BANNA ba ba kotsing. Ba swanetše gore ba tšhabe goba go sego bjalo ba tla bolawa. Ke dihlodi tša Isiraele gomme mosadi yo a di thušago ke Rahaba. O be a dula ka ntlong ye yeo e bego e agilwe morakong wa motse wa Jeriko. Anke re bone lebaka leo ka lona banna ba ba lego kotsing.

Baisiraele ba be ba itokišeletša go tshela Noka ya Jorodane gore ba tsene nageng ya Kanana. Eupša pele ga ge ba ka tshela, Joshua o ile a roma dihlodi tše pedi. A re go tšona: ‘Sepelang le yo hlola naga le motse wa Jeriko.’

Ge di tsene Jeriko, di ile tša ya ntlong ya Rahaba. Eupša motho yo mongwe a botša kgoši ya Jeriko a re: ‘Baisiraele ba babedi ba tsene mo bošegong bjo go tlo hlola naga.’ Ge kgoši e ekwa seo, ya romela banna go Rahaba gomme ba fihla ba re go yena: ‘Ntšha banna bao ba lego ka ntlong ya gago!’ Eupša Rahaba o be a utile dihlodi tšeo tlhakeng ya ntlo ya gagwe. Ka gona o ile a re: ‘Ke therešo gore go na le banna ba babedi bao ba tlilego ntlong ya ka, eupša ga ke tsebe moo ba bego ba etšwa gona. Ba tlogile ge go thoma go swifala, pele ga ge kgoro ya motse e ka tswalelwa. Ge le ka akgofa, le tla ba swara!’ Ke moka banna bao ba ba rakediša.

Ka morago ga ge ba tlogile, Rahaba a rotogela tlhakeng ka go akgofa. A re go dihlodi tšeo: ‘Ke a tseba gore Jehofa o tlo le nea naga ye. Re kwele kamoo a omišitšego meetse a Lewatle le Lehwibidu pele ga lena ge le be le etšwa Egipita le kamoo le bolailego Kgoši Sihoni le Ogo. Ka ge ke le bontšhitše botho, bjale hle nkholofetšeng gore le lena le tla mpontšha botho. Le phološe tate, mma, dikgaetšedi tša ka le bana bešo.’

Dihlodi tšeo tša holofetša gore di tla dira bjalo, eupša Rahaba o be a swanetše go dira selo se sengwe. Di ile tša re go yena: ‘Tšea thapo ye e khwibidu o e kgokelele lefasetereng la ntlo ya gago gomme o kgoboketše ba geno ka ntlong ye. E tla re ge re boa le setšhaba ka moka go tlo thopa Jeriko, re tla bona thapo ye gomme re ka se ke ra le bolaya.’ Ge dihlodi tšeo di boetše go Joshua, di ile tša mmotša dilo ka moka tšeo di diregilego.

Joshua 2:1-24; Baheberu 11:31.