Lota o be a dula Kanana le Aborahama. Lota e be e le morwa wa ngwana gabo Aborahama. Mafelelong, Aborahama le Lota ba ile ba ba le diruiwa tše dintši kudu moo di bego di hloka ga go fula. Aborahama o ile a re go Lota: ‘Ga re sa kgona go dula gotee. Hle, kgetha naga yeo o e ratago, nna ke tla kgetha ka morago ga gago.’ Aborahama o be a sa rate maemo, o a mmona?

Lota o ile a bona naga e nngwe e botse kudu kgauswi le motse wo o bitšwago Sodoma. Naga yeo e be e na le meetse a mantši le bjang bjo botala. Ka gona o ile a kgetha yona gomme a ya a dula moo le lapa la gagwe.

Batho ba Sodoma le ba motseng wa kgauswi le yona e lego Gomora, ba be ba dira dilo tše mpe kudu. E be e le ba babe kudu moo Jehofa a ilego a re o tlo ba bolaya ka moka. Eupša o be a nyaka go phološa Lota le lapa la gagwe, ka gona a ba romela barongwa ba babedi. Barongwa bao ba ile ba fihla ba re go bona: ‘Akgofang! Etšwang motseng wo! Jehofa o nyaka go o fediša.’

Lota ga se a ka a tšwa motseng woo kapela. O ile a diega. Ka gona barongwa bao ba ile ba swara seatla sa gagwe, sa mosadi wa gagwe le diatla tša barwedi ba gagwe ba babedi gomme ba ba ntšhetša ka ntle ga motse ka lebelo, ba re go bona: ‘Tšhabang! Phološang maphelo a lena, le se ke la lebelela morago. Ge le ka lebelela morago, le tlo hwa!’

Ge ba fihla motseng wo o bitšwago Tsoare, Jehofa o ile a neša mollo  motseng wa Sodoma le wa Gomora. Jehofa o ile a fediša batho ba metseng yeo ka moka. Mosadi wa Lota o ile a se kwe Jehofa gomme a lebelela morago, ke moka a fetoga sehlwaseeme sa letswai! Eupša Lota le barwedi ba gagwe ba ile ba phologa ka gobane ba kwele Jehofa. Lota le barwedi ba gagwe ba swanetše go ba ba kwele bohloko kudu gore mosadi wa Lota ga se a kwa Jehofa. Eupša ba ile ba thabišwa ke gore bona ba kwele Jehofa.