Karolo ye e re ruta ka baswa le baporofeta bao ba bego ba na le tumelo e tiilego go Jehofa. Le gona e re botša ka dikgoši tšeo di ilego tša bota Jehofa. Kua nageng ya Siria, go be go na le ngwanenyana yo mongwe yo monyenyane wa Moisiraele. Ngwanenyana yoo o be a na le tumelo ya gore moporofeta wa Jehofa o be a ka fodiša Naamane. Moporofeta Elisha o be a na le tumelo e tiilego ya gore Jehofa o be a tla mo šireletša go mašole ao a bego a nyaka go mmolaya. Moperisita yo a Phagamego e lego Jehoyada o ile a ipea kotsing ya go bolawa ka go uta lesea leo le bitšwago Jehoashe gore makgolo wa lona wa pelo e mpe e lego Athalia a se ke a le bolaya. Kgoši Hesekia o be a na le tumelo ya gore Jehofa o tla šireletša motse wa Jerusalema, le gona ga se a ka a ineele go Baasiria. Kgoši Josia o ile a fediša borapedi bja medimo ya maaka nageng ya Juda, a lokiša tempele gomme a dira gore setšhaba se boele se rapele Jehofa.