Ge Saulo a hwile, Dafida e ile ya ba kgoši. O be a na le mengwaga e 30. Ge a šetše a na le mengwaga e mentši e le kgoši, bošegong bjo bongwe o ile a re a le tlhakeng ya ntlo ya gagwe a bona mosadi yo mobotse. Dafida o ile a kwa gore leina la mosadi yoo ke Batseba, le gore o nyetšwe ke lešole leo le bitšwago Uria. Dafida o ile a roma batho gore ba yo bitša Batseba. O ile a robala le yena gomme Batseba a ima. Dafida o ile a leka go uta seo a se dirilego. O ile a botša molaodi wa mašole a gagwe gore a bee Uria ka pele ntweng gomme ba mo tlogele a bolawe. Ka morago ga gore Uria a bolawe ntweng, Dafida o ile a nyala Batseba.

Eupša Jehofa o ile a bona dilo ka moka tše mpe tšeo Dafida a di dirilego. Bjale Jehofa o ile a dira eng? O ile a romela moporofeta Nathane go Dafida. Nathane o ile a ya go Dafida gomme a fihla a re: ‘Go be go na le monna yo mongwe wa mohumi yo a bego a na le dinku tše dintši, le monna wa modiidi yo a bego a na le nku e tee e nyenyane yeo a bego a e rata kudu. Ka letšatši le lengwe, monna wa mohumi o ile a tšea nku ya monna wa modiidi.’ Ge Dafida a ekwa seo, a galefa gomme a re: ‘Monna yoo wa mohumi o swanetše go bolawa!’ Ke moka Nathane a re go Dafida: ‘Monna yoo wa mohumi ke wena!’ Dafida o ile a kwa bohloko kudu, ke moka a re go Nathane: ‘Ke senyeditše Jehofa.’ Sebe seo se ile sa tlišetša Dafida le lapa la gagwe mathata a mantši. Jehofa o ile a otla Dafida, eupša a se ke a mmolaya ka gobane Dafida o be a lokile e bile a na le boikokobetšo.

Ge nako e dutše e eya, Dafida o ile a nyaka go agela Jehofa tempele. Eupša Jehofa o ile a kgetha morwa wa Dafida e lego Solomone gore e be yena a agago tempele yeo. Dafida o ile a kgoboketša dilo tšeo Solomone a bego a tlo  di šomiša go aga tempele, gomme a re: ‘Tempele ya Jehofa e swanetše go ba e kgolokgolo le e botse kudu. Solomone e sa le yo monyenyane, eupša ke tla mo thuša ka go kgoboketša dilo tšeo a tlago go aga tempele yeo ka tšona.’ Dafida o ile a ntšha tšhelete e ntši kudu gore tempele yeo e tle e agiwe. O ile a hwetša batho ba go kgona go aga, a kgoboketša gauta le silifera, gomme a dira gore dikota tša metsedara tše di tšwago Tiro le Sidone di tlišwe Jerusalema. Ge Dafida a le kgauswi le go hwa, o ile a nea Solomone dipolane tša tempele yeo. O ile a botša Solomone a re: ‘Jehofa o itše ke go thalele dipolane tše. Jehofa o tla go thuša. Eba le sebete. O se ke wa boifa gomme o šome.’