Paulo o ile a feleletša leeto la gagwe la boraro la go bolela ditaba tše dibotse kua Jerusalema. Ge a le moo, o ile a swarwa gomme a lahlelwa kgolegong. Bošegong bjo bongwe, Jesu o ile a bolela le yena ponong gomme a re: ‘O tlo ya Roma gomme wa bolela ditaba tše dibotse moo.’ Paulo o ile a tšewa Jerusalema gomme a išwa Kesarea, moo a ilego a fetša mengwaga e mebedi a golegilwe. Ge Mmuši Fesito a be a mo sekiša, Paulo o ile a re go yena: ‘Ke nyaka go ahlolwa ke Kesara kua Roma.’ Fesito a re: ‘Ka ge o nyaka go ahlolwa ke Kesara; o tla išwa go yena.’ Ka morago ga moo, Paulo o ile a nametšwa sekepe seo se yago Roma. Bana babo ba Bakriste ba babedi e lego Luka le Aristareko ba ile ba sepela le yena.

Ge ba le gare ga lewatle, go ile gwa tsoga phefo e kgolo yeo e ilego ya tšea matšatši a mantši e sa kgaotše. Banamedi ka moka ba sekepe seo ba be ba nagana gore ba tlo hwa. Eupša Paulo o ile a re go bona: ‘Banna, morongwa wa Modimo o boletše le nna torong a re: “Se boife Paulo. O tlo fihla Roma, gomme batho ka moka bao ba lego ka sekepeng le bona ba tla fihla Roma.” Ka gona ebang le sebete! Re ka se hwe.’

Phefo yeo e kgolo e ile ya tšwela pele ka matšatši a 14. Mafelelong, ba ile ba thoma go bona naga. E be e le sehlakahlaka sa Melite. Sekepe seo se ile sa gogoba fase gomme sa pšhatlagana, eupša banamedi ba sona ka moka ba 276 ba phologa. Ba bangwe ba ile ba rutha gomme ba bangwe ba itshwareletša dikarolwaneng tša sekepe ba ya lebopong la lewatle. Batho ba sehlakahlakeng sa Melite ba ile ba ba thuša gomme ba ba goletša mollo gore ba ruthele.

Ka morago ga dikgwedi tše tharo, mašole a ile a iša Paulo kua Roma ka sekepe se sengwe. Ge a fihla moo, bana babo ba Bakriste ba ile ba mo gahlanetša. Ge Paulo a ba bona, a leboga Jehofa gomme tumelo ya gagwe ya tia. Le ge Paulo e be e le mogolegwa, o ile a dumelelwa go dula ka ntlong yeo e hirilwego gomme a letwa ke lešole. O ile a dula ntlong yeo mengwaga e mebedi. Batho ba be ba etla go mmona, gomme a ba botša ka Mmušo wa Modimo le go ba ruta ka Jesu. Le gona Paulo o ile a ngwalela diphuthego tša ditikologong tša  Asia le Judea mangwalo. Ruri Jehofa o ile a diriša Paulo go botša batho ba ditšhaba tše dintši ditaba tše dibotse.