Ka morago ga dikgwedi tše e ka bago tše pedi Baisiraele ba tlogile Egipita, ba ile ba fihla Thabeng ya Sinai gomme ba dula moo. Jehofa o ile a bitša Moshe gore a tle godimo ga thaba yeo ke moka a re go yena: ‘Ke phološitše Baisiraele kua Egipita. Ge ba ka nkwa gomme ba kwa le melao ya ka, e tla ba batho ba ka ba ba kgethegilego.’ Moshe a fologa thaba gomme a yo botša Baisiraele ditaba tšeo Jehofa a mmoditšego tšona. Baisiraele ba ile ba arabela bjang? Ba ile ba re: ‘Re tlo dira selo se sengwe le se sengwe seo Jehofa a rego re se dire.’

Moshe o ile a boela thabeng yeo gape. Ge a le moo, Jehofa o ile a re go yena: ‘Ke tlo bolela le wena letšatšing la boraro. Sepela o yo botša Baisiraele gore ka letšatši leo ba se namele Thaba ya Sinai.’ Moshe a theoga moo thabeng ke moka a botša Baisiraele gore ba itokišeletše go tlo kwa seo Jehofa a tlago go ba botša sona.

Ge letšatši la boraro le fihlile, Baisiraele ba ile ba bona magadima le leru le lesoleso godimo ga thaba ya Sinai. Ba ile ba kwa le modumo o mogolo wa maduma le wa phalafala. Ke moka Jehofa a theogela thabeng yeo ka mollo. Baisiraele ba ile ba boifa kudu moo ba ilego ba thothomela. Thaba ka moka e ile ya thothomela kudu e bile ya khupetšwa ke muši. Modumo wa phalafala o ile wa oketšega kudu. Ke moka Modimo a re: ‘Ke nna Jehofa. Le se ka la rapela medimo e mengwe.’

Moshe o ile a boela thabeng ya Sinai gomme Jehofa a mo nea melao yeo a bego a swanetše go e botša Baisiraele. Melao yeo e be e ba botša gore ba swanetše go rapela Jehofa bjang le gore ba swanetše go phela bjang. Moshe o ile a ngwala melao yeo, ke moka a ya a e balela Baisiraele. Ka morago ga moo, ba tshepiša Jehofa ba re: ‘Re tlo dira selo se sengwe le se sengwe seo Jehofa a rego re se dire.’ Baisiraele ba ile ba tshepiša Modimo gore ba tlo mo kwa. Eupša na ba be ba tla dira seo ba bego ba mo tshepišitše sona?