Kua Filipi, go be go na le ngwanenyana yo mongwe yo a bego a na le motemona. Batho ba bangwe ba be ba mo dirile lekgoba la bona. Motemona yoo o be a dira gore ngwanenyana yo a kgone go botša batho dilo tšeo di sa tlago go direga gomme ba mo nea tšhelete. Seo se be se dira gore beng ba gagwe ba hume ka yena. Ge Paulo le Silase ba be ba bolela ditaba tše dibotse motseng wa Filipi, ngwanenyana yoo o ile a ba šala morago ka matšatši a mantši. Motemona yoo a bego a tsene ngwanenyana yoo, o be a mo dira gore a goeletše a re: “Banna ba ke bahlanka ba Modimo Yo Godimodimo.” Mafelelong, Paulo o ile a botša motemona yoo a re: ‘Ka leina la Jesu, etšwa go ngwanenyana yo!’ Motemona yoo a tšwa go ngwanenyana yoo.

Ge beng ba ngwanenyana yoo ba bona gore ga ba sa tlo dira tšheletše ka yena, ba galefa kudu. Ba ile ba gogela Paulo le Silase go bommaseterata ba setšhaba gomme ba re go bona: ‘Banna ba ba tshela molao e bile ba tena batho!’ Bommaseterata ba laela gore Paulo le Silase ba bethwe gomme ba lahlelwe kgolegong. Moleti wa kgolego a ba lahlela ka seleng ya leswiswi le lesoleso gomme a ba tlemelela setokising.

Paulo le Silase ba ile ba tumiša Jehofa ka dikoša, gomme bagolegwa ba bangwe ba theeditše. Gateetee, garegare ga bošego, lefase le ile la šikinyega kudu gomme kgolego yeo ba bego ba le ka gare ga yona ya šikinyega. Mabati a kgolego yeo a ile a no ipulegela, e bile diketane tšeo bagolegwa ba bego ba tlemilwe ka tšona tša tlemologa. Moleti yola wa kgolego o ile a kitimela ka moo kgolegong gomme a bona gore mabati a bulegile. Ka ge a be a nagana gore bagolegwa ka moka ba tšhabile, o ile a tšea thipa ya gagwe gomme a leka go ipolaya ka yona.

Ka yona nako yeo, Paulo a mo goeletša a re: ‘O se ke wa ipolaya! Ga se ra tšhaba, ka moka ga rena re sa le gona!’ Moleti yoo o ile a kitimela go Paulo le Silase gomme a fihla a kotama ka matolo pele ga bona. A ba botšiša a re: ‘Ke swanetše go dira eng gore ke phološwe?’ Ba re go yena: ‘Wena le ba lapa la gago le swanetše go dumela go Jesu.’ Ke moka Paulo le Silase ba mo ruta lentšu la Jehofa, gomme yena le lapa la gagwe ka moka ba kolobetšwa.