NA O bona seo se diregago mo seswantšhong? Ba ke banna ka moka ba ntwa ba Isiraele. Banna bao ba khunamego ba nwa meetse. Monna yo a emego kgauswi le bona ke Moahlodi Gideone. O lebeletše kamoo banna ba ba nwago meetse ka gona.

Lebelela gabotse ditsela tše di sa swanego tšeo banna ba ba nwago meetse ka tšona. Ba bangwe ba inametše ka meetseng. Eupša yo mongwe o ga meetse ka diatla tša gagwe e le gore a tle a kgone go bona seo se diregago go mo dikologa. Se ke sa bohlokwa ka gobane Jehofa o be a boditše Gideone gore a kgethe feela banna bao ba tlago go ba šedi ge ba dutše ba enwa meetse. Modimo o ile a re ba bangwe ba boele gae. Anke re bone lebaka la seo.

Baisiraele ba be ba le mathateng gape. Lebaka ke gore ba be ba se ba kwa Jehofa. Batho ba Midiane ba be ba le matla go ba feta e bile ba ba tlaiša. Ka gona Baisiraele ba ile ba kgopela Jehofa gore a ba thuše gomme yena a kwa dillo tša bona.

Jehofa o ile a botša Gideone gore a kgoboketše madira, ka gona Gideone a kgoboketša banna ba ntwa ba 32 000. Eupša madira ao a bego a elwa le Baisiraele e be e le a 135 000. Lega go le bjalo, Jehofa o ile a re go Gideone: “Batho bao o nago le bona ke ba bantši kudu.” Ke ka baka la’ng Jehofa a ile a bolela se?

Ke ka gobane ge Baisiraele ba be ba ka fenya ntweng, ba be ba tla nagana gore ba fentše ka matla a bona. Ba be ba ka nagana gore go be go sa nyakege gore Jehofa a ba thuše. Ka gona Jehofa o ile a re go Gideone: ‘Botša banna ka moka bao ba boifago gore ba boele gae.’ Ge Gideone a ba boditše, banna ba ntwa ba 22 000 ba ile ba boela gae. Gideone a šala le banna ba 10 000 feela bao ba bego ba tla lwa le madira a 135 000.

Eupša ekwa seo Jehofa a se bolelago! O re go Gideone: ‘O sa dutše o na le banna ba bantši kudu.’ Ka gona a botša Gideone gore a ye le banna ba go yo nwa meetse nokeng ye ke moka a gomiše banna ka moka bao ba nwago meetse ba khuname ka matolo. Jehofa o ile a mo holofetša gore: ‘Ke tla dira gore o fenye ka banna ba 300 bao ba ilego ba ba šedi ge ba be ba enwa meetse.’

Nako ya ntwa e ile ya fihla. Gideone o ile a arola banna ba gagwe ba 300 ka dihlopha tše tharo. A nea monna yo mongwe le yo mongwe lenaka le sebjana seo se bego se na le serumula ka gare ga sona. Mo e ka bago bošegogare, ka moka ga bona ba dikologa mešaša ya manaba a bona. Ke moka ka nako e tee ka moka ba letša manaka a bona, ba pšhatlaganya dibjana tša bona gomme ba goeletša ba re: “Tšhoša ya Jehofa le ya Gideone!” Ge manaba a bona a tsoga, a ile a gakanega le go tšhoga. Ka moka ga ona a tšhaba gomme Baisiraele ba fenya ntwa.

Baahlodi dikgaolo 6 go ya go 8.