GA BJALE metse e mentši ya Kanana e be e itokišetša go lwa le Baisiraele. Batho ba metseng yeo ba be ba nagana gore ba ka ba fenya. Eupša batho ba motse wa kgauswi le moo wa Gibeoni ba be ba sa nagane bjalo. Ba be ba dumela gore Modimo o be a thuša Baisiraele gomme ba be ba sa nyake go lwa le Modimo. Na o a tseba gore Bagibeoni ba ile ba dira eng?

Ba ile ba itira eka ba tšwa nageng ya kgole kudu. Ka gona, ba bangwe ba banna ba ba ile ba apara diaparo tše di onetšego gomme ba rwala diramphašane tše di onetšego. Ba rweša dipokolo tša bona mekotla e onetšego e bile ba tšea dinkgwa tša kgale tšeo di omeletšego. Ke moka ba ya go Joshua ba re: ‘Re tšwa nageng ya kgole ka gobane re kwele ka Modimo wa lena yo mogolo Jehofa. Re kwele dilo ka moka tšeo a le diretšego tšona kua Egipita. Ka gona baetapele ba rena ba re boditše gore re tšee mefago ya leeto gomme re tle re re go lena: “Re bahlanka ba lena. Re holofetšeng gore le ka se lwe le rena.” Le a bona gore diaparo tša rena di onaditšwe ke leeto le letelele le gore dinkgwa tša rena ke tša kgale e bile di omeletše.’

Joshua le baetapele ba bangwe ba ile ba kgolwa Bagibeoni bao. Ba ba holofetša gore ba ka se lwe le bona. Eupša ka morago ga matšatši a mararo, ba kwa gore Bagibeoni bao ba be ba dula kgauswi le bona.

Joshua o ile a ba botšiša a re: ‘Ke ka baka la’ng le re boditše gore le tšwa nageng ya kgole?’

Bagibeoni bao ba araba ba re: ‘Re dirile bjalo ka gobane re boditšwe gore Modimo wa lena Jehofa o holofeditše go le nea naga ye ya Kanana ka moka. Ka gona re be re boifa gore le tla re bolaya.’ Eupša Baisiraele ba ile ba boloka kholofetšo ya bona gomme ba se ke ba bolaya Bagibeoni bao. Go e na le moo, ba ile ba ba dira bahlanka ba bona.

Kgoši ya Jerusalema ya galefa kudu ka ge Bagibeoni ba be ba dirile khutšo le Baisiraele. Ka gona ya botša dikgoši tše dingwe tše nne ya re: ‘Etlang le nthuše go lwa le motse wa Gibeoni.’ Dikgoši tšeo tše hlano di ile tša dira sona seo. Na e be e le gabohlale gore Bagibeoni ba dire khutšo le Baisiraele, ka ge bjale se se dira gore dikgoši tše di tle di lwe le bona? Re tla bona.

Joshua 9:1-27; 10:1-5.