Batho ba dinageng tše dingwe tša Kanana ba ile ba kwa ka seo se diragetšego motseng wa Jeriko. Dikgoši tša dinaga tšeo di ile tša kwana gore di tle di lwe le Baisiraele. Eupša Bagibeoni ba ile ba tla ka polane e nngwe. Ba ile ba tla go Joshua ba apere diaparo tša go hlagala, gomme ba re go yena: ‘Re tšwa nageng ya kgole kudu. Re kwele ka Jehofa le dilo ka moka tšeo a le diretšego tšona kua Egipita le kua Moaba. Re tshepišeng gore le ka se re hlasele, gomme re tla ba bahlanka ba lena.’

Joshua o ile a ba kgolwa gomme a ba tshepiša gore ba ka se ba hlasele. Ka morago ga matšatši a mararo, o ile a kwa gore Bagibeoni ga ba tšwe nageng ya kgole. Ba be ba dula gona moo nageng ya Kanana. Joshua o ile a botšiša Bagibeoni a re: ‘Ke ka baka la eng le re boditše maaka?’ Ba re go yena: ‘Re be re tšhogile! Re a tseba gore Jehofa Modimo wa lena o a le lwela. Hle, le se ke la re bolaya.’ Joshua o ile a se ba bolaye, ka ge a be a ba tshepišitše gore a ka se ba bolaye.

Ka moragonyana ga moo, dikgoši tša Bakanana le mašole a tšona di ile tša hlasela Bagibeoni. Joshua le mašole a gagwe ba ile ba sepela  bošego ka moka gore ba yo thuša Bagibeoni. Ntwa yeo e ile ya thoma mesong e latelago. Bakanana ba ile ba thoma go tšhaba. Gohle moo ba bego ba tšhabela gona, Jehofa o be a ba bolaya ka sefako. Ke moka Joshua o ile a kgopela Jehofa gore a emiše letšatši. Ke ka baka la eng Joshua a be a ka kgopela Jehofa gore a emiše letšatši, mola re tseba gore letšatši ga sa nka la ema? Lebaka ke gore Joshua o be a bota Jehofa. Jehofa o ile a dira gore letšatši le se ke la sobela go fihlela Baisiraele ba fentše dikgoši tša Bakanana le mašole a tšona.