Bana Babo Rena ba Rategago:

Ka boikokobetšo moporofeta Jesaya o ile a kgona go bona gore Mmušo wa Juda o be o atlegile e bile o humile ka gobane Jehofa a o šegofaditše. Go etša ge re bala go Jesaya 26:12, o ile a ngwala gore: “Jehofa, . . . mediro ya rena ka moka re e diretšwe ke wena.” Ge re bona dilo ka moka tšeo re kgonnego go di fihlelela ngwageng o fetilego wa tirelo, re dumelelana le mantšu ao. Ruri Jehofa o “dira dilo tše di makatšago tšeo di sa kago tša dirwa le gatee!” (Ek. 34:10) Anke o nagane ka tše dingwe tša dilo tšeo a re šegofaditšego ka tšona.

Wepesaete ya rena ya semmušo ya jw.org e dirišwa ka tsela e kgahlišago kudu. Ga bjale e hwetšagala ka maleme a fetago a 600, gomme dikgatišo di ka balwa le go taoneloutwa ka maleme a fetago a 750. Wepesaete ye e kgona bjang go thuša batho bao ba tlogago ba rata Modimo gore ba tsebe therešo? Tšea ka mohlala banyalani ba bangwe bao ba bego ba se sa nyaka go kwa selo ka bodumedi ka baka la boikaketši bjo ba bego ba bona madumeding. Ge ba be ba dutše ba nyakana le bodumedi bjo bo ka ba neago dijo tša moya, ba ile ba kopana le wepesaete ya rena. Ba ile ba thoma go tsena gantši mo go yona ba bala dihlogo tšeo di lego dikgatišong tša rena le go bogela dibidio. Le gona ba ile ba taonelouta pukwana ya Go Hlahloba Mangwalo ka Mehla, gomme ba thoma go e bala le bana ba bona ba babedi bao e lego bafsa. Ge e le gabotse, Dihlatse tša Jehofa di hweditše ba bala temana ya letšatši mesong ya ge di be di kokota lapeng  leo. Dihlatse tšeo di ile tša hwetša gore lapa leo le be le dirile diphetogo tše dintši ka baka la go tsena wepesaeteng ya rena. Ba be ba tlošitše di-tattoo, ba se sa tsenya mangina mo ba bego ba phutše gona mmeleng, ba lahlile diswantšho tša bona tša bodumedi, ba se sa keteka matšatši a lefase a maikhutšo le go bogela difilimi tšeo di sego tša swanela Bakriste. Banyalani bao ba di dirile diphetogo tše ka moka le pele ba ka kopana le Dihlatse! Ge go be go ngwalwa phihlelo ye, banyalani ba le morwedi wa bona e be e le bagoeledi gomme banyalani bao ba rulaganya go kolobetšwa kgauswinyana.

Re hweditše mangwalo a mantši a go leboga tokišetšo e nngwe gape e kgahlišago e lego seteišene sa rena sa thelebišene sa JW Broadcasting. Lenaneo la kgwedi le kgwedi seteišeneng se ga bjale le hwetšagala ka maleme a ka godimo ga a 70, gomme maleme a mangwe a tla ba gona ge nako e dutše e eya. Malapa a mantši a lebelela lenaneo le mantšiboeng a Borapedi bja Lapa. Ngwanabo rena yo mongwe ge a bolela ka seteišene se o re: “Ruri mokgatlo wa Jehofa o godile go feta le ge e le neng; eupša ga se ra ka ra ikwa re batametše kgauswi le ntlokgolo ka tsela ye!”

Tše dingwe tša ditiragalo tša bohlokwa kudu go batho ba Jehofa ke dikopano tša selete, gomme ga go pelaelo gore go bile bjalo le ka dikopano tšeo di ilego tša swarwa ngwageng wa tirelo wa 2015. Lenaneo la kopano yeo le be le na le dibidio tše 42 le diswantšho tšeo di bego di bontšhwa sekirining, gaešita le dibidio tše tshela tša mmino o kgahlišago kudu wa ketapele tšeo di bego di bapalwa mathomong a karolo e nngwe le e nngwe ya lenaneo. Ngwanabo rena yo mongwe yo a nago le phihlelo o boletše ka lenaneo leo gore: “Go be go bonagala go se le o tee wa batheetši yo a bego a nyaka go emelela setulong sa gagwe nakong ya lenaneo, ka gobane ba be ba nyaka go kwa lenaneo ka moka.”  Kgaetšedi yo mongwe wa moromiwa ge a be a hlalosa kopano yeo o itše: “Dibidio tšeo di dirile gore ke bone therešo ya Beibele le Mmušo wa Modimo e le tša kgonthe kudu.”

Ngwageng o fetilego Jehofa o ile a re šegofatša le ka dikopelo tša Mmušo tše difsa tše mmalwanyana. Banyalani ba bangwe ba ngwadile gore: “Dikopelo tše tše difsa di swana le ge eka re gokarelwa ke Jehofa. Di ile tša re kgothatša kudu dinakong tša ge re be re lebane le mathata a magolo.” Dikopano tša rena di re gopoditše ka mošomo o mogolo woo bana babo rena bao ba lego sehlopheng sa Watchtower sa mmino wa diletšo le khwaereng ba re direlago wona ka lerato, morero o mogolo e le go tumiša Jehofa!

Na phuthego ya geno e diriša gabotse diteroli tša go nea bohlatse mafelong a batho bohle? Ruri mokgwa wo wa go nea bohlatse e tloga e le tšhegofatšo! Batho ba bangwe bao ba dulago meagong yeo e šireleditšwego goba difoleteng tše ditelele tšeo go sa tsenwego ntle le tumelelo, ba hwetša ditherešo tša Beibele ka lekga la pele go dirišwa mokgwa wo, gomme ba bangwe ba bantši go akaretša le Dihlatse tšeo di fodilego moyeng, ba hwetša thušo ya moya ka baka la tokišeletšo ye ya diteroli. Ka January 2015, monna yo mongwe wa kua Korea Borwa o ile a ya go bana babo rena bao ba neago bohlatse ka diteroli, gomme a ba hlalosetša gore o sa tšwa go thoma go nagana kudu ka Modimo. Ba ile ba thoma thuto ya Beibele le yena. Ka February o ile a ya dibokeng tša phuthego ka lekga la pele gomme ka March a tlogela go kgoga. Ka April, o ile a etela moago wa lekala kua Korea Borwa, gomme ga bjale o tšwela pele gabotse kudu moyeng. Ye e no ba e nngwe ya diphihlelo tše dintši tše di kgahlišago tšeo re di amogetšego mo ntlongkgolo.

Re rapelela gore seo re ithutilego sona kopanong ya selete se tla hlohleletša batho ba bantši bao ba kilego ba hlankela Jehofa ka mafolofolo gore ba boele ka diatleng tša gagwe  tše borutho pele selemo e e ba ngwagola! Re le kgothaletša ka moka gore le ekiše Jehofa ka go amogela ka diatla tše pedi bohle bao ba boago ka phuthegong.—Hesek. 34:16.

Ruri Jehofa o šegofaditše batho ba gagwe ngwageng o fetilego wa tirelo. Ke’ng se sengwe seo re ka se letelago? Re tla swanelwa ke go leta gore re tle re bone. Ge re sa letile, hle tsebang gore rena ba Sehlopha se Bušago re le rata kudu ka moka e bile re le rapelela ka mehla.

Re le lakaletša tše dibotse,

Bana babo lena,

Sehlopha se Bušago sa Dihlatse tša Jehofa