Jehoshafate, yo e bego e le kgoši ya Juda, o ile a fediša dialetare tša modimo wa Baali le medingwana ya maaka nageng ya Juda. Ka ge a be a nyaka gore setšhaba sa gagwe se tsebe melao ya Jehofa, o ile a roma dikgošana le Balefi nageng ka moka ya Juda gore ba rute batho melao ya Jehofa.

Ditšhaba tša kgauswi le Juda di be di tšhaba go hlasela batho ba Juda ka gobane di be di tseba gore Jehofa o a ba thuša. E bile di ile tša tlišetša Kgoši Jehoshafate dimpho. Eupša Bamoaba, Baamoni le ditšhaba tše dingwe tša tikologong ya Seire ba ile ba tla go lwa le batho ba Juda. Jehoshafate o be a tseba gore o swanetše go kgopela thušo go Jehofa. O ile a bitša banna ka moka, basadi le bana gore ba tle Jerusalema. Ke moka a rapela a eme pele ga bona a re: ‘Jehofa, ge o ka se re thuše re tlo bolawa. Hle, re botše seo re swanetšego go se dira.’

Jehofa o ile a araba thapelo yeo, a re: ‘Le se ke la boifa. Ke tla le thuša. Itokišeng, emang pho, gomme le bone ge ke le phološa.’ Jehofa o ile a ba phološa bjang?

Mesong e latelago, Jehoshafate o ile a kgetha batho ba go opela gomme a ba botša gore ba ete mašole pele. Ba ile ba tloga Jerusalema gomme ba ya lefelong leo le bitšwago Thekoa, moo ntwa e bego e tlo lwelwa gona.

Ge batho bale ba go opela ba opelela godimo ka lethabo ba tumiša Jehofa, Jehofa o ile a lwela batho ba gagwe. O ile a dira gore Baamoni le Bamoaba ba hlakahlakane le go bolayana. Ba ile ba hwa ka moka ga bona. Eupša Jehofa o ile a šireletša batho ba Juda ka moka, mašole a bona le baperisita. Batho ka moka ba dinageng tša kgauswi le naga ya Juda ba ile ba kwa ka seo Jehofa a se dirilego, gomme ba tseba gore Jehofa o lwela batho ba gagwe. Jehofa o lwela batho ba gagwe bjang? O ba lwela ka ditsela tše dintši. Ga a hloke batho gore ba mo thuše.