Kgoši e nngwe yeo e ilego ya buša Babilona ke Dario wa Momede. Dario o ile a bona gore Daniele o bohlale go phala batho ba bangwe. O ile a mo dira molaodi wa banna ba maemo nageng yeo ya Babilona. Banna bao ba be ba sa rate Daniele e bile ba nyaka go mmolaya. Ba be ba tseba gore Daniele o be a rapela Jehofa gararo letšatši le lengwe le le lengwe. Ka gona ba botša Dario ba re: ‘Wena kgoši, anke o bee molao wa gore motho yo mongwe le yo mongwe a rapele wena feela. Motho le ge e le ofe yo a sa kwego molao woo, a lahlelwe ka moleteng wa ditau.’ Dario o ile a rata taba yeo, gomme a saena molao woo.

Gateetee ge Daniele a ekwa ka molao woo o moswa, o ile a ya ntlong ya gagwe. O ile a khunama a rapela Jehofa a le pele ga lefasetere leo le bulegilego. Banna bale ba go se rate Daniele ba ile ba tsena ka ntlong ya gagwe gomme ba mo hwetša a sa rapela. Ke moka ba kitimela go kgoši Dario ba fihla ba re: ‘Daniele o ganne go kwa molao wa gago. O rapela Modimo wa gagwe gararo letšatši le lengwe le le lengwe.’ Eupša Dario o be a rata Daniele e bile a sa nyake gore a hwe. O ile a fetša letšatši ka moka a nagana kamoo a ka phološago Daniele. Eupša go be go sa kgonege gore kgoši Dario a fetoše molao woo a bego a o saenne. Ka gona o ile a botša banna ba gagwe gore ba lahlele Daniele ka moleteng wo o bego o tletše ditau tše kotsi.

 Bošegong bjoo, Dario o ile a se robale ka ge a be a nagana kamoo a ka phološago Daniele. Mesong, o ile a kitimela moleteng wa ditau gomme a goeletša Daniele a re: ‘Na Modimo wa gago o kgonne go go phološa?’

Dario o ile a kwa lentšu. Lentšu leo e be e le la Daniele! Daniele o ile a botša Dario a re: ‘Morongwa wa Jehofa o tswaletše melomo ya ditau, ga se tša nkgobatša.’ Dario o ile a thaba kudu! O ile a laela gore Daniele a ntšhiwe ka moleteng woo wa ditau. Daniele o be a se a gobala le gatee. Ke moka kgoši Dario a re: ‘Lahlelang banna bao ba sa ratego Daniele ka moleteng wa ditau.’ Ge banna bao ba lahlelwa ka moleteng woo, ditau tša ba ja.

Ka morago ga moo, Dario o ile a botša setšhaba sa gagwe a re: ‘Batho ka moka ba swanetše go hlompha Modimo wa Daniele, ka gobane o dirile gore ditau di se ke tša mmolaya.’

Na le wena o rapela Jehofa letšatši le lengwe le le lengwe, go swana le Daniele?