Ge Moshe a be a le Thabeng ya Sinai, Jehofa o ile a mmotša gore a dire tente yeo e bitšwago taberenakele. Baisiraele ba be ba tlo rapela Jehofa go yona. Ba be ba tlo kgona go rwala taberenakele yeo ge ba tloga lefelong le lengwe ba eya go le lengwe.

Jehofa o ile a re go Moshe: ‘Botša Baisiraele gore ba ntšhe moneelo wa gore go tle go agiwe taberenakele.’ Baisiraele ba ile ba neela ka gauta, silifera, koporo, maswika a bohlokwa le dilo tša bona tša go ikgabiša. Ba ile ba neela le ka wulu, mašela a linene, matlalo a diphoofolo le dilo tše dingwe tše dintši. Ba ile ba ntšha dilo tše dintši kudu moo Moshe a ilego a re go bona: ‘Le se sa ntšha moneelo! Go lekane!’

Banna ba bantši le basadi bao ba nago le bokgoni ba ile ba thuša go aga taberenakele. Jehofa o ile a ba fa bohlale bja go aga taberenakele. Ba bangwe ba be ba dira digare gomme ba bangwe ba roka. Ba bangwe ba be ba betla maswika, ba bangwe ba dira dilo tša gauta, goba ba dira dilo tša kota.

Baisiraele ba ile ba aga taberenakele ka mokgwa wo Jehofa a itšego ba e age ka wona. Ba ile ba dira gareteine e botse yeo e bego e dira gore taberenakele e be le diphapoši tše pedi. Phapoši e nngwe e be e bitšwa Sekgethwa gomme e nngwe e bitšwa Sekgethwakgethwa. Ka Sekgethwakgethweng go be go na le areka ya kgwerano. E be e dirilwe ka gauta le ka kota ya sehlare seo se bitšwago moduhlare. Ka Sekgethweng go be go na le sehlomapone sa gauta, tafola le aletare ya go fišetša diorelo. Ka lapeng la taberenakele go be go na le sebjana sa koporo sa go hlapela le aletare e kgolo. Areka ya kgwerano e be e gopotša Baisiraele gore ba ile ba tshepiša Jehofa gore  ba tla dula ba mo kwa. Na o a tseba gore kgwerano ke eng? Ke go tshepiša Jehofa gore o tla mo direla selo se itšego.

Jehofa o ile a kgetha Arone le barwa ba gagwe gore ba šome taberenakeleng e le baperisita. Ba be ba swanetše go e hlokomela le go direla Jehofa dihlabelo go yona. Jehofa o ile a laela gore ka Sekgethwakgethweng go tsene moperisita yo a phagamego feela e lego Arone. Arone o be a tsena ka Sekgethwakgethweng gatee feela ka ngwaga gore a tliše sehlabelo sa gore Jehofa a mo lebalele dibe tša gagwe, tša lapa la gagwe le tša setšhaba ka moka sa Isiraele.

Baisiraele ba feditše go aga taberenakele ka morago ga ngwaga ba tlogile Egipita. Ga bjale ba be ba na le lefelo leo ba ka rapelago Jehofa go lona.

Jehofa o ile a bontšha gore o amogela taberenakele yeo gomme a bea leru ka godimo ga yona. Ka mehla ge leru leo le be le le ka godimo ga taberenakele, Baisiraele ba be ba sa tloge lefelong leo ba bego ba dula go lona. Eupša ge leru leo le be le rotogela godimo, ba be ba tseba gore ke nako ya go tloga. Ba be ba hlahlamolla taberenakele yeo gomme ba šala leru leo morago.