NA O kile wa holofetša go dira selo se itšego gomme ka morago wa hwetša go le thata go se phetha? Monna yo a lego mo seswantšhong o dirile bjalo gomme ke ka baka leo a nyamilego kudu. Ke moahlodi wa Isiraele yo a nago le sebete yo a bitšwago Jefeta.

Jefeta o phetše mehleng ya ge Baisiraele ba be ba tlogetše go rapela Jehofa. Ba be ba dira dilo tše mpe gape. Ka gona Jehofa o ile a dumelela setšhaba sa Baamoni gore se ba tlaiše. Se se ile sa dira gore Baisiraele ba llele Jehofa ba re: ‘Re go senyeditše. Re phološe hle!’

Baisiraele ba be ba itshola ka baka la dilo tše mpe tšeo ba di dirilego. Ba ile ba bontšha gore ba a itshola ka gore ba rapele Jehofa gape. Ka gona Jehofa o ile a ba thuša gape.

Setšhaba se ile sa kgetha Jefeta gore a lwe le Baamoni ba babe. Jefeta o be a tloga a nyaka gore Jehofa a mo thuše ntweng. Ka gona o ile a holofetša Jehofa a re: ‘Ge o ka dira gore ke fenye Baamoni, gona motho wa pele yo a tlago go tšwa ka ntlong ya ka a etla go nkgahlanetša ge ke boa ntweng, ke tla go nea yena.’

Jehofa o ile a theetša kholofetšo ya Jefeta gomme a mo thuša go fenya ntwa. Ge Jefeta a boa gae, na o a tseba gore ke mang wa pele yo a ilego a tšwa ka ntlong go tlo mo gahlanetša? Ke morwedi wa gagwe yoo e bego e le ngwana a nnoši wa gagwe. Jefeta o ile a lla ka gore: ‘Joo, morwedi wa ka! O nnyamišeditše eng. Ke holofeditše Jehofa selo se itšego gomme nka se ke ka lesa go se phetha.’

Ge morwedi wa Jefeta a ekwa ka kholofetšo yeo, mathomong le yena o ile a nyama. O ile a nyama ka gobane se se be se bolela gore o tlo tlogela tatagwe le bagwera ba gagwe. Eupša o be a tlo hlankela Jehofa bophelo bja gagwe ka moka taberenakeleng kua Shilo. Ka gona o ile a re go tatagwe: ‘Ge e ba o holofeditše Jehofa selo se itšego, o swanetše go se phetha.’

Ka gona morwedi wa Jefeta o ile a ya Shilo gomme a fetša bophelo bja gagwe ka moka a hlankela Jehofa taberenakeleng ya gagwe. Barwedi ba Baisiraele ba be ba mo etela moo ka matšatši a mane ngwageng o mongwe le o mongwe gomme ba thaba gotee le yena. Batho ba be ba rata morwedi wa Jefeta ka gobane e be e le mohlanka wa go loka wa Jehofa.

Baahlodi 10:6-18; 11:1-40.