Ka morago ga gore go fete matšatši a mantši Jesu a tšweletše go baapostolaba gagwe, Petro o ile a boela mošomong wa gagwe wa go rea dihlapi Lewatleng la Galilea. Thomase, Jakobo, Johane le barutiwa ba bangwe ba ya le yena. Ba ile ba rea dihlapi bošego ka moka eupša ba se sware selo.

Mesong ya letšatši le le latelago, ba ile ba bona monna yo mongwe a eme kgauswi le lewatle leo. O ile a ba goeletša a re: ‘Na le šetše le swere dihlapi?’ Ba re go yena: “Aowa!” Monna yoo a re: ‘Lahlelang nete ya lena ka lehlakoreng le letona la sekepe.’ Ge ba e lahletše, nete yeo e ile ya tlala dihlapi gomme ba palelwa ke go e goga. Gateetee Johane a tseba gore monna yoo ke Jesu gomme a re: “Ke Morena!” Ka yona nako yeo, Petro a fofela ka meetseng gomme a ya go Jesu. Barutiwa ba bangwe bona ba mo latela ka sekepe.

Ge ba tšwile ka lewatleng, ba bona senkgwa le hlapi di bešitšwe godimo ga mollo. Jesu a re ba tliše tše dingwe tša dihlapi tšeo ba di swerego gore le tšona bešwe. Ke moka a re: ‘Etlang le jeng.’

 Ge ba feditše go ja, Jesu o ile a botšiša Petro a re: ‘Petro, na o nthata go feta go rea dihlapi?’ Petro a re: ‘Ee Morena, o a tseba gore ke a go rata.’ Jesu a re: ‘Gona fepa dinku tša ka tše dinyenyane.’ Jesu a mmotšiša gape a re: ‘Petro, na o a nthata?’ Petro a re: ‘Ee Morena, o a tseba gore ke a go rata.’ Jesu a re: “Diša dinku tša ka tše dinyenyane.” Jesu o ile a botšiša Petro potšišo e swanago ka lekga la boraro. Petro a nyama kudu gomme a re: “Morena, o tseba tšohle. O a tseba gore ke go rata kudu.” Jesu a re: ‘Fepa dinku tša ka tše dinyenyane.’ Ke moka a re go Petro: “Tšwela pele o ntatela.”