Mmušo wa meloko e lesome wa Isiraele o bile le dikgoši tše dintši tše mpe, eupša Ahaba e be e le yo mongwe wa kgoši tše mpe kudu. O be a nyetše mosadi wa pelo e mpe yo a bego a rapela modimo yo a bitšwago Baali. Leina la mosadi yoo e be e le Isebele. Ahaba le Isebele ba ile ba dira gore Baisiraele ba bantši ba rapele modimo wa Baali, e bile ba bolaya baporofeta ba Jehofa. Jehofa o ile a dira eng? O ile a romela moporofeta Eliya gore a yo bolela le Ahaba.

Eliya o ile a botša Kgoši Ahaba gore go tla ba le komelelo nageng ya Isiraele ka ge a dira dilo tše mpe. Go ile gwa feta mengwaga ya ka godimo ga e meraro pula e sa ne. Go be go sa mele selo e bile batho ba bolawa ke tlala. Ge nako e dutše e eya, Jehofa o ile a romela Eliya gape go Ahaba. Kgoši Ahaba o ile a re go Eliya: ‘Ke wena o re baketšego mathata a! Ke molato wa gago.’ Eliya a re: ‘Ga se nna ke dirilego gore pula e se ke ya na. Ke wena o dirilego seo ka gore o rapela modimo wa maaka wa Baali. E le gore re bone gore Modimo wa nnete ke mang, kgoboketša setšhaba ka moka le baporofeta ba Baali thabeng ya Karamele.’

Setšhaba se ile sa kgobokana thabeng yeo, ke moka Eliya a re go sona: ‘Dirang phetho. Ge e ba Jehofa e le Modimo wa nnete, mo lateleng. Eupša ge e ba Baali e le yena modimo wa nnete, gona latelang yena. Bjale a re boneng gore Modimo wa nnete ke mang. Anke baporofeta ba 450 ba Baali ba dire sehlabelo gomme ba bitše modimo wa bona. Le nna ke tla dira sehlabelo gomme ka bitša Jehofa. Ke moka Modimo yo a tlago go araba ka mollo, ke yena Modimo wa nnete.’ Setšhaba sa dumelelana le Eliya.

Ka gona baporofeta ba Baali ba dira sehlabelo sa bona. Ba bitša leina la modimo wa bona go tloga mesong go fihlela mosegare, ba re: ‘Wena Baali, re arabe!’ Ge Baali a sa ba arabe, Eliya a ba kwera a re: ‘Goeletšang kudu. Mohlomongwe o robetše gomme o nyaka gore le mo tsoše.’ Letšatši le ile la sobela ba sa dutše ba goeletša modimo wa bona. Eupša ga se a ka a ba araba.

Eliya o ile a bea sehlabelo sa gagwe aletareng gomme a se tšhela ka meetse. Ke moka a rapela a re: ‘Wena Jehofa, anke setšhaba se se tsebe gore o Modimo wa nnete.’ Gateetee Jehofa a romela mollo go tšwa legodimong gomme wa tšhuma sehlabelo seo. Setšhaba sa goeletša sa re: ‘Jehofa ke Modimo wa nnete!’ Ke moka Eliya a re: “Swarang baporofeta ba Baali! Le se  ke la tlogela le o tee wa bona a tšhaba!” Lona letšatšing leo, baporofeta bale ba 450 ba Baali ba ile ba bolawa.

Ka morago ga gore Eliya a bone lerunyana lewatleng, o ile a botša kgoši Ahaba a re: ‘Go tla pula e kgolo. Namela koloi ya gago gomme o ye gae.’ Leratadima le ile la swifala ka maru, gwa ba le phefo, gomme gwa na pula e kgolokgolo. Mafelelong, komelelo e be e fedile. Ahaba o ile a otlela koloi ya gagwe ka lebelo le legolo. Jehofa o ile a thuša Eliya gore a šie koloi ya Ahaba ka lebelo! Na mathata a Eliya a be a fedile? A re bone.