Go be go na le motse o mongwe kua Asiria wo o bego o bitšwa Ninife. Batho ba moo ba be ba dira dilo tše mpe kudu. Jehofa o ile a botša moporofeta wa gagwe e lego Jona gore a yo botša batho ba Ninife gore ba tlogele go dira dilo tše mpe. Eupša Jona o ile a gana go ya moo. O ile a namela sekepe seo se bego se eya Tarashishi gomme a tšhaba.

Ge sekepe seo se dutše se le ka lewatleng, go ile gwa tsoga phefo e kgolo gomme basepediši ba sekepe ba tšhoga kudu. Ba ile ba rapela medimo ya bona gomme ba e botšiša ba re: ‘Ke ka baka la eng se se direga?’ Mafelelong, Jona a re go bona: ‘Molato ke wa ka. Ga se ka dira seo Jehofa a itšego ke se dire. Ntahleleng ka lewatleng, gomme phefo e tla kgaotša.’ Basepediši ba sekepe seo ba be ba sa nyake go lahlela Jona ka lewatleng, eupša a ba gapeletša. Ge ba mo lahletše ka lewatleng, phefo yeo ya kgaotša.

Jona o be a nagana gore o tlo hwela ka moo lewatleng. Ge a dutše a sobelela fase, o ile a rapela Jehofa. Ke moka Jehofa a romela hlapi e kgolo gore e yo metša Jona. E ile ya mo metša, eupša a se hwe. Ge a le ka mpeng ya hlapi yeo, a rapela a re: ‘Jehofa ke a go tshepiša, ke tlo dula ke go kwa.’ Jehofa o ile a šireletša Jona ka mpeng ya hlapi yeo ka matšatši a mararo, ka morago a dira gore e mo hlatšetše ka ntle ga lewatle.

Ka ge Jehofa a be a phološitše Jona lewatleng, na seo se be se bolela gore Jona o swanetše go boela gae? Aowa. Jehofa o ile a mmotša gape gore a ye Ninife. Mo nakong ye, Jona o ile a kwa Jehofa. O ile a ya Ninife  gomme a fihla a botša batho ba moo ba babe a re: ‘Go šetše matšatši a 40 gore Jehofa a le bolaye ka moka ga lena.’ Ke moka go ile gwa direga mohlolo. Batho ba Ninife ba ile ba theetša Jona gomme ba tlogela go dira dilo tše mpe. Kgoši ya Ninife e ile ya botša setšhaba sa yona ya re: ‘Rapelang Modimo, gomme le itsholeng. Mohlomongwe o tla tlogela go re bolaya.’ Ge Jehofa a bona gore batho ba Ninife ga ba sa dira dilo tše mpe, o ile a se sa ba bolaya.

Jona o ile a kwatišwa ke gore Jehofa ga se a bolaya batho ba Ninife. Nagana ka se: Jehofa ga se a ka a felela Jona pelo, e bile o ile a mo lebalela, eupša Jona yena o be a sa nyake go lebalela batho ba Ninife. O ile a tloga a yo dula ka ntle ga motse ka tlase ga moriti wa sehlare sa mokhure a selekegile. Ke moka sehlare seo sa pona, gomme a kwata gape. Ke moka Jehofa a bolela le yena a re: ‘Wena o kwela sehlare se bohloko. Ka gona, na nna ga se ka swanela go kwela batho ba Ninife bohloko? Ke ba gaugetše gomme ka se ba bolaye.’ Ke thuto efe yeo Jehofa a bego a e ruta Jona? O be a mo ruta gore batho ba Ninife ba be ba le bohlokwa kudu go feta sehlare.