Ge baetapele ba dikereke tša Bojakane ba be ba ekwa gore Dihlatse tša Jehofa di neilwe tokologo ya borapedi, ba ile ba nyama o šoro. Baruti ba ka godimo ga ba 700 le baetapele ba maemo a godimo ba dikereke tša Maprotestanta ba ile ba swara seboka kua Jakarta gore ba tle ba gapeletše mmušo go thibela Dihlatse gape. Eupša mmušo o ile wa ema o tiile.

Ge ditaba tša gore thibelo e tlošitšwe di dutše di phatlalala le naga, batho ba bantši bao ba thabelago ba ile ba ngwalela ofisi ya lekala ba kgopela dikgatišo goba dithuto tša Beibele. Ka 2003, batho ba ka godimo ga ba 42 000 ba ile ba ba gona Segopotšong, e lego palo e fetago ya bagoeledi ba mo nageng ge ba balwa gabedi. Batho bao e nyakilego go ba ba 10 000 ba ile ba ba gona kopanong kua Jakarta, go akaretša le molaodi wa mmušo wa maemo a godimo wa Lefapha la Ditaba tša Bodumedi. Molaodi yoo wa mmušo o ile a kgahlwa ke go bona bana le batho ba bagolo ba phetla mangwalo Dibeibeleng tša bona. O ile a kgonthišetša bana babo rena gore o ikemišetše go tlo phošolla maaka ao a boletšwego mabapi le Dihlatse tša Jehofa.

Go fela ga thibelo ye go ile gwa dira le gore baromiwa ba boele Indonesia. Baromiwa ba mathomo ba go boa e be e le Josef le Herawati Neuhardt * (bao ba tšwago Dihlakahlakeng tša Solomon), Esa le Wilhelmina Tarhonen (bao ba tšwago Taiwan), Rainer le Felomena Teichmann (bao ba tšwago Taiwan) gotee le Bill le Nena Perrie (bao ba tšwago Japane). Ba ile ba latelwa ke baromiwa bao ba sa tšwago Gilead bao ba bego ba abetšwe ka Leboa la Sumatra, Kalimantan, ka Leboa la Sulawesi le ditikologong tše dingwe tša kgole le dihlakahlaka tše dingwe.

Ka 2005, ofisi ya lekala e ile ya swara diklase tše difsa tša  dikolo tša pušo ya Modimo. Yo mongwe wa bahlahli ba Sekolo sa Tlwaetšo ya Bodiredi (seo ga bjale se bitšwago Sekolo sa Baebangedi ba Mmušo), e lego Julianus Benig o itše: “Ke be ke tloga ke thabela go thuša barutwana go kaonefatša bokgoni bja bona bja go ruta le bja go bolela le gore ba dirišwe kutšwanyana mokgatlong.” Ba bantši bao ba alogilego sekolong se ga bjale ba hlankela e le babulamadibogo ba kgethegilego goba balebeledi ba tikologo. Bontši bja bana babo rena bao ba bilego klaseng ya mathomo ya Sekolo sa Balebeledi ba Basepedi, * mathomong ba ile ba tlwaetšwa nakong ya ge modiro wa rena o sa thibetšwe. Sekolo se se sefsa se ba thušitše gore ba tšwele pele ka dikabelo tša bona ka morago ga gore thibelo e fele. Ponco Pracoyo, yo a bilego gona klaseng ya mathomo o itše: “Sekolo se se nthušitše gore ke tshwenyege ka batho kutšwanyana le go tšeela godimo kabelo ya ka ya go ba molebeledi wa tikologo.  Ruri se be se lapološa e bile se dira gore motho a be le mafolofolo!”

Mengwageng e 25 ya ge Dihlatse di be di thibetšwe, diphuthego tše dintši kua Indonesia di be di bokana ka magaeng a manyenyane. Ke diphuthego tše sego kae tšeo di bego di kgona go aga Diholo tša Mmušo, gomme go be go le thata kudu go hwetša mangwalo ao a ba dumelelago gore ba age mafelo a borapedi a mafsa. Ka ge diphuthego di be di gola ka lebelo, ofisi ya lekala e ile ya hloma Lefapha la go Agwa ga Diholo tša Mmušo (leo ga bjale le bitšwago Lefapha la Bohlami le la go Aga la Tikologo) e le gore e fihlelele tlhokagalo ye e kgolo.

E nngwe ya ditikologo tša pele yeo e ilego ya holwa ke lenaneo le lefsa e bile Sehlakahlaka sa Nias ka Leboa la Sumatra. Haogo’aro Gea yo e lego setho sa kgale sa Phuthego ya Gunungsitoli o re: “Ge re be re ekwa gore re tlo hwetša Holo ya Mmušo e mpsha re ile ra thaba kudu. Ofisi ya lekala e ile ya romela baithaopi ba šupa ba go aga gore ba tle ba okamele mošomo woo. Holo yeo e ile ya fela ka 2001.” Faonasökhi Laoli e lego setho sa komiti ya go aga ya lefelong leo, o re: “Moragonyana kua re be re bokana ka magaeng a manyenyane, gomme batho tšeela fase Dihlatse tša Jehofa. Eupša kapejana ka morago ga gore re fetše Holo ya Mmušo, palo ya batho bao ba bago gona dibokeng e ile ya oketšega go tloga go ba 20 go fihla go ba 40. Pele dikgwedi tše 12 di ka fela, bao ba bago gona dibokeng ba ile ba oketšega ka palo ya ka godimo ga 500 lekgolong. Mafelo a rena a borapedi ke ao a hlwekilego mo tikologong ya gabo rena, gomme batho ba hlompha Dihlatse tša Jehofa.”

Ka 2006, kua Bandung, ka Bodikela bja Java, bana babo rena ba ile ba thoma go nyaka lefelo la go aga Holo ya Mmušo ya mathomo ya ka toropong yeo. Singap Panjaitan e lego mogolo yo a hlanketšego komiting ya go aga o re: “Go re tšere dikgwedi tše 12 go hwetša lefelo le le swanetšego. Eupša re be re hloka bonyenyane baagišani bao e sego Dihlatse ba 60 gore ba  dumelele mošomo wa rena pele balaodi ba mmušo ba ka re nea lengwalo la tumelelo ya go aga. Baagišani ba 76 ba ile ba dumela gore modiro woo o tšwele pele, go akaretša le mosadi yo mongwe yo a bego a re ganetša mathomong. Ge holo e fedile, re ile ra laletša baagišani ba rena le meyara wa Bandung gore ba tlo bona holo yeo. Meyara yoo o itše: ‘Lefelo le leo le hlwekilego le leo le beakantšwego gabotse le beela dikereke tše dingwe ka moka mohlala woo di ka o ekišago.’” Holo yeo ya Mmušo ya mabato a mabedi e ile ya neelwa ka 2010.

Ga e sa le go tloga ka 2001, Diholo tša Mmušo tša ka godimo ga tše 100 di ile tša agwa kua Indonesia, eupša go nyakega tše dingwe tše dintši.