MOSHE o be a nyaka go tsena nageng ya Kanana le Baisiraele. Ka gona o ile a kgopela Jehofa a re: ‘Ntumelele ke tshele Noka ya Jorodane gomme ke yo bona naga e botse.’ Eupša Jehofa a re: ‘Homola! O se sa hlwa o bolela le nna gape ka taba ye!’ Na o a tseba gore ke ka baka la’ng Jehofa a ile a bolela bjalo?

Ke ka baka la seo se ilego sa direga nakong ya ge Moshe a be a itia leswika. Gopola gore yena le Arone ba ile ba se ke ba godiša Jehofa. Ga se ba ka ba botša setšhaba gore ke Jehofa a bego a ntšhitše meetse leswikeng. Ka baka leo, Jehofa o ile a re a ka se ba dumelele go tsena nageng ya Kanana.

Bjale dikgwedi tše sego kae ka morago ga ge Arone a hwile, Jehofa o ile a re go Moshe: ‘Tšea Joshua gomme o mo emiše pele ga moperisita Eleasara le pele ga setšhaba. Ke moka gona moo pele ga bona ka moka, o botše setšhaba ka moka gore Joshua ke moetapele yo mofsa.’ Moshe o ile a dira seo Jehofa a se boletšego, go etša ge o ka bona mo seswantšhong.

Ke moka Jehofa a re go Joshua: ‘Tia matla gomme o se ke wa boifa. O tla etelela Baisiraele pele go tsena nageng ya Kanana yeo ke ba holofeditšego yona, e bile ke tla ba le wena.’

Ka morago Jehofa o ile a botša Moshe gore a rotogele godimo ga Thaba ya Nebo yeo e lego nageng ya Moaba. Gona moo, Moshe o ile a kgona go lebelela ka mošola wa Noka ya Jorodane gomme a bona naga e botse ya Kanana. Jehofa a re go yena: ‘Ye ke naga yeo ke holofeditšego go e nea bana ba Aborahama, Isaka le Jakobo. Ke go dumeletše go e bona, eupša nka se go dumelele go tsena go yona.’

Moshe o ile a hwela gona moo godimo ga Thaba ya Nebo. O be a na le nywaga e 120. O be a sa na le matla e bile mahlo a gagwe a be a sa bona gabotse. Setšhaba sa nyama kudu gomme sa lla ka gobane Moshe a hwile. Eupša sa thabišwa ke gore Joshua e be e le moetapele wa sona yo mofsa.

Numeri 27:12-23; Doiteronomio 3:23-29; 31:1-8, 14-23; 32:45-52; 34:1-12.