GO BE go fetile nywaga e 10 ga e sa le Kgoši Nebukadinetsara a išitše Baisiraele ka moka bao ba rutegilego kudu Babilona. Bjale bona seo se diregago mo seswantšhong! Jerusalema e a fišwa. Le gona Baisiraele bao ba sego ba bolawa ba išwa Babilona e le bagolegwa.

Gopola gore se ke seo baporofeta ba Jehofa ba ilego ba lemoša gore se be se tla direga ge e ba batho ba be ba ka se fetoše ditsela tša bona tše mpe. Eupša Baisiraele ba ile ba se theetše baporofeta bao. Ba ile ba tšwela pele ba rapela medimo ya maaka go e na le go rapela Jehofa. Ka gona Baisiraele ba be ba swanelwa ke go otlwa. Re tseba se ka gobane Hesekiele moporofeta wa Modimo o re botša dilo tše mpe tšeo Baisiraele ba bego ba di dira.

Na o a tseba gore Hesekiele e be e le mang? E be e le yo mongwe wa masogana ao Kgoši Nebukadinetsara a ilego a a iša Babilona nywaga ya ka godimo ga e 10 pele ga ge Jerusalema e ka senywa kudu ka tsela ye. Daniele le bagwera ba gagwe ba bararo e lego Shaderaka, Meshaka le Abedinego le bona ba be ba išitšwe Babilona ka yona nako yeo.

Ge Hesekiele a sa dutše a le Babilona, Jehofa o ile a mmontšha dilo tše mpe tšeo di bego di direga tempeleng kua Jerusalema. Jehofa o ile a dira se ka mohlolo. Ee, Hesekiele o be a sa dutše a le Babilona, eupša Jehofa o ile a mmontšha dilo tšohle tšeo di bego di direga tempeleng. Seo a se bonego se be se tšhoša.

Jehofa o ile a re go Hesekiele: ‘Bona dilo tše di šišimišago tšeo batho ba di dirago mo tempeleng. Bona maboto ao a tletšego diswantšho tša dinoga le tša diphoofolo tše dingwe. Le gona bona Baisiraele bao ba di rapelago!’ Hesekiele o ile a bona dilo tše gomme a ngwala seo se bego se direga.

Jehofa a mmotšiša a re: ‘Na o a se bona seo baetapele ba Isiraele ba se dirago ka sephiring?’ Ee, se le sona o be a se bona. Le gona go be go na le banna ba 70 gomme ka moka ga bona ba be ba rapela medimo ya maaka. Ba re: ‘Jehofa ga a re bone. O tlogetše naga ye.’

Ke moka Jehofa a bontšha Hesekiele basadi ba bangwe bao ba bego ba le mojakong wa ka leboa wa tempele. Ba be ba dutše moo ba rapela Thamutsi modimo wa maaka. A mmontšha le banna bao ba bego ba le mojakong wa tempele ya Jehofa! E be e le ba e ka bago ba 25. Hesekiele o ile a ba bona. Ba be ba khuname ba lebeletše bohlabela gomme ba rapela letšatši!

Jehofa a re go yena: ‘Batho ba ga ba ntlhomphe. Ga ba fo dira dilo tše mpe, eupša ba bile ba tla tempeleng ya ka gomme ba di direla gona!’ Bjale Jehofa o ile a holofetša gore: ‘Ba tla bona gore ke ba galefetše. Le gona nka se ba kwele bohloko ge ba fedišwa.’

Go ile gwa feta mo e ka bago nywaga e meraro feela ka morago ga ge Jehofa a bontšhitše Hesekiele dilo tše, moo Baisiraele ba ilego ba rabela go Kgoši Nebukadinetsara. Ka gona Nebukadinetsara a ya a lwa le bona. Ka morago ga ngwaga le seripa, Bababilona ba ile ba phušola merako ya Jerusalema gomme ba fiša motse woo. Batho ba bantši ba ile ba bolawa gomme ba bangwe ba išwa Babilona e le bagolegwa.

Ke ka baka la’ng Jehofa a ile a dumelela gore Baisiraele ba fedišwe ka tsela ye e šiišago? Ee, ke ka gobane ga se ba mo theetša e bile ga se ba kwa melao ya gagwe. Se se bontšha kamoo go lego bohlokwa ka gona gore ka mehla re dire seo Modimo a se bolelago.

Mathomong ke batho ba sego kae feela bao ba ilego ba dumelelwa gore ba šale nageng ya Isiraele. Kgoši Nebukadinetsara o ile a bea Gedalia wa Mojuda gore a okamele batho ba. Eupša Baisiraele ba bangwe ba ile ba bolaya Gedalia. Bjale batho ba boifa gore Bababilona ba tla tla gomme ba ba fediša ka moka ka baka la selo se se sebe seo se diregilego. Ka gona ba gapeletša Jeremia gore a tloge le bona gomme ba tšhabela Egipita.

Se se ile sa dira gore naga ya Isiraele e šale e se na batho. Go ile gwa feta nywaga e 70 go se na motho yo a dulago moo. Go be go se motho moo nageng. Lega go le bjalo, Jehofa o be a holofeditše gore o tla bušetša batho ba gagwe nageng ya bona ka morago ga nywaga e 70. Eupša mo nakong ye, ke eng seo se diragalelago batho ba Modimo nageng ya Babilona moo ba išitšwego gona? Anke re bone.

2 Dikgoši 25:1-26; Jeremia 29:10; Hesekiele 1:1-3; 8:1-18.