahlakeng tša Solomon bao ba kgonago go tsena Inthaneteng ka ge e tura e bile e sa hwetšagale gabonolo. Lega go le bjalo, mong wa lebenkele leo yo e sego yo mongwe wa Dihlatse tša Jehofa, o thuša go bjala dipeu tša therešo ka go bontšha bareki dibidio tša rena.

Mošupologo o mongwe le o mongwe, banyalani ba bangwe ba bafsa ba thabela go diriša teroli ya go nea bohlatse kua Nouméa, e lego motsemošate wa New Caledonia. Ka letšatši  le lengwe, mosadi yo mongwe yo a bego a se a phuthologa o ile a batamela teroli gomme ntle le go bolela a tšea puku ya Ke Eng Seo ge e le Gabotse Beibele e se Rutago? Ka morago ga gore go fete seripa sa iri, o ile a boa a swere puku yeo ka seatleng gomme a re go banyalani bao: “Na le bone se?” O ile a bula puku yeo gomme a šupa leina la Jehofa. Ke moka a re: “Le ke leina la Modimo!” O ile a tšwela pele ka gore: “Ke na le dibeke tše dintši ke dira dinyakišišo bokgobapukung ke nyaka go tseba therešo ka Modimo. Eupša ke ile ka tšea puku ya lena gomme ka tsena ka koloing. Ge ke e bula, selo sa pele seo ke ilego ka se bona e bile leina la Modimo, e lego Jehofa. Ke bone ke swanetše go boa gore ke tle ke le leboge.” Banyalani bao ba bile le poledišano e kgahlišago le mosadi yoo gomme ba mmotša gore a lebelele sehlogo seo se rego: Leina la Modimo—Go Dirišwa ga Lona le Seo le se Bolelago seo se lego go mametletšo ya puku ya Seo Beibele e se Rutago. Mosadi yoo o ile a re o nyaka go fetša nyakišišo ya gagwe bokgobapukung pele, eupša ga bjale o tseba moo ba beago teroli ya bona Mošupologo o mongwe le o mongwe!