THUTO 32
Moetapele yo Mofsa le Basadi ba Babedi Bao ba Nago le Sebete
Ka morago ga gore Joshua a etelele pele setšhaba sa Jehofa ka mengwaga e mentši, o ile a hwa a na le mengwaga e 110. Baisiraele ba be ba ekwa Jehofa ge feela Joshua a be a sa phela. Eupša ge a hwile, ba ile ba thoma go rapela medimo ya maaka, go swana le Bakanana. Ka ge Baisiraele ba ile ba lahla Jehofa, o ile a dira gore kgoši ya Bakanana e lego Jabini e ba hlakiše. Baisiraele ba ile ba kgopela Jehofa gore a ba thuše. Ka gona Jehofa o ile a ba nea moetapele yo mofsa e lego Baraka. Baraka o be a tlo thuša Baisiraele gore ba rapele Jehofa gape.
Moporofeta wa mosadi e lego Debora o ile a roma motho gore a yo bitša Baraka. Debora o ile a botša Baraka molaetša wo o tšwago go Jehofa. O ile a re: ‘Sepela le banna ba 10 000 gomme o yo lwa le mašole a Jabini kua nokeng ya Kishoni. Gona moo o tla fenya Sisera, e lego molaodi wa mašole a Jabini.’ Ke moka Baraka a re go Debora: ‘Ge e ba o ka ya le nna, gona ke tla ya.’ Debora a re: ‘Ke tla ya le wena. Eupša tseba gore ga se wena o tlago go bolaya Sisera. Jehofa o re Sisera o tla bolawa ke mosadi.’
Debora o ile a sepela le Baraka le mašole a gagwe gomme ba ya ntweng Thabeng ya Thabora. Gateetee ge Sisera a ekwa ka seo, a kgoboketša mašole a gagwe le dikoloi tša ntwa gomme a ya nokeng yeo ya Kishoni. Ke
moka Debora a re go Baraka: ‘Lehono Jehofa o tla go thuša go fenya Sisera.’ Baraka le mašole a gagwe a 10 000 ba theoga thabeng ya Thabora gore ba yo lwa le mašole ao a boifišago a Sisera.Jehofa o ile a dira gore noka ya Kishoni e tlale kudu, ke moka Sisera le mašole a gagwe ba tanywa ke leraga la nokeng yeo. Sisera o ile a fologa koloing ya gagwe gomme a tšhaba. Baraka le mašole a gagwe ba ile ba bolaya mašole a Sisera, eupša Sisera a phonyokga! O ile a tšhaba gomme a fihla a utama ka tenteng ya mosadi yo a bitšwago Jaele. Jaele o ile a mo nea maswi ke moka a mo khupetša ka lepai. Sisera o ile a ya ka boroko ka ge a be a lapile. Ka gona Jaele a ya go yena ka setu, a tšea tšhipi ya tente gomme a e kokotela phatleng ya Sisera. Ke moka Sisera a hwa.
Baraka o ile a fihla tenteng ya Jaele a nyakana le Sisera. Jaele o ile a tšwela ka ntle gomme a re go Baraka: ‘Tsena ke go bontšhe monna yo o mo nyakago.’ Baraka a tsena gomme a hwetša Sisera a hwile. Baraka le Debora ba ile ba tumiša Jehofa ka koša ka ge a thušitše Baisiraele go fenya manaba a bona. Ke moka Baisiraele ba phela mengwaga e 40 ka khutšo.
“Basadi bao ba bolelago ditaba tše dibotse ke lekoko le legolo.”—Psalme 68:11