Kapejana ge Farao a kwele gore Baisiraele ba tšwile Egipita, o ile a fetoša monagano gomme a se sa nyaka ba sepela. O ile a laela mašole a gagwe a re: ‘Namelang dikoloi tša ka ka moka tša ntwa, re ba kitimišeng! Ga se ra swanela go ba tlogela ba sepela.’ Ka gona Farao le mašole a gagwe ba kitimiša Baisiraele.

Jehofa o be a etile batho ba gagwe pele, a diriša leru mosegare go ba bontšha tsela gomme bošego a diriša mollo. O ile a ba iša Lewatleng le Lehwibidu, gomme a ba botša gore ba hlome ditente tša bona kgauswi le lona.

Ke moka Baisiraele ba ile ba bona Farao le mašole a gagwe ba ba kitimiša. Baisiraele ba be ba sa tsebe gore ba tšhabele kae. Ba ile ba llela Moshe ba re: ‘Re tlo hwa! Nkabe o sa re ntšha kua Egipita.’ Eupša Moshe a re go bona: ‘Le se ke la boifa. Emang le tiile gomme le bone ge Jehofa a le phološa.’ Moshe o be a botile Jehofa ka mo go feletšego, na o a mmona?

Jehofa o ile a botša Baisiraele gore ba hlahlamolle ditente tša bona. Bošegong bjoo, Jehofa o ile a tšea mollo wo a bego a hlahla Baisiraele ka wona gomme a o bea magareng ga bona le Baegipita. Ka lehlakoreng la Baegipita e ile ya ba leswiswi, eupša ka lehlakoreng la Baisiraele gwa ba le seetša.

Ke moka Jehofa o ile a botša Moshe gore a šupe lewatle ka letsogo la gagwe. Ge Moshe a dirile bjalo, Jehofa a dira gore go be le phefo e kgolo  bošego ka moka. Lewatle la arogana gomme gwa bulega tsela e omilego gare ga lona. Baisiraele ba dimilione ba ile ba tshela lewatle leo ba sepela mo go omilego, gomme meetse a lewatle leo a le bjalo ka maboto ka mathoko a bona.

Mašole a Farao le wona a ile a tsena ka lewatleng gomme a šala Baisiraele morago. Ke moka Jehofa a dira gore mašole a Baegipita a palelwe ke go sepela ka lewatleng. Mabili a dikoloi tša mašole ao a ile a thoma go tšwa. Ke moka mašole ao a goelela a re: ‘A re tšhabeng! Jehofa o lwela Baisiraele.’

Jehofa a botša Moshe a re: ‘Šupa lewatle ka letsogo la gago.’ Gateetee meetse a lewatle ao a bego a dirile maboto a khupetša mašole a Baegipita. Farao le mašole a gagwe ba ile ba hwa ka moka, gomme gwa se šale le o tee.

Ka ge Baisiraele ba be ba tshetše lewatle, ba ile ba opelela Jehofa koša yeo e rego: ‘A re opeleleng Jehofa, ka gobane o na le matla a magolo kudu. O lahletše pere le monamedi wa yona ka lewatleng.’ Ge ba dutše ba opela, basadi ba bangwe ba be ba bina e bile ba letša meropa. Baisiraele ka moka ba be ba thabile ka gobane ga bjale ba be ba lokologile e le ka nnete.